އޭއެފްސީ ވިމެންސް އޭޝިއަން ކަޕް ކޮލިފައިންގައި ވާދަކުރަން ގައުމީ އަންހެން ޓީމު މިއަދު ތަޖިކިސްތާނަށް ފުރިއިރު، ޓީމަށް އޮތީ ނަތީޖާ ނެރުމެކޭ އެއްވަރަށް މުސްތަގުބަލަށް ކަނޑައަޅާފައިވާ ޓާގެޓެއް ކަމަށް ޓީމުގެ ހެޑް ކޯޗުގެ ޒިންމާއާ ހަވާލުވެހުރި އެފްއޭއެމްގެ ޓެކްނިކަލް ޑިރެކްޓަރު އަހުމަދު ޝަރީފް (ޑުންގާ) ވިދާޅުވެއްޖެ އެވެ.
އެގާރަ ވަރަކަށް އަހަރަށް ފަހު ގައުމީ އަންހެން ޓީމުން އޭޝިއާ މުބާރާތުގެ ކޮލިފައިން އަށް ނުކުންނައިރު، މި ފަހަރުގެ އަންހެން ޓީމުގައި އޮތީ ނިސްބަތުން ޒުވާން ސްކޮޑެކެވެ. މިހާރު އޮތް އަންހެން ޓީމުގެ އެވްރެޖް އުމުރު އުޅެނީ 21 އަހަރުގަ އެވެ.
ކޮލިފައިިން މެޗުތަކަށް ފުރުމުގެ ކުރިން ދިން އިންޓަވިއުއެއްގައި، ޑުންގާ ވިދާޅުވީ ނަތީޖާ ނެރުން ވެސް މުހިއްމު ކަމަށާއި އެކަމަކު މި ވަގުތުގެ ހާލަތަށް ބަލާއިރު އެންމެ ބޮޑު އެއް ބޭނުމަކީ މި އޮތް ޒުވާން ސްކޮޑަށް ކުރިއަށް ދެވޭނެ މަގެއް ދައްކައިދީ ދުރުރާސްތާގައި ހާސިލްކުރެވޭނެ ޓާގެޓްތަކަކަށް މަސައްކަތް ކުރުން ކަމަށެވެ.
އަންހެން ޓީމުން ކޮލިފައިންގައި ވާދަކުރަން ޖެހޭ ގްރޫޕްގައި އެންމެ ފުރަތަމަ ރާއްޖެ އާއި ތަޖިކިސްތާންގެ އިތުރުން ވިއެޓްނާމް އަދި އަފްގާނިސްތާން ހިމެނުނެވެ.
އެކަމަކު، ފަހުން ސިޔާސީ ހަލަބޮލިކަމާ ހުރެ އަފްގާނިސްތާނަށް ޖެހުނީ މުބާރާތުން ވަކިވާށެވެ. މިހާރު ކޮލިފައިން މެޗުތައް ތިން ޓީމުގެ މެދުގައި ކުރިއަށްދާއިރު، ރާއްޖެ ކުޅޭ މެޗުތައް އޮންނާނީ 23 ވަނަ ދުވަހު ވިއެޓްނާމާ ދެކޮޅަށާއި 26 ވަނަ ދުވަހު ތަޖިކިސްތާނާ ދެކޮޅަށެވެ.
ޑުންގާ އަށް އެހީތެރިވުމުގެ ގޮތުން އެސިސްޓަންޓް ކޯޗުންނަށް ތިބީ ގައުމީ އަންހެން ޓީމުގެ ކެޕްޓަނެއްގެ ޒިންމާ މީގެ ކުރިން އަދާކުރި ދެ ކުޅުންތެރިން ކަމަށްވާ ފަދުވާ ޒާހިރު އާއި މަރިޔަމް މިރުފަތު އެވެ. މިރުފަތާއި ފަދުވާ އަކީ ގައުމީ އަންހެން ޓީމަށް ގިނަ އަހަރުތަކެއް ވަންދެން ކުޅުނު ދެ ކުޅުންތެރިންނެވެ. ގައުމީ އަންހެން ޓީމުގައި މުސްތަގުބަލު މަސައްކަތްކުރާނީ މުޅިން ވެސް އަންހެން އޮފިޝަލުންނަށް ހެދުމުގެ އަމާޒުގައި އަންނަ އަހަރު އެފްއޭއެމުން ބަދަލުތަކެއް ގެންނާނެ ކަމަށް އެ އެސޯސިއޭޝަނުން ވަނީ މީގެ ކުރިން ބުނެފަ އެވެ.
ގައުމީ އަންހެން ޓީމުން ވަނީ ކޮލިފައިން އަށް ތައްޔާރުވުމުގެ ގޮތުން ބ. އޭދަފުށީ ޓީމަކާ ދެކޮޅަށް މެޗެއް ކުޅުމުގެ އިތުުރުން ޔޫއޭއީގައި ޓްރެއިނިން ކޭމްޕެއް ފުރިހަމަކޮށް އެ ޓީމާ ދެކޮޅަށް މެޗުތަކެއް ކުޅެ ކުރިއެރުންތަކެއް ހޯދައިފަ އެވެ.
އޭޝިއަން ވިމެންސް ޗެމްޕިއަންޝިޕްގެ ކޮލިފައިންގައި ރާއްޖޭން، 2008 އާއި 2014 އަދި 2018 ވަނަ އަހަރު ކުޅެފައެއް ނުވެ އެވެ. ރާއްޖޭން ވާދަކުރީ 2006 އާއި 2010 ވަނަ އަހަރު ވިމެންސް އޭޝިއަން ކަޕް ކޮލިފައިންގަ އެވެ.
ކޮލިފައިންގައި ވާދަކުރާ ގައުމީ އަންހެން ސްކޮޑު:
އައިޝަތު ސިއުނާ، އައިމިނަތު ލީޒާ، އައިމިނަތު ޝަފްނާ، އަރީފާ އަބްދުﷲ، ފާތިމަތު އަފްޒާ، ފާތިމަތު ސައިނާ، ފާތިމަތު ސާލިޔާ، ފާތިމަތު ތާނީ ލަތީފް، ފާތިމަތު ތީބާ، ހައްވާ ހަނީފާ، މަރިޔަމް ރިފާ، މަރިޔަމް ވިޝާޔާ ވިލްދާން، ރާނިޔާ އިބްރާހިމް، މަރިޔަމް ނޫރާ، ފަރާ އަހުމަދު، ސައިގާ ހުސެއިން، ޝިޔާނާ އަހުމަދު ޒުހެއިރު، ޝަހުލާ ތައުފީގު، އައިޝަތު އީމާން އަހުމަދު ޒައީމް، އައިމިނަތު ސަފާ، ސުމާ މުހައްމަދު، ޒުލައިހާ ހަބީބް
