އއ. މަތިވެރީގައި ތިބީ ޓެރަރިސްޓުން ކަމަށް ބުނެ އެ ރަށުން މީހުން ބާލަން ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު ގޮވާލެއްވުމުން، އޭނާއާމެދު ގާނޫނީ ފިޔަވަޅު އެޅުމަށް އެ ދާއިރާގެ މެމްބަރު ހަސަން ޒަރީރު މިއަދު މަޖިލީހުގައި ގޮވާލައްވައިފި އެވެ.
މިދިޔަ ހަފްތާގެ ތެރޭގައި ޖާބިރު މަތިވެރިއަށް ވަޑައިގެންނެވުމުން، އެ ރަށު ރައްޔިތުން ނުކުމެ އަޑުއުފުލީ، އޭނާ އެ ރަށުގައި ހިންގާ ގެސްޓްހައުސަށް ދައްކަންޖެހޭ ފައިސާ ނުދައްކާތީ ހިތްހަމަނުޖެހުން ބޮޑުވެގެންނެވެ.
ކައުންސިލްގެ ބެލުމުގެ ދަށުގައި އޮންނަ އެ ބިމުގެ ކުލީގެ ގޮތުގައި ޖާބިރު 4.7 މިލިއަން ރުފިޔާ ދައްކަން އެބައޮތް ކަމަށް މަތިވެރީ ރައްޔިތުން ބުނެ އެވެ. ތުހުމަތު ކުރާ ގޮތުގައި 2017 ވަނަ އަހަރުން ފެށިގެން އެ ބިމަށް ކުލި ނުދައްކަ އެވެ.
މިފަހުން ޖާބިރު މަތިވެރި ކައުންސިލް ރައީސްއަށް އިންޒާރުތަކެއް ދިނުމަށް ފަހު ހުތުރުބަހުން މުއާމަލާތު ކުރައްވާ އޯޑިޔޯއެއް ވެސް އާންމުވެފައިވެ އެވެ. އެ ރަށަށް ޖާބިރު ވަޑައިގެންނެވުމުން ހަމަނުޖެހުން ހިނގީ އެ އޯޑިޔޯ ލީކްވުމަށްފަހު އެވެ.
މަތިވެރީ ރައްޔިތުންގެ ތެރެއިން ބަޔަކު ޖާބިރާ ދެކޮޅަށް އަޑުއުފުލައި، އޭނާއަށް ހަމަލާ ދިނުމުން ޖާބިރު އެންމެ ފުރަތަމަ ވަޑައިގެން ހިމާޔަތް ހޯއްދެވީ ޕޮލިސް ސްޓޭޝަނުންނެވެ.
ފަހުން އެސްއޯ ފުލުހުންގެ ފައުޖެއްވެސް ވަނީ އެ ރަށަށް އަރާ މެމްބަރަށާއި އާއިލާއަށް ހިމާޔަތް ދީފަ އެވެ. ޖާބިރާއެކު އޭނާ ބޭފުޅެއް ވެސް އެ ރަށުގައި ހުއްޓެވެ.
އެ މައްސަލަ ހޫނުވުމާ ގުޅިގެން، ޖާބިރަށް އިންޒާރުތައް ދެމުންދާކަމަށް ބުނެ އޭނާއަށް ސެކިއުރިޓީ ދޭން މަޖިލީހުން އެމްއެންޑީއެފްއަށް ވަނީ އަންގައިފަ އެވެ.
މަޖިލީހުގެ އިއްޔެގެ ޖަލްސާގައި ވާހަކަ ދައްކަވަމުން ޖާބިރު ވަނީ ވިޔަފާރިވެރިންނަށް ރައްކާތެރި މާހައުލެއް ރާއްޖޭގައި މިހާރު ނެތް ކަމަށާއި ރާއްޖެއަކީ އިންވެސްޓަރުންނަށް އޮތް ރިސްކެއް ކަމަށް ވިދާޅުވެފަ އެވެ.
".ހާއްސަކޮށް ޓޫރިޒަމް އިންޑަސްޓްރީގައި ވިޔަފާރިކުރެވެން ނެތް ވާހަކައާއި އަދި ޓޫރިޒަމަށް އިންވެސްޓް ނުކުރަން އަޅުގަނޑު މި ގޮވާލަނީ. ހަމަ މިހާރުން މިހާރަށް ރާއްޖޭގައި ޓެރަރިޒަމް ހުރި ރަށްތަކުގައި ގެސްޓްހައުސް. މަތިވެރި ކަހަލަ ރަށްރަށުން ގެސްޓްހައުސް ވިޔަފާރިތައް ހުއްޓައި، މީހުން ބާލައި ފަޅުކުރަންޖެހޭ ރަށްރަށް އެއީ،" ޖާބިރު އިއްޔެގެ ޖަލްސާގައި ވިދާޅުވި އެވެ.
ޖާބިރުގެ ވާހަކަތަކާ ގުޅިގެން، މަތިވެރި ދާއިރާގެ މެމްބަރު ހަސަން ޒަރީރު މިއަދުގެ ޖަލްސާގައި ވަނީ ވަރަށް ބޮޑަށް ހިތްހަނުޖެހުން ފާޅުކުރައްވައިފަ އެވެ.
މަޖިލިސް މެމްބަރު ޒަރީރު
ސަރުކާރުގެ ފަރާތުން ހުށަހަޅާފައިވާ ހެއްކާބެހޭ ބިލުގެ ބަހުސްގެ ތެރެއިން ޒަރީރު ވިދާޅުވީ މަތިވެރީގައި ޖާބިރު ހިންގަވާ ގެސްޓްހައުސަށް ކުލީގެ ގޮތުގައި ދައްކަންޖެހޭ ފައިސާގެ ތެރެއިން އެއް މިލިއަން ރުފިޔާ ވަގުތުން ދައްކާނެ ކަމަށާއި، ބާކީ ހުރި ފައިސާ ތިން މަސް ދުވަހުގެ ތެރޭގައި ދައްކާނެ ކަމަށް ވިދާޅުވެ، ޖާބިރު އެ ރަށު ކައުންސިލަށް ސިޓީއެއް ފޮނުއްވާފައިވާ ކަމަށެވެ.
"އަދި މިހާތަނަށް އެއްވެސް ފައިސާއެއް ނުދައްކާ. މިއޮތީ ހެކި. މިއޮތީ ކާފީ ހެކި،" އެ ސިޓީ އަތްޕުޅަށް ނަންގަވައިގެން ޒަރީރު ވިދާޅުވި އެވެ.
އޭނާ ވިދާޅުވި ގޮތުގައި، މިހާ ސާފުކޮށް ފެންނަން އޮތް ކަމެއްގައި ރައްޔިތުންނަކީ ޓެރަރިސްޓުންނަށް ހަދައި، އެ ރަށުން ރައްޔިތުން ބާލަންޖެހޭ ކަމަށް ޖާބިރު ވިދާޅުވުމަކީ އެއްވެސް ގޮތަކަށް ބަލައިގަނެވޭނެ ކަމެއް ނޫނެވެ.
"އަޅުގަނޑު ސަރުކާރުގެ އެންމެހާ މުއައްސަސާތަކަށް ގޮވާލަން، އެފަދަ ވާހަކަތައް އެ ބޭފުޅާ [ޖާބިރު] ދައްކާތީ، އެ ބޭފުޅާއާމެދު ގާނޫނީ ގޮތުން އެޅެން ހުރި ފިޔަވަޅުތައް އަޅަން،" އޭނާ ވިދާޅުވި އެވެ.
