ކޮލޮމްބޯ، ސްރީލަންކާ (އޮކްޓޯބަރު 4) - ނަސާރާއިން ފާހަގަކުރާ އީސްޓާ ސަންޑޭއާ ދިމާކޮށް މީގެ ދެ އަހަރު ކުރިން ސްރީ ލަންކާގައި ދިން, 279 މީހުން މަރުވި ބޮމުގެ ހަމަލާތަކުގެ މާސްޓާމައިންޑާއި އިތުރު 24 މީހަކާ ދެކޮޅަށް ދައުވާކޮށްފި އެވެ.
އޭޕްރިލް 21، 2019 ވަނަ ދުވަހު ބޮމުގެ ހަމަލާތައް ދިނީ ތިން ފައްޅިއަކާއި ތިން ލަގްޒަރީ ހޮޓަލަކަށް އަމާޒުކޮށެވެ. ތުހުމަތުވާ މީހުންނާ ދެކޮޅަށް 20،000 އަށް ވުރެ ގިނަ ދައުވާ އުފުލާފައި ވާއިރު، އޭގެ ތެރެއިން ތިން މީހުންނަކީ އެމެރިކާގެ ޖަސްޓިސް ޑިޕާޓްމަންޓުން ވެސް ޓެރަރިޒަމްގެ ތުހުމަތު ކުރާ ބަޔެކެވެ.
އެންމެން ވެސް ބަންދުގައި ތިބިއިރު، ހޯމަ ދުވަހު އޮތް އަޑުއެހުމަށް އެކަކު ފިޔަވައި އެންމެން ހާޒިރުކުރި އެވެ. އޭނާ އަށް ހާޒިރުނުވެވުނީ ކޮވިޑަށް ޕޮޒިޓިވްވުމުންނެވެ. އޮފިޝަލުން ބުނެފައި އަޑުއެހުންތައް ރަސްމީކޮށް ފަށާނީ ނޮވެމްބަރު 23 ގައި ކަމަށެވެ.
ހަމަލާތަކުގެ މާސްޓާމައިންޑަކީ މުހައްމަދު ނައުފަރް ކަމަށް ލަންކާ އިން ބުނެ އެވެ. އޭނާ އަކީ ޓެރަރިސްޓް ޖަމާއަތް އިސްލާމިކް ސްޓޭޓް (އައިއެސް) ގެ މެމްބަރެކެވެ.
އޭގެ އިތުރުން އައިއެސްގެ ހަމަލާއެއްގެ ޖާސޫސީ މައުލޫމާތު ކުރީ ބައިގައި ލިބުނު ނަމަވެސް، ފިޔަވަޅު ނާޅާ ތިބުމުން ފުލުހުންގެ ކުރީގެ ޗީފް ޕުޖިތު ޖަޔަސުންދަރަ އާއި ޑިފެންސް އޮފިޝަލް ހިމާންސިރި ފެނަންޑޯއާ ދެކޮޅަށް ވަކިން ޝަރީއަތް ހިންގާނެ އެވެ.
ކުރީގެ ރައީސް މައިތްރިޕާލާ ސިރިސޭނާ އުފެއްދެވި ތަހުގީގީ ކޮމިޓީން ނިންމާފައި ވަނީ ސިރިސޭނާގެ އިހުމާލެއް ވެސް އެބަ އޮންނެވި ކަމަށާއި އެހެންވެ ދައުވާ އުފުލަން ޖެހޭނެ ކަމަށެވެ.
