ދޯހާ، ގަތަރު (އޮކްޓޯބަރު 2) - ގަތަރުގައި ފުރަތަމަ ފަހަރަށް ބާއްވާ މަޖިލިސް އިންތިހާބުގެ ވޯޓުލުން ފަށައިފި އެވެ.
މިއަދު ފަތިހުން ފެށިގެން މެންދުރު ފަހާ ހަމައަށް ވޯޓުލުން ކުރިއަށް ގެންގޮސް، މިރޭގެ ވަގުތެއްގައި ނަތީޖާ އިއުލާނު ކުރާނެ ކަމަށް ބެލެވެ އެވެ.
އެނެލިސްޓުން ބުނާ ގޮތުގައި ގަތަރުގައި ވެރިކަން ކުރާ އާއިލާގެ އަތުން ބާރުތައް ދޫ ނުވާނެ އެވެ. މި އިންތިހާބަކީ ޑިމޮކްރަސީއާ ދިމާލަށް ދިޔުމަށް ހިންގާ ރަމްޒީ ހަރަކާތެއްގެ ގޮތުގައި އެނެލިސްޓުން ސިފަކުރެ އެވެ.
މާ ބޮޑެތި ބާރުތަކެއް ނެތް، ލަފާދޭ ކައުންސިލެއްގެ ގޮތުގައި އޮންނަ މަޖިލީހުގެ 30 ގޮނޑިއަށް 284 ކެންޑިޑޭޓުން ވާދަކުރަމުން ދާއިރު، އޭގެ ތެރެއިން 28 މީހުންނަކީ އަންހެނުންނެވެ.
ލަފާދޭ ކައުންސިލްގައި ޖުމްލަ 45 މެމްބަރުން ހިމެނެ އެވެ. އިންތިހާބުގައި ހުޅުވާލި 30 ގޮނޑިއަށް ވޯޓުން މީހުން ހޮވާއިރު، ބާކީ 15 ގޮނޑި އަށް މީހުން އައްޔަނު ކުރާނީ އަމީރު ޝެއިހް ތަމީމް ބިން ހަމަދް އަލް ސާނީ އެވެ.
ގަތަރުގެ އާބާދީގައި ހިމެނޭ 2.8 މިލިއަން މީހުންގެ ތެރެއިން ގަތަރު ރައްޔިތުންނަކީ 333،000 އެވެ. ނަމަވެސް ވޯޓުލުމުގެ ހައްގު ލިބެނީ ހަމައެކަނި 1930 ވަނަ އަހަރުގެ ކުރިން ގަތަރުގައި އުޅެމުން ދިޔަ އާއިލާތަކަށެވެ. އޭގެ ފަހުން ގަތަރުގެ ރައްޔިތުންނަށްވި މީހުންނަށް ވޯޓުލުމުގެ ހައްގު ނުލިބެ އެވެ.
