މާލޭ މަގުމަތައް މަތީ މިއަދު ބަހައްޓާފައި ހުރި ކުނި ނެގުމަށްފަހު ބޮޑު ޑަމްޕަރު ޕިކަޕެއްގައި ގޮސް ވެމްކޯ ކުނިއެއްކުރާ މަރުކަޒު ދޮރުމައްޗަށް އޮއްސާލީ "އެރި އޮޅުންތަކެއްގެ" ސަބަބުން ކަމަށާއި އެއީ ނާތަހުޒީބީ އަމަލެއްކަން ގަބޫލުކުރާ ކަމަށް ސިޓީ ކައުންސިލުން ބުނެފި އެވެ.
ކޮވިޑް-19 އާއެކު މާލޭގެ ކުނި ނެގުމުގެ ހިދުމަތްދެމުން އަންނަ ވެމްކޯއިން ވަނީ މިދިޔަ އަހަރު ގޭގެއަށްވަދެ ކުނި ނެގުމުގެ ހިދުމަތް ހުއްޓާލައިފަ އެވެ. އަދި ވެއެތުވެދިޔަ އަހެރެއްހާ ދުވަހު ކުނި ގެންގޮސްފައި ވަނީ ގޭބީސީތަކުން މަގުމައްޗަށް ކުނި ނެރުމުންނެވެ.
އެކަމަކު، މާލޭގެ މަގުތައް މތީ ކުނި ނުބެހެއްޓުމަށް ކައުންސިލުން އެންގުމުން ވެމްކޯއިން ނިންމާފައި އޮތީ އިއްޔެ އިން ފެށިގެން ގޭގެއަށް ވަދެ ކުނި ނަގާ ގޮތަށެވެ. އަދި ބޭރުގައި ބަހައްޓާ ކުނި ވެމްކޯއިން ނުނަގާނެ ކަމަށް ވެސް އެ ކުންފިން ވަނީ ބުނެފަ އެވެ.
އެހެން ކަންތައް އޮއްވާ އިއްޔެ ވެސް ބައެއް ގޭބީސީތަކުން ވަނީ މަގު މައްޗަށް ކުނި ނެރެފަ އެވެ. އެ ކުނިތަކެއް ވެމްކޯއިން ނުގެންދެ އެވެ. އަދި ބައެއް ގޭބީސީތަކަށް އިއްޔެ ކުނި ނަގަން ވެމްކޯއިން ނާންނާތީވެ، ކުނި ކޮތަޅު މަގުމައްޗަށް ނެރެންޖެހުނެވެ.
އެގޮތަށް މަގުމަތީ ބަހައްޓާގައި ހުރި ކުނި ކޮތަޅުތައް ބޮޑު ޕިކަޕަކަށް އެއްކޮށް މާލޭ ސިޓީ ކައުންސިލުން ވެމްކޯގެ ކުނި އެއްކުރާ މަރުކަޒަށް އޮއްސާލާފައި ވަނީ މިއަދު ހެނދުނު 10:00 ޖަހާކަންހާއިރެވެ. ނަމަވެސް އެކަމާ ގުޅޭ ގޮތުން މެންދުރު ބޭއްވި ނޫސްވެރިންގެ ބައްދަލުވުމެއްގައި ކައުންސިލްގެ ޑެޕިއުޓީ މޭޔަރު އަހުމަދު ނަރީޝް ވިދާޅުވީ އެއީ ނާތަހުޒީބު އަމަލެއް ކަމަށާއި އެ ކަމަށް މައާފަށް އެދޭ ކަމަށެވެ.
"މިސްކޮމިއުނިކޭޝަންތަކެއް ހިނގައިގެން އަޅުގަނޑުމެންގެ ޑަމްޕް ލޮރީ ދުއްވަން އިން ޑުރައިވަރަށް އަޅުގަނޑުމެންގެ އެކޮޅަށް ދިޔަ ސްޕަވައިޒަރުންނާ ހިނގި މިސްކޮމިއުނިކޭޝަންއަކާ ގުޅިގެން ވެމްކޯގެ ދޮރުމައްޗަށް ކުނިތައް ބަންޑުން ކޮށްލި މަންޒަރު އަޅުގަނޑުމެންނަށް ވީޑިއޯތަކުން ފެނިގެން ނޫސްވެރިން ސުވާލު ކުރަމުން ދިޔަ،" އޭނާ ވިދާޅުވި އެވެ.
އޭނާ ވިދާޅުވީ ކުނި އެޅި މައްސަލަ ވަގުތުން ބަލަން ފަށައި އެ ކުނިތައް ނެގުމުގެ މަސައްކަތް އެވަގުތު ފެށި ކަމަށެވެ. އަދި މިހާރު ސިޓީ ކައުންސިލްގެ ޕިކަޕުތައް ވެމްކޯ ސައިޓަށް ވައްދަމުން ދާ ކަމަށް ވެސް އޭނާ ވިދާޅުވި އެވެ.
ނަރީޝް ވިދާޅުވީ މާލޭން ކުނި ނެގުމަށް ވެމްކޯއާ ހަވާލުކޮށް ސިޓީ ކައުންސިލުން މަހެއްގެ މައްޗަށް 3.1 މިލިއަން ރުފިޔާ ދައްކަމުން އަންނަ ކަމަށެވެ. އެހެންކަމުން އާއްމު ރައްޔިތުން މަގުތަކަށް ނެރޭ ކުނިވެސް ވެމްކޯއިން ނަގަން ޖެހޭނެ ކަމަށް އޭނާ ވިދާޅުވި އެވެ.
"ހަމަ ޔަގީނުންވެސް މާލޭ ސިޓީ ކައުންސިލާ އެކު ހަދާފައިވާ އެގްރިމެންޓް ބުނާ ގޮތުން މާލޭ ސިޓީގެ އެއްވެސް މަގެއްގައި ކުންޏެއް ހުރެގެން ނުވާނެ. އެ ކުނިތައް ނަގަން ޖެހޭނެ،" ނަރީޝް ވިދާޅުވި އެވެ.
