އައިއެސް ޖަމާއަތުގެ ރާއްޖޭގެ ލީޑަރު ކަމަށް ދައުލަތުން ތުހުމަތު ކުރާ، ޏ. ފުވައްމުލައް މާދަޑު، ކަރިއްޔާވިލާ، މުހައްމަދު އަމީންގެ ފޮޓޯއެއް, އައިއެސް ލޯގާއެކު މީޑިއާއަކުން ގެނައި ހަބަރެއްގައި ޖެހި މައްސަލަ ސުޕްރީމް ކޯޓުގެ ސަމާލުކަމަށް ގެނެސްފި އެވެ.
ސުޕްރީމް ކޯޓުގެ ސަމާލުކަމަށް އަމީންގެ ވަކީލް އަހުމަދު ޔާމީން ގެނައީ އެ ކޯޓުގައި އިއްޔެ އޮތް އަޑުއެހުމެއްގައި އަމީން ހުއްޓާ ނަގާފައިވާ ފޮޓޯއެއް އެޑިޓްކޮށް, އެ ފޮޓޯއަށް އައިއެސްގެ ލޯގޯ އާއި ހަތިޔާރު ހިމަނާފައިވާ މައްސަލައެކެވެ.
އެ މީޑިއާގެ ނަން ޔާމީން ވިދާޅެއް ނުވެ އެވެ. ނަމަވެސް, އެނގިފައިވާ ގޮތުގައި އެއީ އިއްޔެ ރާއްޖެއެމްވީގައި ޖެހި ފޮޓޯއެކެވެ. އެ ފޮޓޯ ހިމެނޭ ލިޔުންތައް ވެސް ވަކީލް ޔާމީން މިއަދު ވަނީ ޝަރީއަތަށް ހުށަހަޅުއްވާފަ އެވެ.
ވަކީލް ޔާމީން ވިދާޅުވި ގޮތުގައި މީޑިއާތަކުގައި ވާހަކަ އެގޮތަށް ދެކުމުން ދެރަވެ އެވެ. ނަމަވެސް, ހަބަރުތައް ގެންނަ ގޮތުން ކުޑަ ދަރިންތަކެއް ވެސް ތިބި އަމީންގެ ކަރާމާތް ގެއްލިގެންދާ ކަމަށެވެ. އަދި, އޭނާގެ އަސާސީ ހައްގުތައް ވެސް ގެއްލިގެންދާ ކަމަށެވެ.
ކުށް ސާބިތު ނުވާހާ ހިނދަކު އަމީންއަކީ ވެސް މައުސޫމް މީހެއް ކަމަށާއި އެކަމަކު, މީޑިއާތަކުން ހަބަރުތަކުގެ ސުރުހީތައް ގެންނަނީ އޭނާއަކީ ވަކި ކުށެއް ކޮށްފައިވާ މީހެއްގެ ގޮތަށް ކަމަށް ވިދާޅުވެ, ޔާމީން ކަންބޮޑުވުން ފާޅު ކުރެއްވި އެވެ.
އެކަން ކުރިމިނަލް ކޯޓުގައި ވެސް ފާހަގަ ކުރިކަން ޔާމީން ވިދާޅުވި އެވެ. އަދި, އެގޮތަށް ހަބަރުތައް ނުގެންނަން މައްސަލަ ބެއްލެވި އެ ކޯޓުގެ އިސްގާޒީ އަހުމަދު ޝަކީލް އިލްތިމާސް ކުރެއްވިކަން ވެސް ޔާމީން ފާހަގަ ކުރެއްވި އެވެ.
ނަމަވެސް, އަމީންގެ މައްޗަށް އޮތް ދައުވާތައް ބާތިލްވުމުން ވެސް އޭނާއާ ގުޅޭ ގޮތުން ހަބަރުތައް މީޑިއާއިން ގެނައީ ކަންބޮޑުވާ ގޮތަކަށް ކަމަށް ޔާމީން ވިދާޅުވި އެވެ.
މިކަމާ ގުޅިގެން ޕްރޮސިކިއުޓާ ޖެނަރަލް ހުސެއިން ޝަމީމް ވިދާޅުވީ ދަންނަވާނެ އެއްޗެއް ނެތް ކަމަށެވެ. އުއްތަމަ ފަނޑިޔާރު މުހުތަސިމް އަދުނާން ވިދާޅުވި ގޮތުގައި, އެކަމާ ގުޅިގެން ފަނޑިޔާރުން މަޝްވަރާ ކުރެއްވުމަށްފަހު މިއަދު ގޮތެއް ނިންމަވާނެ އެވެ.
