ކާބުލް، އަފްގާނިސްތާން (ސެޕްޓެމްބަރު 30) - އަފްގާނިސްތާނުގެ 2،000 އަށް ވުރެ ގިނަ ހެލްތު ފެސިލިޓީތައް ބަންދުކޮށް، ސިއްހީ ނިޒާމު ހުއްޓުމަކަށް އަންނަން ގާތްވެފައިވާ ކަމަށް ރެޑް ކްރޮސްގެ އޮފިޝަލަކު ބުނެފި އެވެ.
އިންޓަނޭޝަނަލް ފެޑެރޭޝަން އޮފް ރެޑް ކްރޮސް އެންޑް ރެޑް ކްރެސެންޓް ސޮސައިޓީޒް (އައިއެފްއާރްސީ) އިން ބުނީ އަފްގާނިސްތާނުގެ ސިއްހީ ނިޒާމު ހުއްޓުމަކަށް އައުމާ ގާތްވެފައި ވަނީ ފަންޑު ނުލިބުމުގެ ސަބަބުން ކަމަށެވެ.
"މުސާރަ ނުލިބި އިތުރު ދުވަސްކޮޅަކަށް މަސައްކަތް ކުރަން މުވައްޒަފުން އެއްބަސްވެދާނެ،" އައިއެފްއާރްސީގެ އޭޝިއާ ޕެސިފިކް ޑިރެކްޓަރު އެލެގްޒެންޑާ މެތިއު ވިދާޅުވި އެވެ.
"އެކަމަކު ބޭސް ހުސްވުމުން، ބޮކިތައް ދިއްލާނެ ކަރަންޓު ލިބުން ހުއްޓުމަކަށް އައުމުން، ކްލިނިކަށް އަންނަ މީހުންނަށް ހިދުމަތް ދެވޭނެ ގޮތެއް ނެތުމުން ދެން ޖެހޭނީ ދޮރުތައް ބަންދު ކުރަން."
ސާޅީސް އަހަރަށް ވުރެ ދިގު މުއްދަތަކަށް އަފްގާނިސްތާނު ދާހިލީ ހަމަނުޖެހުން ދެމިގެން ގޮސްފައި ވާއިރު، އޯގަސްޓު މަހު ތާލިބާނުން ވެރިކަމަށް އައުމާއެކު އިގްތިސާދު ވަނީ ހުއްޓިފަ އެވެ. އެއީ އިގްތިސާދު ބަރޯސާވެފައި އޮތް ބޭރުގެ އެހީތައް މެދުކަނޑާލުމުންނެވެ.
އޭގެ އަސަރު އެންމެ ބޮޑަށް ކޮށްފައި ވަނީ މައިގަނޑު ގޮތެއްގައި އެހީދޭ ޖަމިއްޔާތަކުން ހިންގާ ސިއްހީ ނިޒާމަށެވެ.
"މިހާރު ވެސް 2،000 އަށް ވުރެ ގިނަ ހެލްތު ފެސިލިޓީ ބަންދުކޮށްފި،" އަފްގާނިސްތާނަށް ކުރެއްވި ހަތަރު ދުވަހުގެ ދަތުރެއް ނިންމާލުމުގެ ގޮތުން ދިން ޕްރެސް ކޮންފަރެންސެއްގައި މެތިއު ވިދާޅުވި އެވެ.
ވިހި ހާހަށް ވުރެ ގިނަ ސިއްހީ މަސައްކަތްތެރިން މި ވަގުތު މަސައްކަތް ހުއްޓާލައިގެން ތިބިއިރު، އެއްވެސް މުސާރައެއް ނުލިބި ވެސް ގިނަ ބަޔަކު ދަނީ މަސައްކަތް ކުރަމުންނެވެ. މަސައްކަތް ހުއްޓާލައިގެން ތިބި މީހުންގެ ތެރޭގައި 7،000 އަންހެނުން ހިމެނެ އެވެ.
