އ.ދ.ގެ ސެކްރެޓަރީ ޖެނެރަލް އެންޓޯނިއޯ ގުޓާރޭޒްއާ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ބައްދަލުކުރައްވައި، ރާއްޖޭގެ ހާލަތު ހިއްސާ ކުރައްވައިފި އެވެ.
އދ. ގެ އާންމު މަޖިލީހުގެ 76 ވަނަ ބައްދަލުވުމުގައި ތަގުރީރު ކުރެއްވުމަށް ރައީސް ސޯލިހު އެމެރިކާގެ ނިއު ޔޯކަށް މިހާރު ކުރައްވަމުން ގެންދަވާ ދަތުރުފުޅުގައި، ސެކްރެޓަރީ ޖެނެރަލް ގުޓާރޭޒްއާއެކު ބޭއްވި ބައްދަލުކުރެއްވުމުގައި ކޮވިޑް 19 އާ ގުޅޭ ގޮތުންނާއި މޫސުމީ ބަދަލުތަކާ ގުޅޭ ގޮތުން ވާހަކަ ދެއްކެވި އެވެ.
ރާއްޖޭގައި ކޯވިޑް 19 ކޮންޓްރޯލްކުރުމަށް ގައުމީ ފެންވަރުގައި ކުރަމުންގެންދާ މަސައްކަތްތަކާއި ރާއްޖޭގައި ވެކްސިން ދެވޭ އާބާދީގެ އެންމެންނަށް ވެކްސިން ދިނުމަށް ކުރަމުންގެންދާ މަސައްކަތުގެ މައުލޫމާތު ސެކްރެޓަރީ ޖެނެރަލްއާ ހިއްސާކުރެއްވެވި އެވެ. ކޯވިޑް 19ގެ ބަލިމަޑުކަން ކޮންޓްރޯލްކުރުމުގައި ރާއްޖެއިން ކާމިޔާބީއާ ހަމައަށް އާދެވިފައިވާކަން ފާހަގަކުރައްވަމުން، މި ބަލި ކޮންޓްރޯލްކުރުމަށް ސަރުކާރުން އެޅަންޖެހުނު ފިޔަވަޅުތަކުގެ ސަބަބުން ރާއްޖޭގެ އިގުތިސޯދަށް ވަރަށްބޮޑު ގެއްލުމެއް ލިބިގެންދިޔަކަމަށާއި، ދައުލަތުގެ އާމްދަނީގެ ބޮޑުބައެއް ސިއްހީ ކުއްލި ހާލަތު މެނޭޖުކުރުމަށް ހޭދަކުރަންޖެހުނުކަމަށް ވެސް ރައީސް ސޯލިހު ވިދާޅުވި އެވެ.
ކޮވިޑުގެ ގެއްލުމުން އަރައިގަތުމަށް ގައުމުތަކަށް އެހީތެރިވުމަށް އދ. އިން ކުރަމުން ގެންދާ މަސައްކަތް ފާހަގަ ކުރައްވަމުން ރައީސް ވިދާޅުވީ، ދުނިޔޭގެ ހުރިހާ ކަންކޮޅުތަކަށް ހަމަހަމަ ކަމާއެކު ވެކްސިން ފޯރުކޮށްދިނުމަށް ފަށާފައިވާ ކޯވެކްސް ޕްރޮގްރާމް ފަދަ މުހިންމު މަސައްކަތްތަކަށް އެއްބާރުލުންދީ، ހުރިހާ ގައުމުތައް އެކުގައި މަސައްކަތްކޮށް، ކޯވިޑް 19 ޕެންޑެމިކް ނިމުމަކަށް ގެނައުމަށް މަސައްކަތްކުރުމުގެ މުހިންމުކަމާއި އދ. އިން އުފައްދާފައިވާ ކޯވިޑް 19 ރެސްޕޮންސް އެންޑް ރިކަވަރީ ފަންޑުގެ ސަބަބުން ދުނިޔޭގެ އެކި ގައުމުތަކަށް އަދި ވަކިން ހާއްސަކޮށް ތަރައްގީވަމުން އަންނަ ކުދި ޖަޒީރާ ގައުމުތަކަށް ބޭނުންވާ އެހީތެރިކަން ލިބިގެންދާނެ ކަމަށް އުއްމީދު ކުރައްވާ ކަމަށެވެ.
ސެކްރެޓަރީ ޖެނެރަލް ގުޓާރޭޒް ވިދާޅުވީ މައިގަނޑު ގޮތެއްގައި ފާހަގަ ކުރެއްވީ، މުޅިދުނިޔެއިން މިހާރު ކުރިމަތިލާން ޖެހިފައިވާ ކޯވިޑް 19ގެ ޕެންޑަމިކްގެ ތެރޭގައި، ތަރައްގީވަމުން އަންނަ ގައުމުތަކަށް މާލީ ގޮތުން ކުރިމަތިވެފައިވާ ދަތިތަކަށް ލުއި ފަސޭހަގޮތްތަކެއް ހޯދައިދިނުން މުހިންމު ކަމަށެވެ.
އަދި ކޯވިޑް 19ގެ ސަބަބުން ދިމާވި ދަތިތަކުން އަރައިގަނެ ގައުމު އަލުން އާރާސްތްކުރުމަށް ރާއްޖެއިން ކުރަމުންގެންދާ މަސައްކަތަށް އެއްބާރުލުން ލިބިގެންދާނެކަމަށް ވެސް ގުޓާރޭޒް ވިދާޅުވި އެވެ.
ސެކްރެޓަރީ ޖެނެރަލް ގުޓާރޭޒްއާއެކު ބޭއްވެވި ބައްދަލުވުމުގައި މޫސުމީ ބަދަލުތަކުގެ ނުރައްކަލާ ބެހޭ ގޮތުން ރައީސް ސޯލިހު ވިދާޅުވީ މި ނުރައްކާ އެންމެބޮޑަށް ހުށަހެޅިފައިވާ ކުދި ޖަޒީރާ ގައުމުތަކަށް، މިކަމުން އަރައިގަތުމަށް ބައިނަލްއަގުވާމީ މުޖްތަމައުގެ އެހީތެރިކަމަށް ބޭނުންވެފައިވާކަން ވަރަށް ސާފުކަމަށެވެ.
މި ބައްދަލުކުރެއްވުން ނިންމަވާލައްވަމުން، ރައީސް ސޯލިހު ވަނީ އދ.ގެ ސެކްރެޓަރީ ޖެނެރަލްގެ ލީޑަރޝިޕްގެ ދަށުން ކޯވިޑް 19ގެ ބަލިމަޑުކަމާ ދެކޮޅަށް އެޖަމާއަތުން ކުރަމުންގެންދާ މަސައްކަތްތަކަށް ޝުކުރު އަދާކުރައްވައި، އދ. އާއި ރާއްޖެއިން އިސްކަންދޭ މުހިންމު މައްސަލަތަކާބެހޭގޮތުން މަޝްވަރާކުރެއްވުމަށްޓަކައި ވަގުތުކޮޅެއް ހުސްކޮށްދެއްވީތީ ސެކްރެޓަރީ ޖެނެރަލްއަށް ޝުކުރު އަދާކުރައްވާފައެވެ.
އދ. އާންމު މަޖިލީހުގެ 76 ވަނަ ސެޝަނުގައި ބައިވެރިވެވަޑައިގެންނެވުމަށް ރައީސް ސޯލިހުގެ ދެކަނބަލުން އެމެރިކާގެ ނިއު ޔޯކަށް ފުރާވަޑައިގަތީ ހޮނިހިރު ދުވަހު އެވެ. އދ. ގައި ރައީސް ތަގުރީރުކުރައްވާނީ މިއަދު އެވެ.
