މިދިޔަ 12 އަހަރު ތެރޭ އޭވިއޭޝަން އިންޑަސްޓްރީއާއި ޕައިލެޓްކަން ކިޔަވާ ކުދިން އެތައް ގުނައެއް އިތުރުވެފައިވާ މި ރާއްޖޭގައި ހިންގަމުން ދިޔައީ އެންމެ ފްލައިން ސްކޫލެކެވެ. އޭޝިއަން އެކަޑަމީ އޮފް އެރޮނޯޓިކްސް (އޭއޭއޭ)ގެ ނަމުގައި ހިންގި އެ ސްކޫލު ވެގެންގޮސްފައި މިވަނީ ކޮންމެ ދާއިރާއެއްވިޔަސް، އިގްތިސޯދީ ބަހުން ބުނާނަމަ، "މޮނޮޕޮލައިޒް" ކޮށްލުމުން ލިބޭ ގެއްލުންތަކުގެ ލާމަސީލު މިސާލަކަށެވެ.
ދަރިވަރުންނަށް ޖެއްސުންކޮށް، ސަރުކާރުގެ ކުރިމަތީގައި ގަދަބަސް ބުނުން ފަދަ ކަންކަން އޭއޭއޭގެ ފަރާތުން ފެންނަން ފެށުމާއެކު، ސަރުކާރުން މިވަނީ އެންމެ ފަހުން އޭއޭއޭ އަތުން އައްޑޫގައި ހިންގި ފްލައިން ސްކޫލުގެ އެއްބަސްވުން އާ ނުކުރަން ނިންމައިފަ އެވެ.
އެހެންނަމަވެސް އޭގެ ފަހަތުން އެތައް އެތައް މައްސަލަތަކެއް ވަނީ ފެންމަތިވެފަ އެވެ. އެންމެންނަށް ވެސް އެނގޭ ކަމަކީ ރާއްޖެއަށް އިތުރު ފްލައިން ސްކޫލެއްގެ ބޭނުން ޖެހިފައިވާ ކަމެވެ.
އެ މަސައްކަތަށް ކުންފުނިތަކެއް ޝައުގުވެރިކަން ފާޅުކޮށްފައި ވާއިރު، އެއް ކުންފުންޏަކީ ގައުމީ އެއާލައިން ހިންގާ އައިލެންޑް އޭވިއޭޝަނެވެ. ދެން އޮތީ ވިލާ އެއާ އެވެ. އަނެއް ކުންފުންޏަކީ މަންޓާ އެއާ އެވެ.
ކުޑަ ދުވަސްކޮޅެއް ތެރޭ ރާއްޖޭގެ އޭވިއޭޝަން ދާއިރާގައި ކުރިއަރައިގަތް މަންޓާ އެއާގެ ޗީފް އޮޕަރޭޓިން އޮފިސަރު މުހައްމަދު ހަލީލް، އެ ކުންފުނިން ހުޅުވަން މަސައްކަތްކުރާ ފްލައިން ސްކޫލާ ގުޅޭ ގޮތުން "އަދަދު" އަށް ވިދާޅުވީ އަންނަ އަހަރުގެ މެދުތެރެއަށް އެ ސްކޫލު ހުޅުވޭތޯ މަސައްކަތް ކުރަމުންދާ ކަމަށެވެ. އެއާއެކު އެ ސްކޫލަކީ ބޮޑު އަަދި ބުރަ މަސައްކަތެއްކަމަށް ހަލީލް ވިދާޅުވި އެވެ.
"ފްލައިން ސްކޫލެއް ހުޅުވުމަކީ އެއްވެސް ހާލެއްގައި ފަސޭހަ ކަމެއް ނޫން. ބައިވަރު ކަންކަން ހުންނާނެތާ އެ މަސައްކަތުގައި. އެގޮތުން ޑޮކިއުމެންޓް ހުށަހެޅުމާއި، އެ މަސައްކަތަށް ބޭނުންވާ އިންވެސްޓްމެންޓްތައް ވެސް. އެކަމަކު ބެލެވޭ އަންނަ އަހަރުގެ މެދު ތެރެއަށް ހުޅުވޭނެ ކަމަށް،" ހަލީލް ވިދާޅުވި އެވެ.
titledesc
މަންޓާއިން ކުޑަހުވަދޫގައި ފްލައިން ސްކޫލެއް ހުޅުވަން މަސައްކަތްކުރަމުން ދާއިރު، އޭއޭއޭގެ ސަބަބުން ބިކަވެފައި 150 އެއްހާ ޕައިލެޓްކަން ކިޔަވަމުންދާ ދަރިވަރުންތަކެއް އެބަ ތިއްބެވެ. ހަޔާ އެޑިއުކޭޝަން މިނިސްޓްރީން ވަނީ މަންޓާ އަދި އައިލެންޑް އޭވިއޭޝަނުން ފަށަން މަސައްކަތްކުރާ ފްލައިން ސްކޫލުން އެ ދަރިވަރުންނަށް ޖާގައެއް ލިބިދާނެކަމުގެ އުއްމީދީ ޖަވާބެއް ދީފަ އެވެ.
އެ ކުދިންގެ ހާލަތާމެދު އަދި މަންޓާއިން ފަށާ ސްކޫލުގައި އެ ދަރިވަރުންނަށް ޖާގައެއް އޮތްތޯ ސުވާލުކުރުމުން ހަލީލް ވިދާޅުވީ، އޭއޭއޭއާއި ދޭތެރޭ އެއްޗެއް ބުނަން ބޭނުންނުވާ ކަމަށެވެ.
"އެހެން ވިޔަފާރިއަކާ ދޭތެރޭ އެއްޗެއް ބުނާކަށް ނެތިން، އެކަމަކު އެ ސްކޫލުގައި ހަމަ ކިޔަވަން އެދޭ ހުރިހާ ދަރިވަރުންނަށް ވެސް ފުރުސަތު އޮންނާނެ،" ހަލީލް ވިދާޅުވި އެވެ.
