މުޅި ދުނިޔެ ހުއްޓުމަކަށް ގެނައި ކޮވިޑުގެ ބަލިމަޑުކަން ދައްކުވައިދިނީ، އެއްވެސް ގައުމަކަށް ވަކިވެ އެކަހެރިވެގެން ހޯދޭ މޮޅު ނަތީޖާއެއް ނެތްކަން ކަމަށާއި، އަމާން ރައްކާތެރި ދިރިއުޅުމަށްޓަކާ އެންމެން އެއްބައިވަންތަވެ އެކުވެރިވާން ރައީސް އިބްރާހިމް މުހައްމަދު ސޯލިހު މިރޭ ގޮވާލައްވައިފި އެވެ.
އދ.ގެ 76 ވަނަ އާންމު މަޖިލީހުގައި ތަގުރީރުކުރައްވަމުން ރައީސް ވިދާޅުވީ މުޅި ދުނިޔެ ތަހައްމަލުކުރަން ޖެހުނު ކޮވިޑުގެ ބަލިމަޑުކަމަކީ ރާއްޖެ ދުށް އެންމެ ބޮޑު ގޮންޖެހުން ކަމަށެވެ.
އެގޮތުން، ރާއްޖޭގެ ބޯޑަރުތައް ބަންދުކުރުމާއެކު ފަތުރުވެރިކަމާއި، ބޭރު ފައިސާގެ އިތުރުން ވިޔަފާރިތައް ހުއްޓުމުން ފޫނުބެއްދޭވަރުގެ ގެއްލުންތަކެއް ތަހައްމަލްކުރަން ޖެހުނުކަން އެމަނިކުފާނު ދުނިޔޭގެ ސަމާލުކަމަށް ގެންނެވި އެވެ.
"ފުރަބަންދުގެ ސަބަބުން ރައްޔިތުންގެ އިޖްތިމާއީ ދުޅަހެޔޮކަން އެނދުމަތިވި. ދެލޯ ނޭދިއެދޭ އަޅުގަނޑުމެންގެ ދަރީންގެ ތައުލީމު އަހަރުތަކަކަށް ފަހަތަށް ޖެހުނު،" ރައީސް ވިދާޅުވި އެވެ.
އެމަނިކުފާނު ވިދާޅުވި ގޮތުގައި ބޯޑަރު ބަންދުކުރުން ފަދަ އުނދަގޫ ނިންމުންތަކާއި، ސިއްހީ މާހިރުން ލަފަޔާއި އިރުޝާދުގެ މަތީގައި ދެމިތިބުމުގެ ނަތީޖާއެއްގެ ގޮތުން އެ ދުވަހު ގައުމު ލީ ފުންނޭވާއަށް މިވަގުތު ވަނީ ހަމަޖެހުމެއް ލިބިފަ އެވެ.
މިވަބާއިން ރައްކާތެރިވުމަށް އޮތް އެންމެ މުހިންމު ފިޔަވަޅަކީ ވެކްސިންކަން ފާހަގަކުރައްވަމުން ރައީސް ސޯލިހު ވިދާޅުވީ އިންސާނިއްޔަތާ ހުރިހާ ގައުމެއް ދިފާއު ވެގެން މެނުވީ ހަގީގީ ދިފާއެއް އަދި މާނަވީ ސަލާމަތެއް މިކަމަކުން ނުހޯދޭނެ ކަމަށެވެ.
"އެހެންކަމުން، ހަމަހަމަކަމާއެކު ވެކްސިން ފޯރުކޮށްދިނުމަކީ އޮތް އެންމެ މުހިންމު ހައްލު،" އެމަނިކުފާނު ވިދާޅުވި އެވެ.
ރައީސް އިތުރަށް ވިދާޅުވި ގޮތުގައި، މިފަދަ ބަލިމަޑުކަމެއް ތަކުރާރުވިޔަ ނުދިނުމަށް މުޅިދުނިޔޭގެ ލޯތައް އަމާޒުކޮށްގެން ތިބީ މިތާ އެއްވެ މިއޮތް މަޖިލީހަށް ކަމަށާއި، ވަސީލަތްތަކާއި ހަކަތައާއި އިލްމާއި ހުނަރުގެ އިތުރުން ހޯދުންތައް އެއްތަންކޮށް ހިއްސާވުމަށް އެއްބަސްވާންޖެހޭ ކަމަށެވެ.
