ބާލިން، ޖަރުމަން ވިލާތް (ސެޕްޓެމްބަރު 27) - ޖަރުމަނުގެ އިންތިހާބުގައި ސޯޝަލް ޑިމޮކްރެޓުން ހަނި ގޮތަކަށް ކުރި ހޯދުމާއެކު 16 އަހަރު ވަންދެން އެ ގައުމުގައި އޮތް ސިޔާސީ ހަމަޖެހުމަށް ލޮޅުން އަރައިފި އެވެ.
ވަގުތީ ނަތީޖާ ދައްކާ ގޮތުން ސޯޝަލް ޑިމޮކްރެޓް (އެސްޕީޑީ) އަށް ލިބިފައި ވަނީ ވޯޓުގެ 25.7 ޕަސެންޓެވެ. ޗާންސެލަރު އެންޖެލާ މާކަލްގެ ސީޑީޔޫ-ސީއެސްޔޫ އަށް ލިބުނު ވޯޓު ވަނީ މީގެ ކުރިން ދުވަހަކު ވެސް ދަށަށް ނުދާ މިންވަރަށް 24.1 ޕަސެންޓަށް ވެއްޓިފަ އެވެ.
އެސްޕީޑީން ޗާންސެލަރު ކަމަށް ކަނޑައެޅި ކެންޑިޑޭޓް، މިހާރުގެ ފިނޭންސް މިނިސްޓަރު އަދި ވައިސް ޗާންސެލަރު އޯލާފް ޝޯލްޒް ވިދާޅުވީ އެ ޕާޓީއަށް އެންމެ ބޮޑު ޕަސެންޓޭޖެއް ލިބުމުން، ސަރުކާރެއް ހެދުމުގެ ބާރު ލިބިފައިވާ ކަމަށެވެ.
ފާއިތުވި 16 އަހަރު ޗާންސެލަރު ކަމުގައި މާކަލް ހުންނެވިއިރު، ޖަރުމަނުގައި ސިޔާސީ ހަމަޖެހުން ގާއިމްވެފައި އޮތް ނަމަވެސް، މި އިންތިހާބަށް ފަހު އެ ގައުމުގެ ސިޔާސީ ކުރިމަގާ މެދު ގިނަ ސުވާލުތަކެއް ވަނީ އުފެދިފަ އެވެ.
އުމުރުން 63 އަހަރުގެ ޝޯލްޒް ވިދާޅުވެފައި ވަނީ އަމާޒަކީ އަންނަ ޑިސެމްބަރު މަހުގެ ކްރިސްމަސް ޗުއްޓީ ފެށުމުގެ ކުރިން ސަރުކާރެއް އުފެއްދުން ކަމަށެވެ.
ޝޯލްޒްގެ އެސްޑީޕީއަށް އެންމެ ބޮޑު ޕަސެންޓޭޖެއް ލިބުނު ނަމަވެސް، ސީޑީޔޫ-ސީއެސްޔޫ ކޯލިޝަނުން ވެސް ބޭނުން ވަނީ އެހެން ޕާޓީތަކާއެކު ކޯލިޝަނެއް ހަދާށެވެ.
ތިން ވަނަ އަށް އެންމެ ބޮޑު ތާއީދެއް އޮތީ 11.5 ޕަސެންޓު ވޯޓާއެކު އެފްޑީޕީ އަށެވެ. އެހެންކަމުން އެ ޕާޓީއާއެކު ކޯލިޝަން އެއްބަސްވުމަކަށް އައިސް ޕާލިމެންޓުގެ މެޖޯރިޓީ ކަށަވަރު ކުރެވޭ ޕާޓީއަކަށް ސަރުކާރު ހެދުމުގެ ފުރުސަތު ލިބޭނެ އެވެ.
އެސްޕީޑީ އަށް 206 ގޮނޑި ލިބިފައި ވާއިރު، ސީޑީޔޫ-ސީއެސްޔޫ އަށް ލިބިފައި ވަނީ އެއަށް ވުރެ 10 ގޮނޑި މަދުންނެވެ. ޑިސެމްބަރު މަހުގެ ކުރިން ސަރުކާރެއް ގާއިމް ނުކުރެވިއްޖެ ނަމަ މާކަލް ވެގެން ދާނީ ޖަރުމަނުގައި އެންމެ ގިނަ ދުވަހު ވެރިކަން ކުރެއްވި ޗާންސެލަރަށެވެ.
ފަސް ވަނަ ދައުރަކަށް ޗާންސެލަރު ކަމަށް ކުރިމަތިލައްވަން ބޭނުންވެވަޑައިނުގެންނެވި މާކަލް އަކީ އަދިވެސް ޖަރުމަނުގައި އެންމެ މަގްބޫލު ސިޔާސީ ލީޑަރެވެ.
