ކާބުލް، އަފްގާނިސްތާން (އޮކްޓޯބަރު 4) - މިސްކިތަކަށް ދިން ހަމަލާއެއްގައި ފަސް މީހުން މަރުވިތާ ކުޑަ ވަގުތުކޮޅެއް ފަހުން، ކާބުލްގައި އުޅޭ އިސްލާމިކް ސްޓޭޓް (އައިއެސް) ސެލް ރޫޅާލާފައިވާ ކަމަށް ތާލިބާނުން ބުނެފި އެވެ.
ތާލިބާނުންގެ ތަރުޖަމާނު ޒަބީހުﷲ މުޖާހިދު ބުނީ އައިއެސްގެ ސެލް ރޫޅާލުމަށް ހަނގުރާމަވެރިން ކާބުލްގެ އުތުރުގައި އޮޕަރޭޝަނެއް ހިންގީ އާދީއްތަ ދުވަހުގެ ރޭ ކަމަށެވެ.
"ކާމިޔާބުކަމާ އެކު ހިންގި އޮޕަރޭޝަނުގެ ނަތީޖާއެއްގެ ގޮތުން، އައިއެސްގެ ސެންޓަރު މުޅިން ސުންނާފަތިކޮށްލެވުނު އަދި އެ ތަނުގައި ތިބި އައިއެސްގެ ހުރިހާ މެމްބަރުން މަރުވި،" ޓްވިޓާގައި މުޖާހިދު ބުންޏެވެ.
އޮޕަރޭޝަން ހިންގި ވަގުތު ނޫސްވެރިންނަށް ވަނީ ކާބުލްގައި ގޮވުންތައް ގޮވައި، ބަޑި ޖަހާ އަޑު އިވިފަ އެވެ. ސޯޝަލް މީޑިއާގައި ދައުރުވަމުންދާ ފޮޓޯތަކުން ފެންނަނީ ބޮޑު ގޮވުމަކަށް ފަހު އަލިފާން ރޯވެފައި ވަނިކޮށެވެ.
ތާލިބާނުންގެ އޮޕަރޭޝަން ހިންގުމުގެ ކުރިން އައިއެސް އިން ވަނީ މިސްކިތަކަށް ހަމަލާ ދީފަ އެވެ. އީދް ގަހް މިސްކިތަށް ހަމަލާ ދިނީ މިދިޔަ ހަފުތާގައި މަރުވި ތާލިބާނުންގެ ތަރުޖަމާނު މުޖާހިދުގެ މަންމަގެ ހަނދާނުގެ ހާއްސަ އަޅުކަމެއް ކުރިއަށް ދަނިކޮށެވެ.
އޮފިޝަލަކު ބުނީ އެ ހަމަލާގައި ފަސް މީހަކު މަރުވެ، 11 މީހަކަށް ޒަހަމްވި ކަމަށެވެ. މަރުވި މީހުންގެ ތެރޭގައި އާއްމުންނާއި ތާލިބާން މެމްބަރުން ވެސް ހިމެނެ އެވެ. އެ ހަމަލާއާ ގުޅިގެން ތިން މީހަކު ވަނީ ހައްޔަރުކޮށްފަ އެވެ.
ތާލިބާނާއި އަފްގާނިސްތާނުގެ އައިއެސް އަކީ ސުންނީ ހަނގުރާމަވެރި ދެ ގްރޫޕެވެ. ނަމަވެސް ދީނީ ކަންކަމާއި އަސްކަރީ ސްޓްރެޓެޖީގައި ވެސް ދެ ގްރޫޕުގެ ވިސްނުން ތަފާތެވެ. މިހާތަނަށް ތާލިބާނާއި އައިއެސްއާ ދެމެދު ދެ ހަނގުރާމަކޮށްފައި ވެ އެވެ.
