މިދިޔަ އަންގާރަ ދުވަހު އުތުރު ކޮރެއާގެ އިރުމަތީ އައްސޭރިފަށުން ފޮނުވާލި މިސައިލަކީ މުޅިން އަލަށް އުފެއްދި ހައިޕާސޮނިކް މިސައިލެއް ކަމަށް އެ ގައުމުގެ ދައުލަތުގެ މީޑިއާ، ކޭސީއެންއޭ އިން ރިޕޯޓުކޮށްފި އެވެ.
ދެކުނު ކޮރެއާގެ އަސްކަރިއްޔާ އިން ބުނީ އުތުރު ކޮރެއާގެ މިސައިލް ފޮނުވާލީ އިރުމަތީ އައްސޭރިފަށުން ކަނޑާ ދިމާލަށް ކަމަށެވެ. މިސައިލް ޓެސްޓު ކުރުމަށް ފަހު އުތުރު ކޮރެއާ އިން ބުނީ ހަތިޔާރު ޓެސްޓު ކުރުމުގެ ހައްގު އެ ގައުމަށް ލިބިގެންވާ ކަމަށެވެ.
ކޭސީއެންއޭ އިން ރިޕޯޓު ކުރި ގޮތުގައި މުޅިން އަލަށް އުފެއްދި ހައިޕާސޮނިކް މިސައިލް ސިސްޓަމާއެކު އުތުރު ކޮރެއާގެ ދިފާއީ ބާރު ވަރުގަދަ ވާނެ އެވެ. އުތުރު ކޮރެއާގެ ލީޑަރު ކިމް ޖޮންގް އުން މިސައިލް ޓެސްޓު ކުރިއިރު އިންސްޕެކްޓު ނުކުރައްވާ ކަމަށް އެ ނޫހުން ބުންޏެވެ.
"ފުރަތަމަ ޓެސްޓު ލޯންޗުގައި ގައުމީ ދިފާއީ ސައިންޓިސްޓުން ވަނީ މިސައިލު ދަތުރު ކުރާ ގޮތް ކޮންޓްރޯލް ކުރުން ފަދަ ކަންކަން ކަށަވަރުކޮށްފައި،" އެ ނޫހުން ބުންޏެވެ. ހްވަސޮންގް-8 ގެ ނަން ދީފައިވާ މިސައިލް ފުރިހަމަ އަށް މަސައްކަތް ކުރި ކަމަށް ވެސް ނޫހުން ރިޕޯޓުކުރި އެވެ.
އުތުރު ކޮރެއާ އާއި ދެކުނު ކޮރެއާގެ ހަތިޔާރުގެ ވާދަވެރިކަމުގެ ތެރެއިން ސެޕްޓެމްބަރު 15 ވަނަ ދުވަހު އެ ދެ ގައުމުން ވެސް ބެލިސްޓިކް މިސައިލް ޓެސްޓު ކުރި އެވެ. އެ ދެ ގައުމުގެ ދެމެދުގައި ކުރި ހަނގުރާމަ ރަސްމީކޮށް ނިމުމަކަށް ގެނެސްފައި ނުވާތީ، ހަތިޔާރުގެ ވާދަވެރިކަން ވެސް ވަރަށް ބޮޑަށް އޮވެ އެވެ.
