އައިއެސް ޖަމާއަތުގެ ރާއްޖޭގެ ލީޑަރު ކަމަށް ދައުލަތުން ތުހުމަތު ކުރާ، ޏ. ފުވައްމުލައް މާދަޑު، ކަރިއްޔާވިލާ، މުހައްމަދު އަމީން ބަންދުކުރުމުގެ އަމުރަކަށް ޕްރޮސިކިއުޓާ ޖެނަރަލްގެ އޮފީހުގެ ފަރާތުން ކުރިމިނަލް ކޯޓަށް ހުށަހަޅައިފި އެވެ.
އެ އަމުރަށް އެދިފައިވީ ނަމަވެސް, މިހާތަނަށް ކުރިމިނަލް ކޯޓުން އަމީންގެ ބަންދު މަޖިލިސް ބާއްވާފައެއް ނުވެ އެވެ.
މިހާރު ދޫވެފައިހުރި އަމީން އަލުން ބަންދުކުރުމުގެ އަމުރަކަށް ޕްރޮސިކިއުޓާ ޖެނަރަލްގެ ފަރާތުން އެދުނީ އޭނާގެ މައްޗަށް ކޮށްފައިވާ ޓެރަރިޒަމްގެ ދައުވާތައް ހައިކޯޓުން ބާތިލްކޮށްފައިވަނީ ގޯސްކޮށް ކަމަށް ކަނޑައަޅައި, އޭނާގެ މައްޗަށް ޝަރީއަތް ހިންގަން ކުރިމިނަލް ކޯޓުގެ މައްޗަށް މިދިޔަ އާދިއްތަ ދުވަހު އަމުރުކޮށްފައިވާތީ އެވެ.
ހައިކޯޓުގެ ހުކުމާ ހަމައަށް އަމީން ހުރީ ޝަރީއަތް ނިމެންދެން ބަންދުގަ އެވެ.
އެ ހުކުމާއެކު އަމީން މިނިވަންވެފައި ވާއިރު, އޭނާގެ މައްޗަށް ހައިކޯޓުން މިހާރު ވަނީ މޮނިކޮން އަމުރެއް ނެރެފަ އެވެ. އޭނާގެ ހަރަކާތްތައް ބެލުމަށްޓަކައި ފައިގައި ޓެގް އެޅުވުމަށް ވެސް ފުލުހުން އަންނަނީ މަސައްކަތް ކުރަމުންނެވެ.
މީގެ ދެ އަހަރު ކުރިން ހައްޔަރުކޮށް، އަމީންގެ މައްޗަށް އުފުލާފައިވަނީ ޓެރަރިސްޓް ޖަމާއަތެއްގައި ބައިވެރިވުމާއި ޓެރަރިޒަމްގެ އަމަލެއް ކުރަން ރޭވުމުގެ ކުށުގެ ދައުވާ އެވެ.
އޭނާގެ މައްޗަށް އެ ދެ ދައުވާ އުފުލީ ދައުލަތުން ބުނާ ގޮތުގައި، އައިއެސްގެ ރާއްޖޭގެ ލީޑަރެއްގެ ގޮތުގައި ހަރަކާތްތެރިވެ ދީނީ ވަކި ވިސްނުމެއް ފެތުރުމަށް މަސައްކަތްކޮށްފައިވާތީ އެވެ. އަދި ސީރިއާގައި ހިނގަމުން ދިޔަ ހަނގުރާމައަށް ދިވެހިން ފޮނުވުމަށް މަސައްކަތްކުރި ކަމަށް ވެސް ތުހުމަތު ކުރެ އެވެ.
މީގެ އިތުރުން ސީރިއާގެ ދާހިލީ ހަނގުރާމަ ނިމުމާ އެކު، އަފްގާނިސްތާނުގައި އޮތް އައިއެސް ޖަމާއަތުގެ ބައިގަނޑަކަށް، ރާއްޖޭގެ ސެލް ލީޑަރެއްގެ ގޮތުގައި މީހަކު ފޮނުވި ކަމުގެ ތުހުމަތު ވެސް ދައުލަތުން އަމީންގެ މައްޗަށް ކުރެ އެވެ.
