މިދިޔަ ޖުލައި މަހު ސްޓެލްކޯއިން ގޭބީސީތަކަށް ފޮނުވި ކަރަންޓު ބިލް ބޮޑުވުމުން އާއްމުންގެ ފަރާތުން ލިބުނު ޝަކުވާގެ މައްސަލައަކީ ސަރުކާރުން ދިން ޑިސްކައުންޓާއި އީދު ބަންދުގެ މުއްދަތު އެ މަހުގެ ބިލު ހެދުމުގައި ހިމަނާފައި ނުވާތީވެ ކުރިމަތިވި ކަމެއް ކަމަށް ޔުޓިލިޓީ ރެގިއުލޭޓަރީ އޮތީރިޓީން ބުނެފި އެވެ.
ޖުލައި މަހު ސްޓެލްކޯއިން ގޭބީސީތަކަށް ފޮނުވި ކަރަންޓު ބިލް ދެގުނަ އަދި ބައެއް ގެތަކަށް ތިން ގުނަ ބޮޑުވުމުގެ ޝަކުވާތަކެއް އާއްމުންގެ ފަރާތުން ވަނީ އޭރު ފާހަގަކުރެވިފަ އެވެ.
އެހެން ނަމަވެސް ސްޓެލްކޯއިން ވަނީ އެ ބިލްތައް ހަދާފައި ވަނީ ރަނގަޅަށް ކަމަށް ބުނެފަ އެވެ. އަދި އެގޮތަށް މެދުވެރިވީ ބިލް ކުރި އިރު ސަރުކާރުން ދިން ޑިސްކައުންޓްތައް ހިމަނާފައި ނުވާތީވެ ކަމަށް ވަނީ ބުނެފަ އެވެ.
މިއަދު ޔުޓިލިޓީ ރެގިއުލޭޓަރީ އޮތޯރިޓީން އެ މައްސަލައިގަ ނެރުނު ބަޔާނެއްގައި ބުނެފައިވަނީ ކަރަންޓު ބިލް ބޮޑުވުމުގެ ސަބަބުން އާއްމުންގެ ފަރާތުން ލިބުނު ޝަކުވާގެ މައްސަލަ ޖުލައި 30 ވަނަ ދުވަހު އެ އޮތީރިޓީން ބަލަން ފެށި ކަމަށެވެ.
އަދި އެ މައްސަލަ ބަލަން ކުރި ދިރާސާތަކުން ކަރަންޓު ބިލް ބޮޑުވާން މެދުވެރިވި މައިގަނޑު ދެ ސަބަބެއް އެ އޮތޯރިޓީއަށް ފާހަގަކުރެވުނުކަމަށް ބަޔާނުގައިވެ އެވެ.
titledesc
ޔުޓިލިޓީ އޮތޯރިޓީން ފާހަގަކުރި އީދު ބަންދުގެ މުއްދަތަކީ ޖުލައި 19 އިން 30 އަށެވެ.
ސަރުކާރުން 40 ޕަސެންޓްގެ ޑިސްކައުންޓެއް ދިނީ، ކޮވިޑުގެ ހާލަތު މިދިޔަ އޭޕްރިލް މޭ މަސްތެރޭ ރާއްޖޭގައި ގޯސްވުމާ ގުޅިގެން އަނެއްކާވެސް އާއްމުންގެ އުޖޫރައަށް ކޮށްފާނޭ ނޭދެވޭ އަސަރަކަށް ލުޔެއް ދިނުމުގެ ގޮތުންނެވެ.
އެ މައްސަލައިގައި ޔުޓިލިޓީ ރެގިއުލޭޓަރީ އޮތޯރިޓީން ހެދި ދިރާސާ ރިޕޯޓް އެ އޮތޯރިޓީގެ ވެބްސައިޓުގައި ޝާއިއުކޮށްފައިވާނެ ކަމަށް ވެސް އެ ބަޔާނުގައި ވަނީ ބުނެފަ އެވެ.
އެ ޝަކުވާތަކަށްފަހު ސްޓެލްކޯއިން ވަނީ އެކި މަހު ކަރަންޓު ބިލަށް އަންނަ ބޮޑެތި ބަދަލުތަކަށް ހައްލެއް ހޯދައިދިނުމުގެ ގޮތުން އީކުއަލް ޕޭމަންޓް ޕްލޭން އެއް ވެސް ތައާރަފްކޮށްފަ އެވެ.
