އައިއެސް ޖަމާއަތުގެ ރާއްޖޭގެ ލީޑަރު ކަމަށް ދައުލަތުން ތުހުމަތު ކުރާ، ޏ. ފުވައްމުލައް މާދަޑު، ކަރިއްޔާވިލާ، މުހައްމަދު އަމީންގެ ފޮޓޯއެއް, އައިއެސް ލޯގާއެކު މީޑިއާއަކުން ގެނައި ހަބަރެއްގައި ޖެހި މައްސަލަ ސުޕްރީމް ކޯޓުގެ ސަމާލުކަމަށް ގެނައުމުން, އެ ކޯޓުން މީޑިއާތަކުގެ މައްޗަށް އަމުރެއް ނެރެފި އެވެ.
ސުޕްރީމް ކޯޓުގެ ސަމާލުކަމަށް އަމީންގެ ވަކީލް އަހުމަދު ޔާމީން ގެނައީ އެ ކޯޓުގައި އިއްޔެ އޮތް އަޑުއެހުމެއްގައި އަމީން ހުއްޓާ ނަގާފައިވާ ފޮޓޯއެއް އެޑިޓްކޮށް, އެ ފޮޓޯއަށް އައިއެސްގެ ލޯގޯ އާއި ހަތިޔާރު ހިމަނާފައިވާ މައްސަލައެކެވެ.
އެ މީޑިއާގެ ނަން ޔާމީން ވިދާޅެއް ނުވެ އެވެ. ނަމަވެސް, އެނގިފައިވާ ގޮތުގައި އެއީ އިއްޔެ ރާއްޖެއެމްވީގައި ޖެހި ފޮޓޯއެކެވެ. އެ ފޮޓޯ ހިމެނޭ ލިޔުންތައް ވެސް ވަކީލް ޔާމީން މިއަދު ވަނީ ޝަރީއަތަށް ހުށަހަޅުއްވާފަ އެވެ.
ވަކީލް ޔާމީން ވިދާޅުވި ގޮތުގައި މީޑިއާތަކުގައި ވާހަކަ އެގޮތަށް ދެކުމުން ދެރަވެ އެވެ. ނަމަވެސް, ހަބަރުތައް ގެންނަ ގޮތުން ކުޑަ ދަރިންތަކެއް ވެސް ތިބި އަމީންގެ ކަރާމާތް ގެއްލިގެންދާ ކަމަށެވެ. އަދި, އޭނާގެ އަސާސީ ހައްގުތައް ވެސް ގެއްލިގެންދާ ކަމަށެވެ.
ކުށް ސާބިތު ނުވާހާ ހިނދަކު އަމީންއަކީ ވެސް މައުސޫމް މީހެއް ކަމަށާއި އެކަމަކު, މީޑިއާތަކުން ހަބަރުތަކުގެ ސުރުހީތައް ގެންނަނީ އޭނާއަކީ ވަކި ކުށެއް ކޮށްފައިވާ މީހެއްގެ ގޮތަށް ކަމަށް ވިދާޅުވެ, ޔާމީން ކަންބޮޑުވުން ފާޅު ކުރެއްވި އެވެ.
އެ ޝަކުވާއާ ގުޅިގެން މައްސަލަ ބައްލަވާ ތިން ފަނޑިޔާރުން މިއަދު ނެރުއްވި އަމުރުގައި ބުނީ ކޯޓަކުން މީހެއްގެ މައްޗަށް ކުށް ސާބިތުވެއްޖެ ކަމަށް ކަނޑަނާޅާހާ ހިނދަކު އޭނާއަކީ މައުސޫމް މީހެއް ކަމަށް ބެލުމުގެ ހައްގު ކޮންމެ މީހަކަށް ވެސް އޮންނާނެ ކަމަށެވެ.
މި މައްސަލާގައި އަމީންގެ ހަބަރުތައް ގެންނަ ފަރާތްތަކާއި ހިޔާލު ފާޅު ކުރާ ފަރާތްތަކުން ވެސް އަމީންގެ އެ ހައްގަށް އުނިކަން ލިބޭ ކަމަށް އަމަލު ކުރަމުންދާނަމަ, އެއީ ކޯޓުގެ ހުރުމަތް ކެނޑުމުގެ އަމަލެއްގެ ގޮތުގައި ބަލާނެ ކަމަށް އަމުރުގައިވެ އެވެ. އަދި, އެކަން ކޮށްފިނަަމަ ފިޔަވަޅު އަޅާނެކަން ވެސް އަމުރުގައި އެންގި އެވެ.
