ބޮޑު އަގުލަބިއްޔަތަކުން ފޮރިން މިނިސްޓަރު އަބްދުﷲ ޝާހިދު އދ.ގެ އާންމު މަޖިލީހުގެ ރިޔާސަތަށް ހޮވިވަޑައިގަތުމަކީ ބައިނަލްއަގުވާމީ މުޖްތަމައުން އެމަނިކުފާނާއި، ރާއްޖެއާއި މެދު ދެކޭ ގޮތުގެ ނަމޫނާއެއް ކަމަށް ބޮޓްސްވާނާގެ ރައީސް މޮކްގްވިސްތީ މަސީސީ ވިދާޅުވެއްޖެ އެވެ.
މިހާރު ކުރިއަށް ދާ އދ.ގެ އާންމު މަޖިލީހުގައި ތަގުރީރުކުރައްވަމުން ބޮޓްސްވާނާގެ ރައީސް ވިދާޅުވީ ޝާހިދު އދ. ގެ އާއްމު މަޖިލީހުގެ ރިޔާސަތަށް އިންތިހާބުވެވަޑައިގަތުމަކީ ހައިރާންވާން ޖެހޭކަމެއް ނޫންކަމަށާއި، އޭނާ ރިޔާސަތަށް ވަޑައިގަތީ ތަޖުރިބާއާ ގާބިލްކަމާއެކުގައި ކަމަށެވެ.
އަދި ޝާހިދުގެ ޑިޕްލޮމެޓިކް ތަޖުރިބާ އާއި، ގާނޫނު ހަދާ މަޖިލީހުގެ ތަޖުރިބާގެ އިތުރުން ސަރުކާރު ހިންގުމުގެ ތަޖުރިބާގެ އަލީގައި މިއަހަރުގެ އާންމު މަޖިލީހުގެ މަސައްކަތަށް އިތުރު ބާރެއް ލިބިގެންދާނެކަމަށް ޔަގީން ކުރައްވާކަމަށް ވެސް ބޮޓްސްވާނާގެ ރައީސް ވިދާޅުވި އެވެ.
އޭނާ އިތުރަށް ވިދާޅުވީ ޝާހިދުގެ މިޝަން ސްޓޭޓްމަންޓްގައި ހިމެނޭ "އުއްމީދުގެ ފަސް ދޯދި" އަކީ މިވަގުތު އިންސާނިއްޔަތަށް ދިމާވެފައިވާ މައްސަލަތަކަށް އޮތް އުއްމީދެއްކަމަށެވެ.
"އެ އުއްމީދުތައް ހާސިލްކުރުމަށް އެމަނިކުފާނާ ގުޅިގެން، އެމަނިކުފާނުގެ ތަސައްވުރާ އެއްގޮތަށް ބޮޓްސްވާނާއިން މަސައްކަތްކުރާނެކަމުގެ ޔަގީންކަން ދެން،" ބޮޓްސްވާނާގެ ރައީސް ވިދާޅުވި އެވެ.
އާންމު މަޖިލީހުގައި ވާހަކަފުޅު ދައްކަވަމުން ފެޑެރޭޓެޑް ސްޓޭޓްސް އޮފް މައިކްރޯނީޝިއާގެ ރައީސް ޑޭވިޑް ޕަނުއެއްލޯ ވެސް ވަނީ ޝާހިދަށާއި ރާއްޖެއަށް ތައުރީފުކުރައްވާފަ އެވެ.
އަދި މި ހައްސާސް ދަނޑިވަޅުގައި އދ. ގެ އާއްމު މަޖިލީހުގެ ރިޔާސާތާ، ތަރައްގީވަމުން އަންނަ ކުޑަ ޖަޒީރާ ގައުމެއްގެ ބޭފުޅަކު ހަވާލުވުމަކީ ފާހަގަކުރަން ޖެހޭކަމެއް ކަމަށް ވިދާޅުވި އެވެ.
މޫސުމީ ބަދަލުތަކާ ތިމާވެށީގެ މައްސަލަތަކުގައި ބައިނަލްއަގުވާމީ މުޖްތަމައުގައި އަޑުއުފުލާ އަދި ގައުމުތައް ލީޑްކުރާ ގައުމެއްގެ ގޮތުގައި ރާއްޖެ ފާހަގަކުރައްވައި، ދެ ގައުމު އަދި ޖަޒީރާ ގައުމުތައް ގުޅިގެން ކުރަމުންދާ މަސައްކަތްތަކަށް މައިކްރޯނީޝިއާގެ ރައީސް އަލިއަޅުއްވާލެއްވި އެވެ.
