ކާބުލް، އަފްގާނިސްތާން (ސެޕްޓެމްބަރު 18) - އަފްގާނިސްތާނުގައި އަންހެން ދަރިވަރުންނާއި އަންހެން ޓީޗަރުން ބައިވެރި ނުކޮށް، ސާނަވީ ތައުލީމް ދޭ ސްކޫލުތައް ހުޅުވަން ތާލިބާން ސަރުކާރުން އަންގައިފި އެވެ.
މިދިޔަ މަހު ތާލިބާނުން ވެރިކަމަށް އައުމަށް ފަހު ބުނީ އަންހެނުންނާއި އަންހެން ކުދިންގެ ހައްގުތަކަށް އިހްތިރާމް ކުރާނެ ކަމަށެވެ. ނަމަވެސް އެ ވައުދާ އެއް ގޮތަށް އަމަލު ކުރާ މަންޒަރު އަދި ނުފެނެ އެވެ.
މީގެ ކުރިން 1990 ގެ އަހަރުތަކުގައި ތާލިބާނުން ވެރިކަން ކުރިއިރު ވެސް އަންހެން ކުދިން ސްކޫލަށް ދިޔުން އޮތީ މަނާކޮށްފަ އެވެ. އަދި އަންހެނުން ވަޒީފާ އަދާ ކުރުން ވެސް އޮތީ މަނާކޮށްފަ އެވެ.
"ހުރިހާ ފިރިހެން ޓީޗަރުންނާއި ދަރިވަރުން ތައުލީމު ދޭ އިދާރާތަކަށް ނުކުންނަން ޖެހޭނެ،" ހޮނިހިރު ދުވަހު ކްލާސްތައް އަލުން ފެށުމާ ގުޅޭ ގޮތުން ރޭ ނެރުނު ބަޔާނެއްގައި ބުންޏެވެ.
އަންހެން ދަރިވަރުންނާއި އަންހެން ޓީޗަރުން އަމަލު ކުރަންވީ ގޮތުގެ އެއްވެސް ވާހަކައެއް ބަޔާނުގައި ނެތެވެ.
އުމުރުން 13 އަހަރާއި 18 އަހަރާ ދެމެދު ކުދިން ކިޔަވަން ދާ ސާނަވީ ތައުލީމު ދޭ ސްކޫލުތައް އާއްމު ގޮތެއްގައި އަފްގާނިސްތާނުގައި ހިންގަނީ ދެ ޖިންސުގެ ކުދިންނަށް ވަކިންނެވެ.
ކޮވިޑް ބަލިމަޑުކަމާ ހެދި ސްކޫލުތައް ވަރަށް ގިނައިން ބަންދުކުރަން ޖެހެ އެވެ. އަދި މިދިޔަ މަހު ތާލިބާނުން ވެރިކަމަށް އައުމަށް ފަހު އިއްޔެއާ ހަމައަށް ވެސް ސްކޫލުތައް ބަންދެވެ.
މީގެ ކުރިން އޮތް ތާލިބާން ވެރިކަން 2001 ގައި ވެއްޓުމާއެކު އަފްގާނިސްތާނުގެ ތައުލީމީ ދާއިރާ ވަނީ ކުރިއެރުންތަކެއް ހޯދާފަ އެވެ. އެގޮތުން އަންހެން ކުދިންގެ ސްކޫލުތައް ތިން ގުނަ އިތުރުވެ، އަންހެނުން ލިޔަންކިޔަން ދަންނަ ނިސްބަތް 30 ޕަސެންޓަށް މައްޗަށް ޖެހުނެވެ. ނަމަވެސް އެ ބަދަލު ބޮޑަށް އައީ ސިޓީތަކަށެވެ.
އދ. އިން ބުނީ އަންހެން ކުދިންގެ ތައުލީމަށް އަފްގާނިސްތާނުގައި ވާނެ ގޮތަކާ މެދު ވަރަށް ބޮޑަށް ކަންބޮޑުވާ ކަމަށެވެ.
"އެއްވެސް ލަސް ކުރުމެއް ނެތި، ފުރާވަރު އުމުރުގެ ކުދިން ހިމެނޭހެން، ހުރިހާ އަންހެން ކުދިންނަށް ވެސް ތައުލީމު އަލުން ފެށުން ވަރަށް މުހިއްމު. އެކަން ކުރެވޭނީ އަންހެން ޓީޗަރުން މަސައްކަތަށް ނެރިގެން،" ޔުނިސެފުން ބުންޏެވެ.
ޕްރައިމަރީ ސްކޫލުތައް ހުޅުވާފައި ވަނީ ދެ ޖިންސުގެ ކުދިންނަށެވެ. ނަމަވެސް އަންހެން ކުދިންނާއި ފިރިހެން ކުދިންގެ ކުލާސްތައް ބާއްވަނީ ވަކިންނެވެ. ޕްރައިމަރީ ސްކޫލުތަކުގައި ބައެއް އަންހެން ޓީޗަރުން ވަނީ ވަޒީފާއަށް ނުކުންނަން ފަށާފަ އެވެ.
ތާލިބާން ސަރުކާރުން ވަނީ އަންހެނުންނަށް ޔުނިވާސިޓީއަށް ދެވޭނެ ކަމަށް ވެސް ބުނެފަ އެވެ. ނަމަވެސް ހެދުން އެޅުމާއި، ޔުނިވާސިޓީއަށް ވަދެ ނުކުތުމުގައި ގިނަ ފިޔަވަޅުތަކަކަށް ބޯލަނބަން ޖެހެ އެވެ.
