އިނގިރޭސި ވިލާތު ރައްޔިތުންނަށް ކަރަންޓީނު ނުވެ ދަތުރުކުރެވޭ ގައުމުތަކުގެ ލިސްޓުން އެންމެ ފަހުން ރާއްޖެ އަރައިފި އެވެ.
އިނގިރޭސިވިލާތުގެ ސެކްރެޓަރީ އޮފް ސްޓޭޓް ފޯ ޓްރާންސްޕޯޓް ގްރޭންޓް ޝެޕްސް މިރޭ ކުރެއްވި ޓްވީޓެއްގައި ވިދާޅުވެފައިވަނީ ރާއްޖެ، ޕާކިސްތާން އަދި ތުރުކީވިލާތް ހިމެނޭ ގޮތަށް އަށް ގައުމެއް އިނގިރޭސި ރެޑް ލިސްޓުން އަންނަ ބުދަ ދުވަހު އުނިކުރާނެ ކަމަށެވެ.
އަދި އޮކްޓޯބަރު 4 ގެ ފަހުން މި ގައުމުތަކުން ވެކްްސިން ފުރިހަމަކޮށްފައިވާ ފަރާތްތަކުން އިނގިރޭސިވިލާތަށް ދަތުރުކުރާނަމަ، ދަތުރުކުރުމުގެ ކުރިން ކޮވިޑްގެ ޕީސީއާރު ޓެސްޓެއް ފުރިހަމަކުރާކަށް ނުޖެހޭނެ ކަމަށް ޝެޕްސް ވިދާޅުވި އެވެ.
އަދި އަންނަ މަހުން ފެށިގެން ޕީސީއާރަށް ވުރެ އަގުހެޔޮ ޓެސްޓުތައްވެސް އެގައުމުން ގަބޫލުކުރާނޭ ކަމަށް ޝެޕްސް ޓްވިޓާގައި ވިދާޅުވި އެވެ.
ރާއްޖެ އިނގިރޭސިވިލާތުގެ ރެޑް ލިސްޓަށް އިތުރުކުރީ ކޮވިޑްގެ ހަތަރުވަނަ ރާޅު ރާއްޖެއަށް ބިންދާލި މޭ މަސް ތެރޭގަ އެވެ. އޭގެ ފަހުން ރާއްޖެއިން އިނގިރޭސިވިލާތަށް ދަތުރުކުރާ ފަރާތްތައް ކަރަންޓީނުވާ ގޮތަށް އެގައުމުން ވަނީ ނިންމައިފަ އެވެ. މޭ މަސްތެރޭގައި ރާއްޖެއިން ވަނީ ދުވާލެއްގެ މައްޗަށް 1،000 ވުރެ ގިނަ ކޭސް ގިނަ ދުވަސްތަކެއް ވަންދެން ފެނިފަ އެވެ.
އެހެންނަމަވެސް ކޮވިޑްގެ ހާލަތު ރާއްޖޭގައި މިފަހުން އައިސް ރަނގަޅުވާން ފެށުމާއެކުގައި ވެސް ބައެއް ކަހަލަ ކަންކަން ފުރިހަމަ ނުވެ ހުރުމުން، ޔޫކޭ އިން ރާއްޖެ ރެޑް ލިސްޓުން އުނިކޮށްފައެއް ނުވެ އެވެ. އެކަމާ ގުޅިގެން ރާއްޖޭގެ ކަމާބެހޭ ބައެއް ފަރާތްތަކުން ވަނީ މީގެ ކުރިން ކަންބޮޑުވުން ވެސް ފާޅުކޮށްފަ އެވެ.
މިހާރު ކޮވިޑުގެ ހާލަތު ރާއްޖޭގައި ރަނގަޅުވެފައިވާއިރު، ރާއްޖޭގެ ޕޮޒިޓިވިޓީ ރޭޓް އެންމެ ފަހުގެ ތަފާސްހިސާބުތަކުން ދައްކާ ގޮތުގައި ހުރީ ތިން ޕަސެންޓްގަ އެވެ. އަދި ދުވާލެއްގެ މައްޗަށް ފެންނަ ކޭސްތަކުގެ އަދަދު ވެސް މިވަނީ 100 އިން ދަށަށް ދާން ފަށާފަ އެވެ. އެކްޓިވް ކޭސްތައް ހުރީ 1،774 ގަ އެވެ.
ރާއްޖޭގެ އާބާދީގެ ބޮޑު އިންސައްތައެއް މިހާރު ވެކްސިން ފުރިހަމަކޮށްފައިވާއިރު، ވެކްސިން ފުރިހަމަ ކުރި މީހުންގެ ޖުމްލަ އަދަދު ރެއާއި ހަމަޔަށް ހުރީ 328،630 ގަ އެވެ.
އިނގިރޭސި ވިލާތަކީ ރާއްޖޭގެ ޓޫރިޒަމަށް މުހިންމު މާކެޓެކެވެ. އަދި މި ބަލިމަޑުކަމުގެ ތެރޭގައި ވެސް ރާއްޖެއަށް އެންމެ ގިނައިން ޓޫރިސްޓުން އަންނަ ގައުމުތަކުގެ ތެރޭގައި އެ ގައުމު ހިމެނެ އެވެ. ނަމަވެސް ރާއްޖޭގެ ކޮވިޑުގެ ހާލަތު ގޯސްވެ މި އަހަރުގެ މެއި މަހު ރަތް ލިސްޓަށް އެރި ފަހުން އެ ގައުމުން އަންނަ ޓޫރިސްޓުންގެ އަދަދުތައް ވަނީ ވަރަށް ބޮޑަށް މަދުވެފަ އެވެ.
މިއީ ރާއްޖޭގައި ކޮވިޑް ނަމްބަރުތައް ކޮންޓްރޯލް ކުރެވުނު ފަހުން މި ލިސްޓު އަޕްޑޭޓް ކުރި ތިން ވަނަ ފަހަރެވެ. މި ލިސްޓު މުރާޖާކުރަނީ ކޮންމެ ތިން ހަފުތާއަކުންނެވެ.
ފުރަތަމަ ދެ ފަހަރު ރާއްޖެ, ރެޑް ލިސްޓުގައި ހިމެނުމުން ސަރުކާރަށް ފާޑުކިޔުން ވެސް އަމާޒުވި އެވެ.
