އެންމެ އެކަށީގެންވާ ގޮތަށް މީޑިއާތަކުން ހަބަރުތައް ނުގެނެސްދޭ ކަމަށް ބުނެ, ރައްޔިތުންގެ މަޖިލީހުގެ ރައީސް, ރައީސް މުހައްމަދު ނަޝީދު އަވަހާރަހަކޮށްލަން ބޮމުގެ ހަމަލާ ދިނުމުގައި އިސްކޮށް އުޅުނު ކަމަށް ތުހުމަތުވާ މ. ކުދެހިގެ, އިސްހާގުގެ ޝަރީއަތް ސިއްރުކޮށްދޭން އޭނާ އެދިއްޖެ އެވެ.
ކާރަށް އަރާވަޑައިގަންނަވަނިކޮށް, ސައިކަލެއްގައި ހަރުކޮށްފައިވާ ބޮމެއް ގޮއްވާލައިގެން ނަޝީދަށް ދިން ހަމަލާއާ ގުޅިގެން ޖުމްލަ ހަތް މީހަކަށް ވަނީ ދައުވާކޮށްފަ އެވެ. އެމީހުންގެ ޝަރީއަތްތައް މިއަދު ކުރިމިނަލް ކޯޓުގައި ވަނީ ކުރިއަށް ގެންގޮސްފަ އެވެ.
އެގޮތުން, ދައުވާތަކަށް އިއުތިރާފުވެފައިވާ އަދުހަމް އަހުމަދު ރަޝީދުގެ ބައި ވަކިން ގެންދިޔުމަށްފަހު, އޭނާއާއެކު ދެން ދައުވާ އުފުލި މުޖާޒު އަހުމަދާއި އަލީ ހާޝިމް އަދި ތަހުމީން އަހްމަދުގެ ޝަރީއަތުގެ އަޑުއެހުން ކުރިއަށް ގެންދިޔަ އެވެ. އަދި, އޭގެފަހުން ފަހުން ދައުވާކުރި ތިން މީހުން ކަމަށްވާ ގއ. ވިލިނގިލި، ހުދުރުވާގެ، ފަހުމީ އަލީ އާއި އއ. މާޅޮސް، އަސަރީގެ، މުހައްމަދު ނާޒިމް އަދި މ. ކުދެހިގެ، އިސްހުގެ ބަންދު މަޖިލިސް ބޭއްވި އެވެ.
އެ މަޖިލީހަށް ވަކީލަކާއެކު އިސްހާގު ހާޒިރުވެ އިންއިރު, އޭނާ ފަރާތުން އެންމެ ފުރަތަމަ ވެސް ވަކީލް ޝަރީއަތުގައި އެދުނީ, އިސްހާގުގެ ޝަރީއަތް އާންމުކޮށް ހުޅުވާނުލައި ސިއްރުކޮށްގެން ކުރިއަށް ގެންދިޔުމަށެވެ.
އިސްހާގުގެ ބައި ސިއްރުކޮށްގެން ކުރިއަށް ގެންދިޔުމަށް އެދެނީ ވަކީލް އަހުމަދު ޔާމީން ވިދާޅުވި ގޮތުގައި, އޭނާއަށް ވެސް އަދުލުވެރި ޝަރީއަތެއް ހައްގުވާތީ އެވެ. ޝަރީއަތާ ގުޅޭ ހަބަރު ބައެއް މީޑިއާތަކުން ބައެއް ފަހަރަށް ރިޕޯޓްކުރާއިރު އެންމެ އެކަށީގެންވާ ގޮތުގައި އެކަން ނުކުރާކަން ޔާމީން ފާހަގަކުރެއްވި އެވެ.
އެކަމުގެ ސަބަބުން އިސްހާގަށް ބިރު ދެއްކުމާ ކުރިމަތިވެ, ޝަރީއަތަށް އޭގެ ނޭދެވޭ އަސަރުކުރާ ކަމަށް އޭނާ ވިދާޅުވި އެވެ. އެއީ, ޝަރީއަތަށް ނޭދެވޭ ނުފޫޒު ވަނުމަށް އޮތް ފުރުސަތެއް ކަމަށް ވެސް އޭނާ ފާހަގަ ކުރެއްވި އެވެ. ޔާމީން ވިދާޅުވި ގޮތުގައި, އަޑުއެހުންތައް ސިއްރުކޮށްގެން އަންނާނެ ގޯހެއް ނެތެވެ. އޭގެ ބަދަލުގައި އިސްހާގުގެ ހައްގުތައް ކަށަވަރުވެގެންދާނެކަން އޭނާ ފާހަގަ ކުރެއްވި އެވެ.
މިކަމުގައި ދައުލަތުން ދެކޭ ގޮތެއް މައްސަލަ ބައްލަވާ ގާޒީންގެ ބެންޗުން ނުހޯދަ އެވެ. ނަމަވެސް, ގާޒީން ނިންމެވީ އިސްހާގުގެ ފަރާތުން ހުށަހެޅި ހުށަހެޅުމާއެކު ގާޒީންގެ މެދުގައި މަޝްވަރާކުރުމަށްފަހު ފަހުން ނިންމުމެއް ނިންމަވާށެވެ.
އިސްހާގުގެ ބަންދު މަޖިލީހުގެ ކުރިން ބޭއްވި އަދުހަމްގެ މައްސަލާގެ އަޑުއެހުން ވަކި ހިސާބަކުން ދައުލަތުން ވެސް އެދިގެން ސިއްރުކުރި އެވެ. ދައުވާތަކަށް ޝަރީއަތުގައި އަދުހަމް އިއުތިރާފުވެފައިވާއިރު އެ ޝަރީއަތް ހުޅުވާލައިގެން ކުރިއަށް ނުގެންދަން ގާޒީން ނިންމެވީ, އޭގެ ސަބަބުން މުޖުތަމައުއަށް ނުރައްކަލެއް ވެދާނެތީ އެވެ.
ދައުވާ އުފުލާފައިވާ ފަހުމީ: އޭނާގެ ބަންދަށް 30 ދުވަސް ޖެހި - ފޮޓޯ: އަދަދު
އިސްހާގާއެކު, ދެން ދައުވާ އުފުލާފައިވާއިރު ނާޒިމާއި ފަހުމީ އަޑުއެހުންތައް ސިއްރުކޮށްދޭން އެދިފައެއް ނުވެ އެވެ.
ޕްރޮސިކިއުޓާ ޖެނަރަލް ހުސެއިން ޝަމީމް މީގެކުރިން ވިދާޅުވެފައިވާ ގޮތުގައި, އެ އޮފީހުން އެދޭ ގޮތަކީ މި މައްސަލަ ވީހާވެސް ބޮޑަކަށް ހުޅުވާލައިގެން ޓީވީން ލައިވްކޮށްގެން ވެސް ކުރިއަށް ގެންދިޔުމަށެވެ. ނަމަވެސް, މިހާތަނަށް އެފަދަ ކަމަކަށް ދައުލަތުން އެދިފައެއް ނުވެ އެވެ.
ޝަރީއަތް ނިމެންދެން ބަންދުކޮށްދޭން އެދުނު
ދައުލަތުން ވަނީ އިސްހާގާއި ފަހުމީ އަދި ނާޒިމް ޝަރީއަތް ނިމެންދެން ބަންދުކުރުމުގެ އަމުރެއް ނެރެދިނުމަށް އެދިފަ އެެވެ. ނަމަވެސް, އެ އަމުރު ގާޒީންގެ ބެންޗުން މިއަދު ނެރެނުދިނެވެ.
އެއީ, އިސްހާގުގެ ފަރާތުން ކުރިން ބަންދާމެދު ނިންމާފައި އޮތް ނިންމުމެއް ސުޕްރީމް ކޯޓުގައި އިސްތިއުނާފުކުރުމަށް ބޭނުންވާ ކަމާއި, އެ މައްސަލާގައި ނިމޭ ގޮތަކުން އިތުރަށް އެކަމުގައި ވާހަކަ ދައްކަން ބޭނުންވާތީ އެވެ. އަދި, މައްސަލާގެ ލިޔުންތައް ދިރާސާކުރުމަށް ވެސް ބޭނުންވާ ކަމަށް ބުނެފައިވާތީ އެވެ.
ދައުވާ އުފުލާފައިވާ ނާޒިމް: އޭނާގެ ބަންދަށް 30 ދުވަސް ޖެހި - ފޮޓޯ: އަދަދު
އޭގެއިތުރުން ނާޒިމާއި ފަހުމީ ވަކީލަކު ބޭނުންވާ ކަމަށް ބުނެފައިވާތީ, އެ ދެ މީހުންނަށް އެ ފުރުސަތު ދިނުމަށްފަހު ޝަރީއަތް ނިމެންދެން ބަންދުކުރުމުގެ އަމުރެއް ނެރެން ގާޒީން ބޭނުންވާތީ އެވެ. ގާޒީން މިއަދު ތިން މީހުންގެ މައްޗަށް ނެރުނީ ޝަރީއަތް ނިމެންދެން ބަންދުގެ އަމުރެއްގެ ބަދަލުގައި 30 ދުވަހުގެ ބަންދު އަމުރެކެވެ.
އަދި, އެ ތިން މީހުން ވެސް ރިމާންޑް ޖަލަކަށް ބަދަލުކުރުމަށް އަމުރު ކުރެއްވި އެވެ. ފަހުމީ ވަނީ އޭނާ ހުންނަ ހުޅުމާލޭ ޖަލުގެ ގޮޅިއަށް އެއްވެސް އަލިކަމެއް ނުލިބޭކަން ވެސް ފާހަގަކޮށްފަ އެވެ. ގާޒީ ވިދާޅުވި ގޮތުގައި ރިމާންޑް ޖަލަކަށް ބަދަލު ކުރުމުން އެކަން ވެސް ހައްލުވެގެންދާނެ އެވެ.
މައްސަލާގައި ހިމެނޭ ލިޔުންތައް ފުލުހުން ވެހިކަލްއަށް އަރުވަނީ
މި މައްސަލާގެ ބެންޗުގައި ތިއްބަވަނީ ގާޒީ އާދަމް މުހައްމަދާއި ސޮފްއަތު ހަބީބުގެ އިތުރުން މުހައްމަދު މިސްބާހެވެ.
