ކޮލަމްބޯ، ސްރީ ލަންކާ (ސެޕްޓެމްބަރު 15) - މަސްތުވެ ހުރެ ގައިދީންތަކަކަށް ބިރު ދެއްކި ކަމަށް ތުހުމަތު ކުރެވޭ ސްރީ ލަންކާގެ ޖަލުތަކާ ބެހޭ ޖޫނިއާ މިނިސްޓަރު އިސްތިއުފާ ދެއްވައިފި އެވެ.
ލޯހަން ރަޓްވައްޓެގެ މައްޗަށް ތުހުމަތު ކުރެވެނީ ރާ ބޮއެގެން މަސްތުވެ ހުރެ، ތަމަޅަ ގައިދީއެއްގެ ބޮލަށް ބަޑި ދިއްކޮށް ގަދަކަމުން އިއުތިރާފުގެ ބަޔާނެއް ނަގަން އުޅުނު ކަމަށާއި އިތުރު ގައިދީންތަކެއް މަރަން އިންޒާރު ދިން ކަމަށެވެ.
ރަޓްވައްޓެގެ އިސްތިއުފާގެ ސިޓީގައި އެ ތުހުމަތަކީ ތެދެއް ނުވަތަ ދޮގެއް ކަމަށް ވެސް ވިދާޅެއް ނުވެ އެވެ.
"އަޅުގަނޑު އިސްތިއުފާ ދޭން ނިންމީ، މިހާރު ފެތުރެމުންދާ މީޑިއާ ރިޕޯޓުތަކުގެ ސަބަބުން ސަރުކާރަށް ލަދަކާ ކުރިމަތިލާން ޖެހިދާނެތީ," އޭނާ ވިދާޅުވި އެވެ.
ލަންކާގައި 78 ތަމަޅައިން ބަންދުކޮށްފައި ތިބޭތާ އެތައް އަހަރެއް ވެއްޖެ އެވެ. އދ. އިންސާނީ ހައްގުތަކާ ބެހޭ ކައުންސިލުން ވަނީ އެ މީހުން މިނިވަން ކުރުމަށް ނުވަތަ ޝަރީއަތް ހިންގުމަށް ބާރު އަޅާފަ އެވެ.
"އޭނާ [ރަޓްވައްޓެ] ވަނީ އަށް ގައިދީންގެ ގޮޅީގެ ތެރެއިން ނެރި ކުޑަކަކޫ މައްޗަށް ތިރިކޮށްފައި،" ޑެރަނަ ޓީވީން ރިޕޯޓު ކުރި އެވެ.
"އޭގެ ފަހުން ގައިދީއެއްގެ ބޮލުގައި ފިސްތޯލައެއް ތިން ފަހަރު ޖައްސާ ބިރު ދެއްކި. އެ މީހުން ކައިރީ އޭނާ ބުނީ މިނިވަން ވާނެ ބަޔަކު ނިންމާނެ އަހަރުމެން [ސަރުކާރު] ކަމަށް."
ތަމަޅަ ސިޔާސީ ޕާޓީތަކުން ބުނީ ރަޓްވައްޓެ މަސައްކަތް ކުރީ ލަންކާގެ ދާހިލީ ހަނގުރާމައިގައި ތަމަޅަ ޓައިގަރުންނާއެކު އެ މީހުން ބައިވެރިވި ކަމަށް އެއްބަސްކުރުވަން ކަމަށެވެ.
ރިޕޯޓުތައް ބުނާ ގޮތުން ކޮލަމްބޯގެ އުތުރުން އޮންނަ އަނޫރާދަޕޫރާގެ ޖަލަށް ގޮސް ރަޓްވައްޓެ އެ އަމަލު ހިންގީ މިދިޔަ އާދީއްތަ ދުވަހު އެވެ.
ޑެރަނަ ޓީވީން ބުނީ އޭގެ ހަފުތާއެއް ކުރިން ކޮލަމްބޯގައި ހުންނަ ވެލިކަޑަ ޖަލަށް ގޮސް، އެ ތަނުގެ ގާޑުންނާ ވެސް އޭނާ ހަޑި ހުތުރު ބަހުން މުއާމަލާތް ކުރި ކަމަށެވެ.
މީޑިއާތަކުން ރިޕޯޓު ކުރި ގޮތުގައި ދެ ހާދިސާ ހިނގިއިރު ވެސް ރަޓްވައްޓެ ހުރީ މަސްތުގެ ހާލަތުގަ އެވެ.
ރައީސް ގޮތަބަޔަ ރާޖަޕަކްސަގެ އޮފީހުން ބުނީ ވެލިކަޑަ އަދި އަނޫރާދަޕޫރާ ޖަލުގައި ހިންގި ކަންކަމުގެ ޒިންމާ ނެގުމުގެ ގޮތުން ރަޓްވައްޓެ އިސްތިއުފާ ދިން ކަމަށެވެ.
ރަޓްވައްޓެގެ ތަރުޖަމާނަކު ބުނީ ޖަލުތަކާ ބެހޭ ޖޫނިއާ މިނިސްޓަރު ކަމުން އިސްތިއުފާ ދިން ނަމަވެސް ޖަވާހިރާ ގުޅޭ ސިނާއަތުގެ ސްޓޭޓް މިނިސްޓަރުގެ ގޮތުގައި އޭނާ ދެމިހުންނާނެ ކަމަށެވެ.
ލަންކާގެ މައިނޯރިޓީ ތަމަޅައިން ރަމްޒު ކުރާ އެންމެ ބޮޑު ޕާޓީ، ޓެމިލް ނޭޝަނަލް އެލަޔަންސް (ޓީއެންއޭ) އިން ވަނީ ރަޓްވައްޓެ ހައްޔަރުކޮށް "ގައިދީން މަރަން އިންޒާރު ދިން މައްސަލަ ތަހުގީގު ކުރަން" ގޮވާލާފަ އެވެ.
