ކާބުލް، އަފްގާނިސްތާން (ސެޕްޓެމްބަރު 15) - އަފްގާނިސްތާނުގެ ކުރީގެ ސަރުކާރުގެ އޮފިޝަލުންގެ ގެތަކުން 12 މިލިއަން ޑޮލަރުގެ ނަގުދު ފައިސާ އާއި ރަން ތާލިބާނުންގެ ބެލުމުގެ ދަށަށް ގެންގޮސްފައިވާ ކަމަށް އެ ގައުމުގެ މަރުކަޒީ ބޭންކުން ބުނެފި އެވެ.
ތާލިބާނުން ވެރިކަމަށް އައިތާ އެއް މަސް ފަހުން އަފްގާނިސްތާނަށް ވަނީ ބޭރު ފައިސާގެ ދަތިކަން ވަރަށް ބޮޑަށް ކުރިމަތިވެފަ އެވެ.
ސަރުކާރުގެ ގިނަ މުވައްޒަފުން އަދިވެސް އެނބުރި މަސައްކަތަކަށް ނުކުމެފައި ނުވާއިރު، އެ މީހުންގެ މުސާރަ ނުދޭތާ ވެސް މަސްތަކެއް ފާއިތުވެއްޖެ އެވެ. އެހެންވެ، އެތައް މިލިއަން ބަޔަކު އުޅެމުން ދަނީ ވަރަށް ދަތި ހާލުގަ އެވެ.
ބޭންކުގެ ފައިސާ ރައްކާކޮށްފައި ހުރި މީހުންނަށް ވެސް ގޮންޖެހުމާ ދިމާވެފައި ވަނީ ހަފުތާއަކު ނެގޭނީ 200 އެމެރިކާ ޑޮލަރު ކަމަށް ކަނޑައަޅާފައި އޮތުމުންނެވެ. އެކަމާ ހެދި ބޭންކުތައް ކައިރީގައި ވެސް ދިގު ކިޔުތައް ހަދައި، އެތައް ގަޑިއިރެއް ހޭދަކުރަން ޖެހެ އެވެ.
ބޭރުގެ ރެމިޓެންސް ފައިސާ އަލުން ލިބެން ފަށާފައިވި ނަމަވެސް ވެސްޓަން ޔޫނިއަން އަދި މަނީގްރާމް ފަދަ ބައިނަލްއަގްވާމީ ޗެއިންތަކަށް ފައިސާ ނަގަން ދިޔަ ބަޔެއް މީހުން ބުނެފައި ވަނީ އެ ތަންތަނުގައި ނަގުދު ފައިސާ ނެތް ކަމަށެވެ.
"ސަރުކާރާއި އަމިއްލަ މަސައްކަތްތަކުގައި އުޅޭ އަފްގާން ރައްޔިތުން ވެސް އިގްތިސާދީ މުއާމަލާތްތައް ކުރުމުގައި އަފްގާން ފައިސާ ބޭނުން ކުރުމަށް އަންގަން،" މަރުކަޒީ ބޭންކުން ބުދަ ދުވަހު ނެރުނު ބަޔާނެއްގައި ބުންޏެވެ.
އެ ބޭންކުން ނެރުނު އިތުރު ބަޔާނެއްގައި ބުނީ ކުރީގެ ސަރުކާރުގެ އޮފިޝަލުންގެ ގެތަކުން ތާލިބާނުން ހޯދި 12 މިލިއަން ޑޮލަރުގެ ނަގުދު ފައިސާ އާއި ރަން މަރުކަޒީ ބޭންކާ ހަވާލުކޮށްފައިވާ ކަމަށެވެ. އޭގެ ތެރެއިން ބޮޑު އަދަދެއް ފެނުނީ ކުރީގެ ނައިބު ރައީސް އަމްރުﷲ ސާލިހްގެ ގެކޮޅުންނެވެ.
"ނަގުދު ފައިސާތައް ފެނިފައި ވަނީ ކުރީ ސަރުކާރުގެ ބައެއް އިސް އޮފިޝަލުންގެ ގެތަކާއި ގައުމީ ސަލާމަތާ ބެހޭ އެޖެންސީތަކުން،" ބަޔާނުގައި ބުންޏެވެ.
"އެ ފައިސާ އާއި ރަން ފޮރުވާފައި ހުރީ ކޮން ސަބަބަކާ ހެދި ކަމެއް އަދި ސާފެއް ނޫން."
ބޭރުގެ އެހީއަށް ވަރަށް ބޮޑަށް ޖެހިފައިވާ އަފްގާނިސްތާނަށް 1.2 ބިލިއަން ޑޮލަރުގެ އެހީ ފޯރުކޮށްދޭން ބައިނަލްއަގްވާމީ ޑޯނާ ކޮންފެރެންސަކުން މިދިޔަ އަންގާރަ ދުވަހު ނިންމުމާއެކު ތާލިބާނުން ވަނީ ޝުކުރު އަދާކޮށްފަ އެވެ.
ނަމަވެސް ގައުމުތަކުން ބުނަނީ އެހީ ލިބޭނީ ޝަރުތުތަކެއްގެ މަތިން ކަމަށެވެ. އެގޮތުން އެންމެންގެ ބައިވެރިވުން ހިމެނޭ ސަރުކާރެއް ހިންގުމަށާއި އަންހެނުންނާއި އަންހެން ކުދިންގެ ހައްގުތަކަށް ކަށަވަރު ކުރުމަށް ގައުމުތަކުން ވަނީ ތާލިބާނަށް ގޮވާލާފަ އެވެ.
މީގެ މަހެއް ކުރިން ވެރިކަމަށް އައި ތާލިބާނުން ބުނެފައި ވަނީ ކުރިއާ ހިލާފަށް އެ މީހުން މި ފަހަރު ވެރިކަން ކުރާނީ އަންހެނުންގެ ހައްގުތަކަށް އިހްތިރާމްކޮށްގެން ކަމަށެވެ. ނަމަވެސް ބައެއް ފަރާތްތަކުން ދެކޭ ގޮތުގައި އެ ވައުދާ އެއް ގޮތަށް ތާލިބާނުން އަމަލު ކުރަމުން ނުދެ އެވެ.
