ޑާކާ، ބަންގްލަދޭޝް (ސެޕްޓެމްބަރު 28) - އުމުރުން 80 އަހަރު ފުރިފައިވާ ބަންގްލަދޭޝްގެ ފިރިހެނަކު ގާތްގަނޑަކަށް 70 އަހަރު ފަހުން އޭނާގެ 100 އަހަރުވީ މަންމައާ ބައްދަލުވެއްޖެ އެވެ.
އަބްދުލް ކުއްދޫސް މުންސީ ބޮޑުބޭބެއާ އެކު ދިރިއުޅެން ފޮނުވާލީ އުމުރުން 10 އަހަރުގަ އެވެ. ނަމަވެސް ކުއްދޫސް އެ ގެއިން ފިލުމުން އޭނާ ގެއްލުނެވެ.
"މިއަދު މިއީ އަހަރެންގެ ހަޔާތުގެ އެންމެ އުފާވެރި ދުވަސް،" އުމުރުން 82 އަހަރުގެ ކުއްދޫސް ބުންޏެވެ. އޭނާ އުފަންވީ 1939 ގައި އިރުމަތީ ބޯޑަރު ޑިސްޓްރިކްޓު ބްރާހްމަންބާރިއާ އަށެވެ.
ކުއްދޫސް މައިންބަފައިން ހޯދަން އެހީ އަށް އެދޭ ވީޑިއޯއެއް ވިޔަފާރިވެރިޔަކު ފޭސްބުކްގައި ޕޯސްޓު ކުރީ މިދިޔަ އޭޕްރިލް މަހު އެވެ. އެ ވީޑިއޯގައި އޭނާ ވަނީ މަންމަ އާއި ބައްޕަގެ ނަމާއި އޭނާ ނިސްބަތްވާ އަވަށުގެ ނަން ބުނެފަ އެވެ.
އަވަށުގައި ދިރިއުޅޭ ތިމާގެ މީހަކަށް އެ ވީޑިއޯ ފެނި ކުއްދޫސް އަށް ގުޅުމަށް ފަހު އޭނާގެ މަންމަ، މޮންގޯލާ ނެސާ، އަދިވެސް ދިރިހުރިކަމަށް އެންގި އެވެ.
މިހާރު ތިން ފިރިހެން ދަރިންނާއި ފަސް އަންހެން ދަރިންގެ ބައްޕަ، ކުއްދޫސް ވަނީ ހުޅަނގު ރާޖްޝާހީ ސިޓީން 350 ކިލޯމީޓަރު ދަތުރުކޮށް އަވަށަށް ގޮސްފަ އެވެ.
އޭނާ އާއި މަންމަ 70 އަހަރު ފަހުން ބައްދަލުވީ ފާއިތުވި ހަފުތާ ބަންދުގަ އެވެ. މަންމަ އަށް ކުއްދޫސް ވަކި ކުރަން އެނގުނީ ކުޑައިރު އަތަށް ލިބިފައި ހުރި ޒަހަމެއްގެ ލަކުނު ފެނުމުންނެވެ.
"އަހަރެންގެ މަންމަ މިހާރު ވަރަށް މުސްކުޅި، ރަނގަޅަށް ވާހަކައެއް ވެސް ނުދެއްކޭ. އަހަރެން ފެނުނީމަ އަތުގައި ހިފަހައްޓައިގެން އިނދެ މަންމަ ވަރަށް ރުއި. އަހަރެން މަންމަ ކައިރި ބުނިން މިހުރީ އެނބުރި އައިސްފަ އޭ. ދެން އެއްވެސް ކަމަކާ މަންމަ ވިސްނާކަށް ނުޖެހޭނެ އޭ،" ކުއްދޫސް ބުންޏެވެ.
"ކުއްދޫސް އާއި އޭނާގެ މަންމަ ވަރަށް ގިނަ ވަގުތު އެއްކޮށް ތިބެ ރޮއެ ހެދި،" ކުއްދޫސް އަށް ބޮޑުބޭބެ ކިޔާ ޝަފީގުލް އިސްލާމް ބުންޏެވެ.
"އެ އުފާވެރި މަންޒަރު ބަލަން ޖަމާވި އެތައް ސަތޭކަ މީހުން ވެސް ތިބީ ރޮވިފައި."
