ޓޫރިޒަމް ދުވަހުގެ މުނާސަބަތުގައި ފެށި ޖެޓް ސްކީ ޓުއާ ކާމިޔާބުކަމާ އެކު ނިންމާލައިފި އެވެ.
ރާއްޖޭގެ އެންމެ އުތުރުން ހއ. ތުރާކުނުން ޖެޓް ސްކީގައި ދަތުރު ފެށީ ސެޕްޓެމްބަރު 21 ގައެވެ. ރާއްޖޭގެ އެންމެ ދެކުނުން "ސަދަން މޯސްޓް ޕޮއިންޓް" އަށް ދަތުރުކޮށް، ޖެޓް ސްކީ ޓުއާ ނިންމާނީ އިއްޔެ އެވެ.
މޯލްޑިވްސް ވޯޓާ ސްޕޯޓްސް އެސޯސިއޭޝަނުން އިންތިޒާމުކުރި މި ޓުއާގައި ރާއްޖޭގެ ހުރިހާ އަތޮޅަކަށް ދަތުރުކުރި އެވެ. އަދި ދަތުރުގެ ބައިވެރިން ވަނީ ކޮންމެ އަތޮޅަކުން އެއް ރަށުގައި މަޑު ކޮށްފަ އެވެ.
ޖެޓް ސްކީ ޓުއާ 2021 ގައި ރަސްމީކޮށް ދަތުރުކޮށްފައި ވަނީ ހަ ޖެޓް ސްކީ ރައިޑަރުންނެވެ. ނަމަވެސް, ރާއްޖޭގެ އެކި ހިސާބުތަކުން ރައިޑަރުން ވަނީ ޓުއާގައި ބައިވެރިވެފަ އެވެ.
ދެ ހަފުތާގެ މުއްދަތަކަށް ކުރިއަށް ގެންދިޔަ މި ޓުއާގެ ބައިވެރިންނަށް އެންމެ ބޮޑު ގޮންޖެހުމަކަށް ދިމާވީ މޫސުމީ ގޮތުން ކުރިމަތިވި އުނދަގޫތައް ކަމަށް ވޯޓާ ސްޕޯޓްސް އެސޯސިއޭޝަނުން ފާހަގަކުރެ އެވެ. އެގޮތުން ޓުއާ ފަށައިގެން ގަދަ ވަޔާ ވިއްސާރާގައި ބޮޑު ބަޔަކަށް ދަތުރުކުރުމަށް ފަހު މޫސުން ރަނގަޅުވާން ފަށާފައި ވަނީ ލ. އަތޮޅާ ހިސާބުން ކަމަށް ޓުއާގެ ބައިވެރިން ބުނެ އެވެ.
