ކުރީގެ ޓޫރިޒަމް މިނިސްޓަރު އަލީ ވަހީދަކީ މިހާރު ފިލައިގެން އުޅޭ މީހެއް ކަމާއި އެހެންވެ އޭނާ ރާއްޖެ ގެނައުމަށް މަގު ފަހިކުރުމުގެ ޕާސްޕޯޓް ހިފަހައްޓަން އަނެއްކާވެސް ޕްރޮސެކިއުޓާ ޖެނަރަލްގެ (ޕީޖީ) އޮފީހުން ކޯޓަށް ގޮސްފި އެވެ.
މިއީ އަލީ ވަހީދުގެ ޕާސްޕޯޓް މައްސަލާގައި ޕްރޮސިކިއުޓާ ޖެނަރަލުން ކޯޓުތަކަށް ދާ ތިންވަނަ ފަހަރެވެ.
އަލީ ވަހީދުގެ ޕާސްޕޯޓްގެ ފަސްފަހަތް
އަލީ ވަހީދުގެ މައްސަލާގައި އެންމެ ފުރަތަމަ ވެސް ކްރިމިނަލް ކޯޓުގެ އަމުރެއްގެ ދަށުން އަލީ ވަހީދުގެ ޕާސްޕޯޓް ހިފެހެއްޓި އެވެ. ނަމަވެސް، އަލީ ވަހީދު ބޭސްފަރުވާއަށް ރާއްޖޭން ބޭރަށް ދިޔުމުގެ ހުއްދަދީ، ކުރިމިނަލް ކޯޓުން އެ އަމުރު ފަހުން ބާތިލުކުރި އެވެ.
އޭގެފަހުން ވެސް އަލީ ވަހީދު ރާއްޖެ ވަޑައިގެންފައިނުވާތީ ފުލުހުން މެދުވެރިކޮށް އަލީ ވަހީދުގެ ޕާސްޕޯޓް އަލުން ހިފެހެއްޓުމަށް ޕްރޮސިކިއުޓާ ޖެނަރަލްގެ އޮފީހުން އެދުނެވެ. ނަމަވެސް، އެ އަމުރު ނެރެދޭނެ ތަނެއް ނެތް ކަމަށް ކުރިމިނަލް ކޯޓުން ނިންމުމުން މައްސަލަ ހައިކޯޓުގައި އިސްތިއުނާފުކުރި އެވެ.
ޕްރޮސިކިއުޓާ ޖެނަރަލްގެ އޮފީހުން ހުށަހެޅި އެ މައްސަލަ ބަލައިނުގަތުމަށް ހައިކޯޓު އޭރު ނިންމި އެވެ. އެއީ އަލީ ވަހީދުގެ ޣައިރު ހާޒިރުގައި މައްސަލަ ނުގެންދެވޭނެ ކަމަށް ބުނެ އެވެ. ހައިކޯޓުގެ އެ ނިންމުން ސުޕްރީމް ކޯޓުގައި ދައުލަތުން އިސްތިއުނާފުކުރުމުން, އެ ކޯޓުން ވަނީ އެ މައްސަލައަކީ ހައިކޯޓުން ބަލަން ޖެހޭ މައްސަލައެއް ކަމަށް ކަނޑައަޅައި, އެކަމަށް އަމުރުކޮށްފަ އެވެ.
ނަމަވެސް, ހައިކޯޓުން މައްސަލަ އަލުން ބެލުމުން ފާހަގަވީ ޕްރޮސިކިއުޓާ ޖެނަރަލްގެ ފަރާތުން ހިފަހައްޓަން އެދިފައިވަނީ ޓޫރިޒަމް މިނިސްޓަރުގެ ހައިސިއްޔަތުން އަލީ ވަހީދުގެ އަތުގައި އޮތް ޑިޕްލޮމެޓިކް ޕާސްޕޯޓް ކަމެވެ. އެއީ މިހާރު ކެންސަލްކޮށްފައިވާ ޕާސްޕޯޓަކަށްވާތީ އެ ހިފަހައްޓަން އަމުރު ނެރެގެން ނުކުންނާނެ ނަތީޖާއެއް ނޯންނާނެ ކަމަށް ހައިކޯޓުން ކަނޑައެޅި އެވެ.
ނަމަވެސް, އެ އަމުރު ނެރެނުދޭން ކުރިމިނަލް ކޯޓުން ދެއްކި ސަބަބުތައް ގޯސްކޮށް ކަމަށް ކަނޑައެޅި ހައިކޯޓުން އޮތީ ނިންމާފަ އެވެ.
މިފަހަރު އެދުނީ އޯޑިނަރީ ޕާސްޕޯޓް ހިފަހައްޓަން, ކުރިމިނަލް ކޯޓުން ނެރެނުދިން
ހައިކޯޓުން އެގޮތަށް ހުކުމް ކުރުމުން ޕްރޮސިކިއުޓާ ޖެނަރަލްގެ އޮފީހުން ވަނީ އަލީ ވަހީދުގެ އަތުގައި މިހާރު އޮތް އޯޑިނަރީ ޕާސްޕޯޓް ނުވަތަ ޓްރެވެލް ޑޮކިއުމެންޓްރީ ހިފަހައްޓަން ކުރިމިނަލް ކޯޓަށް ހުށަހަޅާފަ އެވެ. ނަމަވެސް, އެ ކޯޓުން ނިންމާފައިވަނީ އަލީ ވަހީދު މިހާރު ރާއްޖޭގައި ނެތުމުން އެ އަމުރު ނެރޭނެ ސަބަބެއް ނެތް ކަމަށެވެ.
އެހެންވެ, މައްސަލަ ހައިކޯޓަށް ވަނީ ގެނެސްފަ އެވެ. މިއަދު އެ މައްސަލާގެ އަޑުއެހުން ހައިކޯޓުގައި ބޭއްވި އެވެ.
އެ އަޑުއެހުމުގައި ދައުލަތުގެ ވަކީލް ވިދާޅުވި ގޮތުގައި, އަލީ ވަހީދުގެ ޕާސްޕޯޓް ހިފަހައްޓަން ޖެހޭ ސަބަބުތައް އެބަ ހުއްޓެވެ. އެގޮތުން, ތުހުމަތުވާ މިންވަރަށް އޭނާގެ މައްޗަށް ހެކި އެބަހުރި ކަމާއި އޭނާއަކީ މީގެކުރިން ވެސް ފިލައިގެން އުޅުނު މީހެއް ކަމަށެވެ. އަދި, އޭނާ ފިލައިގެން ދާން އުޅޭ ކަމަށް ބަޔާން ކުރާ އިންޓެލް ރިޕޯޓެއް ވެސް އޮތްކަން ވަކީލް ފާހަގަ ކުރެއްވި އެވެ.
ވަކީލް ވިދާޅުވީ އަލީ ވަހީދަކީ ސިޔާސީ މީހެއް ކަމުން އޭނާގެ ނުފޫޒުތައް ވެސް އޮންނާނެ ކަމަށެވެ. އަދި, ކުރެވޭ ތުހުމަތުތަކަށް ކުރިމަތިލާން އޭނާ ފަސް ޖެހޭނެ ކަމަށް ބުއްދީ ހަމައިން ވިސްނޭ ކަމަށެވެ. މީހަކު ޖާމިނުކޮށްފައި ބޭރަށް ދިޔަ ނަމަވެސް, އެއްވެސް ކޯޓަކަށް އޭގެ ފަހުން އޭނާ ހާޒިރު ކުރެވިފައިނުވާކަން ވެސް ވަކީލް ފާހަގަ ކުރެއްވި އެވެ.
އޭނާ ވިދާޅުވި ގޮތުގައި އަލީ ވަހީދު ބޭނުން ނުވާ ގޮތަށް ޝަރީއަތްތައް ނުހިންގެ އެވެ. އޭނާ ހަމައެކަނި ހާޒިރު ވަނީ އޭނާ ބޭނުންވާ ގޮތަށް އޮންލައިންކޮށް ޝަރީއަތް ކުރިއަށް ގެންދާ ކްރިމިނަލް ކޯޓަށް ކަމަށެވެ. މީގެކުރިން އެތައް ފަހަރަކު ހައިކޯޓާއި ސުޕްރީމް ކޯޓަށް ހާޒިރުވާން އެންގުމުން ހާޒިރުވެފައި ނެތް ކަމަށް ވަކީލް ވިދާޅުވި އެވެ.
އެހެންވެ, އޭނާއަކީ ފިލައިގެން އުޅޭ މީހެއް ކަމާއި އޭނާގެ ޕާސްޕޯޓް ހިފަހައްޓައިގެން ރާއްޖެ ގެނައުން މުހިންމު ކަމަށް ވަކީލް ވިދާޅުވި އެވެ.
އަޑުއެހުމުގައި ފަނޑިޔާރުންގެ ގިނަ ސުވާލުތަކެއް ވެސް ދައުލަތާ އަމާޒުކުރި އެވެ. މައިގަނޑު ސުވާލަކަށްވީ ރާއްޖޭން ބޭރުގައި ހުރި މީހެއްގެ ޕާސްޕޯޓް ހިފެހެއްޓިދާނެތޯ އާއި އޭގެން ނަތީޖާއެއް ނުކުމެދާނެ ކަމާމެދު އެވެ.
ޖަވާބު ދެއްވަމުން ދައުލަތުގެ ވަކީލް ވިދާޅުވީ ރާއްޖޭން ބޭރުގައި ހުއްޓަސް ޕާސްޕޯޓް ހިފަހައްޓަން ގާނޫނީ ހުރަހެއް ނެތް ކަމަށެވެ. އަދި އެކަމުގެ ސަބަބުން އޭނާ ރާއްޖެ ގެނައުމަށް މަގު ފަހިވެގެންދާނެ ކަމަށް ވަކީލް ވިދާޅުވި އެވެ.
އޭނާ ވިދާޅުވި ގޮތުގައި, ޕާސްޕޯޓް ހިފެހެއްޓުމުން އޭނާގެ ވިސާ ވެސް ކެންސަލް ވާނެ އެވެ. އެހެންވީއިރު, ގައުމެއްގެ ހިމާޔަތް ނެތްނަމަ, އޭނާއަށް ދާއިމީކޮށް އެ ގައުމެއް ނޫޅެވޭނެ ކަމަށާއި އެނބުރި ގައުމަށް އަންނަން މަޖުބޫރުވާނެކަން ވަކީލް ފާހަގަ ކުރެއްވި އެވެ.
އެގޮތަށް ވެސް އަލީ ވަހީދު ރާއްޖެ ގެނެސް, އޭނާގެ މައްޗަށް ޝަރީއަތް ހިންގުން މުހިންމު ކަމަށް ވަކީލް ވިދާޅުވެ, ޕާސްޕޯޓް ހިފަހައްޓަން އަމުރު ނެރެދިނުމަށް އެދުނެވެ.
މި މައްސަލާގައި ދެން އޮންނާނީ ހުކުމް އިއްވުމުގެ އަޑުއެހުމެވެ. މައްސަލަ ބައްލަވަނީ ފަނޑިޔާރު ހަސަން ޝަފީއު އާއި ފަނޑިޔާރު މުހައްމަދު ފައިސަލް އަދި ފަނޑިޔާރު ހުސެއިން މަޒީދެވެ.
އަސްއަދަށް ފިޔަވަޅު އަޅަން ވަނީ އެދިފައި
ފަނޑިޔާރުން ވަނީ އަލީ ވަހީދަށް ޖާމިނުވި ޔޫތު މިނިސްޓްރީގެ ސްޓޭޓް މިނިސްޓަރު އަސްއަދު އަލީއާމެދު ފިޔަވަޅު އެޅިތޯ ވެސް ސުވާލުކޮށްފަ އެވެ.
ވަކީލް ވިދާޅުވީ އޭނާއާމެދު ފިޔަވަޅު އެޅުމުގެ ބާރު އޮތީ ކޯޓަށް ކަމަށާއި ޖާމިނު އެއްބަސްވުމުގެ މުއްދަތު ހަމަވުމުން ވެސް އަލީ ވަހީދު ރާއްޖެ ނައުމުން އަސްއަދަށް ފިޔަވަޅު އަޅައިދޭން ކުރިމިނަލް ކޯޓުގައި އެދުނު ކަމަށެވެ.
އެއް އަހަރު ދުވަހުގެ ޖަލު ހުކުމެއް އިއްވައިދޭން އެދުނު ނަމަވެސް, އެކަމާ ގުޅޭ ގޮތުން ކުރިމިނަލް ކޯޓުން ގޮތެއް ނިންމާފައެއް ނުވެ އެވެ.
މީގެކުރިން ހައިކޯޓުން ވެސް ވަނީ އަސްއަދާމެދު ފިޔަވަޅު އަަޅަން ޖެހޭ ކަމަށް ބުނެފަ އެވެ.
