ނިއު ދިއްލީ، އިންޑިއާ (ސެޕްޓެމްބަރު 20) - ކޮވިޑުގެ ނުރައްކާތެރި ރާޅެއް ކުރިމަތިވުމާއެކު މީގެ ފަސް މަސް ކުރިން އެކްސްޕޯޓް ކުރުން ހުއްޓާލި ކޮވިޑް ވެކްސިން، އޮކްޓޯބަރު މަހުން ފެށިގެން އަލުން އެކްސްޕޯޓް ކުރަން އިންޑިއާ އިން ނިންމައިފި އެވެ.
ފަގީރު ގައުމުތަކަށް ކޮވިޑް ވެކްސިން ފޯރުކޮށްދޭން ހިންގާ ކޯވެކްސް ޕްރޮގްރާމަށް އެންމެ ގިނައިން ވެކްސިން ލިބެނީ "ދުނިޔޭގެ ފާމަސީ"ގެ ގޮތުގައި މަޝްހޫރު އިންޑިއާ އިންނެވެ. ނަމަވެސް މިދިޔަ އޭޕްރިލް މަހު އިންޑިއާ އިން ވެކްސިން ހުސްވެ، އެކްސްޕޯޓް ކުރުން މެދުކަނޑާލި އެވެ.
ހެލްތު މިނިސްޓަރު މަންސުކް މަންޑާވިޔަ ވިދާޅުވީ އޮކްޓޯބަރު މަހު 300 މިލިއަނަށް ވުރެ ގިނަ ޑޯޒް އުފައްދާނެ ކަމަށާއި އަހަރުގެ އެންމެ ފަހު ތިން މަހުގެ ތެރޭގައި ބިލިއަނަކަށް ވުރެ ގިނަ ޑޯޒް އިންޑިއާގައި އުފައްދާނެ ކަމަށެވެ.
"އިންޑިއާގެ ވެކްސިން އެކްސްޕޯޓް ކުރުން އަލުން ފަށާނެ. އެއީ ކޯވެކްސް ޕްރޮގްރާމާއެކު އެއްބަސްވެފައިވާ ކަންކަމަށް އިހްތިރާމް ކުރުމުގެ ގޮތުން،" ހެލްތު މިނިސްޓަރުގެ ބަޔާނެއްގައި ވިދާޅުވި އެވެ.
"އިންޑިއާގައި ބޭނުން ކުރުމަށް ފަހު ބާކީވާ "ސާޕްލަސް" ސަޕްލައި ފޯރުކޮށްދޭނީ ދުނިޔެއިން ކޮވިޑާ ދެކޮޅަށް ކުރާ ހަނގުރާމައިގައި އަޅުގަނޑުމެންގެ ދައުރު އަދާ ކުރުމަށް."
މިދިޔަ ޖެނުއަރީ މަހު ފެށި އިންޑިއާގެ ވެކްސިން ޕްރޮގްރާމަށް އެންމެ ފުރަތަމަ މާ ބޮޑު ތަރުހީބެއް ނުލިބެ އެވެ. ނަމަވެސް މިހާރު ދުވާލެއްގެ މައްޗަށް 5-8 މިލިއަން ޑޯޒް ޖަހަމުން ދެ އެވެ.
ބޮޑު ވަޒީރު ނަރެންދްރަ މޯދީގެ އުފަން ދުވަސް ފާހަގަކުރުމުގެ ގޮތުން މިދިޔަ ހުކުރު ދުވަހު ރިކޯޑް އަދަދަށް ކޮވިޑް ވެކްސިންގެ ޑޯޒް ދީފައި ވެ އެވެ. އެ ދުވަހު 22 މިލިއަން މީހުންނަށް ވެކްސިން ދިނެވެ.
