ކާބުލް، އަފްގާނިސްތާން (ސެޕްޓެމްބަރު 12) - މިދިޔަ އޯގަސްޓު މަހުގެ 15 ވަނަ ދުވަހު ތާލިބާނުން ވެރިކަމަށް އައި ފަހުން އަފްގާނިސްތާނުގެ ފުލުހުން ފުރަތަމަ ފަހަރަށް ކާބުލް އެއާޕޯޓުގެ މަސައްކަތަށް ނުކުމެއްޖެ އެވެ.
އެއާޕޯޓުގެ ޗެކްޕޮއިންޓުތަކުގައި މިހާރު ސެކުއިރުޓީ ބަލަހައްޓަމުން ދަނީ ތާލިބާން ހަނގުރާމަވެރިންނާއި ފުލުހުން ގުޅިގެންނެވެ. ތާލިބާނުން ވެރިކަމަށް އައުމާއެކު ހަނގުރާމަވެރިން އަމަލުކޮށްފާނެ ގޮތަކާ މެދު ބިރުން ފުލުހުން މަސައްކަތަށް ނުކުތުން ހުއްޓާލި އެވެ.
ނަމަވެސް ތާލިބާން ކޮމާންޑަރުންގެ އޯޑަރު ލިބެން ފަށާފައި ވާތީ މިދިޔަ ހޮނިހިރު ދުވަހުން ފެށިގެން ފުލުހުން ވަނީ އަލުން މަސައްކަތަށް ނުކުންނަން ފަށާފަ އެވެ.
ތާލިބާނުން ބުނެފައި ވަނީ ކުރީގެ ސަރުކާރަށް މަސައްކަތް ކޮށްދިން ހުރިހާ އެންމެންނަށް ވެސް މައާފު ދީފައިވާ ކަމަށާއި އެއްވެސް މީހަކާ މެދު ބަދަލު ހިފުމުގެ ގޮތުން އެއްވެސް އަމަލެއް ނުހިންގާނެ ކަމަށެވެ. އެގޮތުން ސިފައިންނާއި ފުލުހުންނަށް ވެސް ވަނީ މައާފު ދީފަ އެވެ.
ތާލިބާން އޮފިޝަލުން ބޭނުންވަނީ ހަނގުރާމަވެރިންނާއި ފުލުހުންނާއި ސިފައިން ގުޅިގެން މަސައްކަތް ކުރުމަށެވެ. ނަމަވެސް އެކަން ކުރާނެ ގޮތުގެ ޕްލޭން ހާމަކޮށްފައެއް ނުވެ އެވެ. އަފްގާނިސްތާނުގެ ސެކިއުރިޓީ ބެލެހެއްޓުމާ ގުޅޭ މަސައްކަތުގައި ކުރީގެ ސަރުކާރުން 600،000 މުވައްޒަފުން ގެންގުޅުނެވެ.
ބޭރުގެ ފައުޖުތައް އަފްގާނިސްތާނުން ފޭބުމަށް ހިންގި އޮޕަރޭޝަނުގައި 120،000 އަށް ވުރެ ގިނަ އަފްގާން ރައްޔިތުން ވެސް ވަނީ ގައުމުން ގޮސްފަ އެވެ. އޯގަސްޓު 30 ވަނަ ދުވަހު އޮޕަރޭޝަން ނިމުނު އިރު، އެއާޕޯޓަށް ވަނީ ބޮޑެތި ގެއްލުންތަކެއް ވެފަ އެވެ.
މި ވަގުތު އެއާޕޯޓުގައި ޑޮމެސްޓިކް ފްލައިޓުތައް އޮޕަރޭޓް ކުރަމުން ދަނީ ގަތަރުގެ ޓެކްނިކަލް އެހީއާ އެކު އެވެ. ތާލިބާނުން މަސައްކަތް ކުރަނީ ގަތަރާއި ތުރުކީއާ ގުޅިގެން ބައިނަލްއަގްވާމީ ފްލައިޓުތައް ވެސް އަވަހަށް ފެށޭނެ ގޮތެއް ހޯދުމަށެވެ.
