ބެއިރޫތު، ލުބްނާން (ސެޕްޓެމްބަރު 19) - ފާއިތުވި ހަފުތާ ބަންދުގައި އަފްގާނިސްތާނުގެ ޖަލާލްއާބާދު ސިޓީގައި ދިން ހަމަލާތަކުގެ ޒިންމާ އިސްލާމި ސްޓޭޓް ހޮރަސާން (އައިއެސް-ކޭ) އިން އުފުލައިފި އެވެ.
އައިއެސްގެ ޕްރޮޕެގެންޑާ ފަތުރާ އަމަގް އިން ނެރުނު ދެ ބަޔާނެއްގައި ބުނެފައި ވަނީ ތާލިބާނުންގެ ތިން އުޅަނދަކަށް އަމާޒުކޮށް ތިން ބޮމުގެ ހަމަލާ ދިނީ ހޮނިހިރު ދުވަހު ކަމަށާއި އިތުރު ހަމަލާއެއް އާދީއްތަ ދުވަހު ވެސް ދިން ކަމަށެވެ.
އަފްގާން މީޑިއާ އިން ރިޕޯޓު ކުރާ ގޮތުގައި އާދީއްތަ ދުވަހު ބޮން ގޮއްވާލާފައި ވަނީ ޖަލާލްއާބާދުގައި ތާލިބާން ހަނގުރާމަވެރިން ގޮވައިގެން ދަތުރު ކުރަމުން ދިޔަ ޕިކަޕެކެވެ.
މަންޒަރު ދުށް މީހުން ނޫސްތަކަށް ބުނީ އަނިޔާވެގެން ގިނަ އަދަދެއްގެ ތާލިބާން ހަނގުރާމަވެރިން ހޮސްޕިޓަލްތަކަށް ގެންދިޔަ ކަމަށެވެ. ބޮން ގޮއްވާލީ ޖަލާލްއާބާދުން ވެރިރަށް ކާބުލްއަށް ދާން ދަތުރު ފަށާ ހިސާބުގަ އެވެ.
ހޮނިހިރު ދުވަހު ދިން ހަމަލާތަކުގައި ދެ މީހުން މަރުވި އެވެ. އެއީ އޯގަސްޓު 30 ވަނަ ދުވަހު އެމެރިކާގެ އެންމެ ފަހު ފައުޖުތައް އަފްގާން ފަސްގަނޑުން ދިޔަ ފަހުން ދިން ފުރަތަމަ ނުރައްކާތެރި ހަމަލާތަކެވެ.
އޯގަސްޓު މަހުގެ ފަހުކޮޅު، ކާބުލް އެއާޕޯޓު ބޭރުގައި ހަމަލާދީ 100 އަށް ވުރެ ގިނަ މީހުން މަރާލުމުގެ ޒިންމާ ވެސް އުފުލާފައި ވަނީ އައިއެސް-ކޭ އެވެ.
އަފްގާނިސްތާނުގެ އިރުމަތީގައި އޮންނަ ޖަލާލްއާބާދަކީ ނަންގަހާރް ޕްރޮވިންސްގެ ވެރިރަށެވެ. އައިއެސްގެ އަފްގާނިސްތާނުގެ ގޮފި ގާއިމްވެފައި ވަނީ އެ ތަނުގަ އެވެ.
އައިއެސް އާއި ތާލިބާނުންގެ މެދުގައި ދީނުގެ މަޒުހަބީ ހިޔާލުތަފާތުވުންތަކާއި އަސްކަރީ ސްޓްރެޓެޖީގެ ގިނަ ކަންކަމުގައި ހިޔާލު ތަފާތުވުން އޮވެ އެވެ. މިހާތަނަށް ތާލިބާނާއި އައިއެސް އިން ދެ ހަނގުރާމަ ކޮށްފައި ވެ އެވެ.
