ރާއްޖޭގެ 200 އަށް ވުރެ ގިނަ ސްކޫލްތަކުގައި މަސައްކަތް ކުރަމުންދާ ސަޕޯޓް ސްޓާފުންނަށް ބޭނުންވާ ޕާސަނަލް ޕްރޮޓެކްޝަން އިކުއިޕްމެންޓް (ޕީޕީއީ) ހޯދަން އެޑިއުކޭޝަން މިނިސްޓްރީން އިއުލާންކޮށްފި އެވެ.
އެޑިޔުކޭޝަން މިނިސްޓްރީން ކުރި އިއުލާނެއްގައި ބުނީ ޖުމްލަ 212 ސްކޫލަކަށް 1،500 ޕީޕީއީ ފޯރުކޮށްދޭން ޝައުގުވެރިވާ ފަރާތްތަކަށް ބިޑަށް ހުށަހަޅަން މިއަދުން ފެށިގެން ހުޅުވާލައިފަ އެވެ.
އަންނަ ނޮވެމްބަރު މަހުގެ 10 ވަނަ ދުވަހާ ހަމައަށް ބިޑު ހުށެހެޅޭއިރު، ބިޑް ސެކިއުރިޓީގެ ގޮތުގައި 30,000 ރުފިޔާ (1،945 ޑޮލަރު) ހުށަހަޅަން ޖެހެ އެވެ.
އެ އިއުލާނާ ގުޅޭގޮތުން، އެޑިއުކޭޝަން މިނިސްޓްރީގެ މީޑިޔާ އޮފިޝަލް މި ނޫހާ ވާހަކަ ދައްކަމުން ބުނީ ޕީޕީއީ ބޭނުންވަނީ ސްކޫލްތަކުގައި މަސައްކަތްކުރާ ސަޕޯޓް ސްޓާފުންނަށް އެކަނި ކަމަށެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ކަނޑައަޅާފައިވާ އުސޫލާ އެއްގޮތަށް ސްކޫލްތަކުގެ ކޮންމެ ޝެޝަނެއް ނިމުމުން ކްލާސްތައް ޑިސްއިންފެކްޓް ކުރާއިރު، މުވައްޒަފުން ޕީޕީއިން އަޅަން ޖެހޭނެ ކަމަށް މީޑިއާ އޮފިޝަލު ބުންޏެވެ. އަދި ފާހަނާތައް ސާފުކުރާއިރު ވެސް ޕީޕީއީ އެޅުން ލާޒިމު ކަމަށް އޭނާ ބުންޏެވެ.
އޭގެ އިތުރުން، ސްކޫލްގައި ހުއްޓައި، ހުން އައިސްގެން ކުއްޖަކު އައިސޮލޭޝަން ރޫމާ ހަމައަށް ވެސް ގެންދެވޭނީ ޕީޕީއީ އަޅައިގެން ކަމަށެވެ.
މި ތަކެތި ފޯރުކޮށްދޭނެ ފަރާތެއް ހޮވުމުގައި އަމަލުކުރެވޭނީ ވާލްޑް ބޭންކުގެ އުސޫލް ކަމަށް އެޑިއުކޭޝަނުން ބުނެ އެވެ.
