ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު އއ. މަތިވެރިއަށް ވަޑައިގަތުމުން އެރަށުގެ ބައެއް ރައްޔިތުން ނުރުހުން ފާޅުކޮށްފި އެވެ.
ގެސްޓްހައުސްތައް ގިނަ މަތިވެރީއަށް ޖާބިރު ވަރަށް ގިނައިން ވަޑައިގަންނަވަ އެވެ. އާންމުކޮށް ޗުއްޓީއަށް ވެސް ޖާބިރު މަތިވެރީއަށް ވަޑައިގަންނަވަ އެވެ.
ނަމަވެސް, މިއަދު އިރުއޮއްސުނު ގަޑީ, ޖާބިރު މަތިވެރިއަށް ވަޑައިގެންނެވުމާއެކު އެ ރަށުގެ ބައެއް ރައްޔިތުން ވަނީ އޭނާއާ ދެކޮޅަށް އަޑުއުފުލައި, ރަށުން ފޭބުމަށް ޑިމާންޑްކޮށްފަ އެވެ.
އެކަމާ ގުޅިގެން މަޖިލީހުގެ ކާށިދޫ ދާއިރާގެ މެންބަރަށް ފުލުހުން ރައްކާތެރިކަން ފޯރުކޮށްދިނެވެ.
ފުލުހުންގެ މީޑިއާ އޮފިޝަލް ވިދާޅުވި ގޮތުގައި, ޖާބިރު މަތިވެރިއަށް ވަޑައިގަތުމުން އެ ރަށުގެ ބައެއް ރައްޔިތުން ނުކުމެ ނުރުހުން ފާޅުކުރުމާ ގުޅިގެން ޖާބިރަށް ފޯރުކޮށްދޭން ޖެހޭ ސަލާމަތާއި ރައްކާތެރިކަން އެއިދާރާއިން ފޯރުކޮށްދެމުންދެ އެވެ.
ޖާބިރު އަދިވެސް ހުންނެވީ އެ ރަށުގަ އެވެ.
މަތިވެރިއަށް މިފަހަރު ވަޑައިގެންނެވުމުން އެ ރަށުގައި ހިތްހަމަނުޖެހުން އުފެދުނު ސަބަބެއް ސާފެއް ނޫނެވެ. މިކަމާ ގުޅިގެން އެ ރަށުގެ ކައުންސިލްގެ ބަހެއް ވެސް ނުލިބުނެވެ.
މިފަހުން ޖާބިރުގެ ފަރާތުން ވަނީ ތަފާތު މަންޒަރުތަކެއް ފެނިފަ އެވެ. އެގޮތުން ރައްޔިތުންގެ މަޖިލީހުގެ އިދާރާގެ ގޭޓް ކުރިމަތީ އޮށޯވެ އޮންނަވައި, ހަޑި ހުތުރުން ބަހުން މުހާތަބުކޮށްފައިވެ އެވެ. އަދި, މިފަހުން ގަދަކަމުން ސްޓެލްކޯއަށް ވަދެގަތުމަށް މަސައްކަތްކޮށް, މާލޭ ސިޓީގެ ކުރީގެ މޭޔަރު ޝިފާ މުހައްމަދުގެ ކެމްޕެއިން ޖަލްސާއަކަށް ވެސް ވަދެގަނެ, ހަމަނުޖެހުން ހިންގާފައިވެ އެވެ.
މިފަހުން ޖާބިރު އެމެރިކާއަށް ވެސް ވަޑައިގެންނެވި އެވެ.
ބައެއް ފަރާތްތަކުން އަންނަނީ ޖާބިރުގެ އަމަލުތައް ބަލައި, އޭނާއާމެދު ފިޔަވަޅު އެޅުމަށް ގޮވާލަމުންނެވެ.
