ބާސެލޯނާ (ސެޕްޓެމްބަރު 21) - ސްޕެނިޝް ލީގުގައި ރޭ ބާސެލޯނާ އިން ފަހު ވަގުތު ޖެހި ގޯލާ އެކު ގްރަނާޑާ އަތުން ބަލިނުވެ ސަލާމަތްވެއްޖެ އެވެ.
ބާސެލޯނާ ދަނޑުގައި ގްރަނާޑާއާ ދެކޮޅަށް ކުޅުނު މެޗު ނިމުނީ 1-1 އިން އެއްވަރު ވެގެންނެވެ. ޖުމްލަކޮށް ބަލާއިރު މި މެޗުގައި ބާސެލޯނާގެ ފަރާތުން ފެނުނީ އާދައިގެ ކުޅުމެކެވެ.
ރޭގެ ނަތީޖާއާ އެކު ބާސެލޯނާ ލީގުގައި މި ފަހަރު މިހާތަނަށް ބަލިނުވެ އޮތްއިރު، އެ ޓީމު އޮތީ ހަތް ވަނައިގަ އެވެ. އެއީ ހަތަރު މެޗުން އަށް ޕޮއިންޓް ހޯދައިގެންނެވެ.
ބާސެލޯނާގެ ފަރާތުން ސީޒަން ފަށައިގެން މިހާތަނަށް އާދައިގެ ކުޅުމެއް ފެނުނުއިރު، އެ ޓީމުގެ ކޯޗުގެ މަގާމުގައި ހުރި ރޮނާލްޑް ކޫމަންގެ މުސްތަގުބަލާ މެދު ވަނީ ސުވާލު އުފެދިފަ އެވެ. ރޭގެ މެޗަށް ފަހު ކޫމަން ބުނީ އޭނާގެ ވަޒީފާއާ ގުޅޭ ސުވާލުތަކަށް ދެން ޖަވާބު ދޭން ޖެހޭނީ ކްލަބްގެ ވެރިން ކަމަށެވެ.
"އަހަރެމެންގެ ޓީމު މި އޮތް ހާލަތު ފެނިފައި ތި ބުނާ މޮޅު ފުޓްބޯޅަ ކުޅެވޭނެތޯ އެއީ ސުވާލުކޮށްލުން ރަނގަޅު ކަމެއް. އަހަރެން މީގެ ކުރިން ގިނަ ސުވާލުތަކަކަށް ޖަވާބު ދިން ކަމުގައި ވިޔަސް ކުރިއަށް އޮތްތަނުގައި އަހަރެންގެ މުސްތަގުބަލާ ގުޅޭ ގޮތުން ކުރާ ސުވާލަށް ޖަވާބެއް ނުދޭނަން. އޭގެ ޖަވާބު ދޭން ޖެހޭނީ ކްލަބްގެ އެެހެން މީހުން،" ހިތްހަމަނުޖެހިފައި ހުރެ ކޫމަން ބުންޏެވެ.
ގްރަނާޑާ އިން ރޭގެ މެޗު ފަށައިގެން ދެ ވަނަ މިނިޓްގައި ލީޑުނެގީ އޭރިއާތެރެއިން ލިބުނު ފުރުސަތެއްގައި ޑޮމިންގޯސް ޑުއާޓޭ ބޮލުން ޖެހި ގޯލުންނެވެ. ނަތީޖާ ހަމަހަމަ ކުރަން ބާސެލޯނާ އިން ގިނަ މަސައްކަތްތަކެއް ކުރިއިރު، މެމްފިސް ޑިޕާއި އޭރިއާތެެރެއިން ޖެހި ބޯޅައެއް ވަނީ ހުރަސްދަނޑިމަތިން ގޮސްފަ އެވެ. އަދި ފަހުން ލޫކް ޑި ޔޯން އަށް ވެސް ރަނގަޅު ބޯޅަތަކެއް ލިބުނެވެ.
ދެ ވަނަ ހާފްގައި ހިލޭ ޖެހުމަކުން އޭރިއާތެރެއަށް އައި ބޯޅައެެއް ރޮނާލްޑް އަރައުހޯ ބޮލުން ޖެހުމުން ގްރަނާޑާގެ ކީޕަރު ލުއިސް މެކްސިމިއާނޯ ވަނީ މަތަކޮށްފަ އެވެ. އެކަމަކު، މެޗުގެ އިތުރު ވަގުތުގައި އަރައުހޯ ޖެހި ބޯޅަ ހުއްޓުވަން ކީޕަރު މެކްސިމިއާނޯ އަށް ކުރެވޭނެ މާ ބޮޑު ކަމެއް ނެެތެވެ.
