ކާބުލް، އަފްގާނިސްތާން (ސެޕްޓެމްބަރު 30) - އަންހެނުންގެ ހައްގުތަކަށް ގޮވާލައި ބުރާސްފަތު ދުވަހު ކާބުލްގައި ބޭއްވި ކުޑަ މުރާހަރާއެއް ރޫޅާލަން ތާލިބާނުން ބަޑި ޖަހައިފި އެވެ.
އިރުމަތީ ކާބުލްގައި ހުންނ ހައި ސްކޫލެއްގެ ބޭރުގައި މުޒާހަރާ ކުރި ހަ އަންހެން މީހުން ޑިމާންޑު ކުރަމުން ދިޔެއީ ސެކަންޑަރީ ސްކޫލުތަކުގައި އަންހެން ކުދިންގެ ކިޔެވުން އަލުން ފެށުމަށެވެ.
އަންހެން ކުދިންގެ ހައި ސްކޫލުތައް ހުޅުވަން ތާލިބާނުން ހުއްދަ ދީފައެއް ނުވެ އެވެ. ނަމަވެސް ސެޕްޓެމްބަރު މަހުގެ ކުރީކޮޅު ފިރިހެން ކުދިންގެ ހައި ސްކޫލުތައް ވަނީ ހުޅުވާފަ އެވެ.
"އަހަރުމެންގެ ގަލަންތައް ބިންދާ ނުލާ، އަހަރުމެންގެ ފޮތްތައް އަންދާ ނުލާ، އަހަރުމެންގެ ސްކޫލުތައް ބަންދު ނުކުރޭ" ޖަހާފައި ހުރި ބެނާއެއް ހިފައިގެން އެ މީހުން އުޅެން ފެށުމުން ތާލިބާން ގާޑުން ވަނީ އެ ބެނާ ޖަހައި ގަނެފަ އެވެ.
މުޒާހަރާގައި ބައިވެރިވި ތިން އަންހެނަކު އެ ތަނުން ދާން ދެކޮޅު ހެދުމުން އެ މީހުން ފަހަތަށް ޖައްސާ ހެދި އެވެ. އެ ތަނުގައި ހުރި ބޭރު ނޫސްވެރިއެއްގެ ގައިގައި ބަޑިން ޖަހައި، ވީޑިއޯ ކުރުން ހުއްޓުވި އެވެ.
އޭގެ އިތުރުން ހަނގުރާމަވެރިއަކު އޮޓޮމެޓިކް ބަޑިއަކުން ވައިގެ ތެރެއަށް ބަޑި ޖަހަމުން ދިޔަ މަންޒަރު ވެސް ނޫސްވެރިންނަށް ފެނިފައި ވެ އެވެ.
"ސްޕޮންޓެނިއަން މޫވްމަންޓް އޮފް އަފްގާން ވިމެން އެކްޓިވިސްޓްސް" ގްރޫޕުގައި ހިމެނޭ މުޒާހަރާ ކުރި އަންހެން މީހުން ސަލާމަތް ވާން ވަނީ ސްކޫލުގެ ތެރެއަށެވެ.
ތާލިބާން ގާޑު މައުލާވީ ނަސްރަތުﷲ ބުނީ މުޒާހަރާ ކުރަމުން ދިޔަ މީހުން ގާޑުންނަށް އެއްބާރުލުން ނުދިން ކަމަށާއި ހަރުކަށި ވާން ޖެހުނީ އެހެންވެ ކަމަށެވެ.
"އެހެން ހުރިހާ ގައުމަކާ އެއް ގޮތަށް މި ގައުމުގައި ވެސް މުޒާހަރާ ކުރުމުގެ ހައްގު އެބަ އޮތް. އެކަމަކު މުޒާހަރާ ކުރުމުގެ ކުރިން ގާޑުންނަށް އަންގަން ޖެހޭނެ،" އޭނާ ބުންޏެވެ.
މިދިޔަ އޯގަސްޓު މަހު ތާލިބާނުން ވެރިކަމަށް އައުމާއެކު އަފްގާނިސްތާނުގެ އެކި ކަންކޮޅުތަކުގައި އަންހެނުންގެ އިސް ނަގައިގެން ވަކިވަކި މުޒާހަރާތައް ބޭއްވި އެވެ.
ހިރާތު ސިޓީގައި ބޭއްވި މުޒާހަރާގެ ތެރެއިން ތާލިބާނުން ދެ މީހެއްގެ ގަޔަށް ބަޑި ޖަހައި މަރާލި އެވެ. ނަމަވެސް ހުއްދަ ނެތި އެއްވާ ނަމަ ހަރުކަށި ފިޔަވަޅު އަޅާނެ ކަމަށް ސަރުކާރުން އެންގުމުން، މުޒާހަރާތައް ބޭއްވުން ވަނީ މަދުވެފަ އެވެ.
