"ދައުލަތާއި ތަންފީޒީ އިދާރާތަކުން އަމަލުކޮށްފައިވާ ގޮތުން ކަމަކަށް ކަމެއް ކުރީ ކަމަށް ބެލުމުގެ ފުރުސަތު އެބަ އޮތް,"
އަލީ ވަހީދުގެ ޕާސްޕޯޓް ހިފަހައްޓަން ދައުލަތް ތަމްސީލުކުރާ ޕްރޮސިކިއުޓާ ޖެނަރަލްގެ އޮފީހުން ހައިކޯޓަށް ހުށަހެޅި މައްސަލަ ބެއްލެވި ބެންޗުގެ ރިޔާސަތުގައި އިންނެވި ފަނޑިޔާރު އަބްދުالله ހަމީދު ވިދާޅުވީ މިހެނެވެ.
ފަނޑިޔާރުގެ ނުރުހުން ދައުލަތަށް އަމާޒުކުރެއްވީ, އަލީ ވަހީދުގެ ޕާސްޕޯޓް ހިފެހެއްޓުމުގެ މައްސަލާގައި އަމަލުކޮށްފައިވާ ގޮތުންނާއި އެކަމުގައި ދައުލަތުގެ ސީރިއަސް ކަމެއް ނެތުމުންނެވެ.
"ގާނޫނީ ގޮތުން އެ ފަރާތްތަކުގެ [ދައުލަތާއި ތަންފީޒީ އިދާރާތައް] ކޮނޑުގައި އެޅިފައިވާ ޒިންމާތައް އެދެވޭ ގޮތެއްގައި އަދާކޮށްފައިވާ ބެލެވޭނެ ހަމައެއް ނެތް." ފަނޑިޔާރު ލިޔުއްވި އެވެ.
ރިޔާސަތުގައި އިންނެވި ފަނޑިޔާރު އަބްދުالله ހަމީދުގެ ރައުޔުގައި ލިޔުއްވާފައިވާ ގޮތުގައި, ދައުލަތުން ހިފަހައްޓަން އެދޭ ކަމަށް ބުނެ ދީފައިވާ ނަންބަރަކީ އަލީ ވަހީދުގެ ޑިޕްލޮމެޓިކް ޕާސްޕޯޓުގެ ނަންބަރެވެ. އެ ޕާސްޕޯޓް ވަނީ އޭނާ މިނިސްޓަރު ކަމުން ވަކިކުރުމާއެކު ކެންސަލްކޮށްފަ އެވެ.
"އަލީ ވަހީދު ރާއްޖޭން ފުރުމުގެ އެތައް ދުވަހެއް ކުރިން ކެންސަލްކޮށްފައިވާ ޕާސްޕޯޓެއް ހިފަހައްޓަން ޖެހޭ ސަބަބެއް ނެތް, އަދި ކެންސަލްކޮށްފައިވާ ޕާސްޕޯޓް ހިފެހެއްޓުމުން ނުކުންނާނެ ގާނޫނީ ނަތީޖާއެއް ވެސް ނެތް," ފަނޑިޔާރު ހަމީދު ލިޔުއްވި އެވެ.
ފަނޑިޔާރު ފާހަގަ ކުރެއްވި ގޮތުގައި, އެންމެ ފުރަތަމަ ކުރިމިނަލް ކޯޓުން ހިފަހައްޓައި, އަދި ބާތިލްކޮށްފައިވަނީ ޑިޕްލޮމެޓިކް ޕާސްޕޯޓެވެ. އޭރު ވެސް އެ އޮތީ ކެންސަލްކޮށްފަ އެވެ.
އަލީ ވަހީދު ރާއްޖޭން ފުރައިގެން ދިޔައީ އޯޑިނަރީ ޕާސްޕޯޓްގަ އެވެ. އަދި ފުރައިގެން ދިޔައީ ކެންސަލްކޮށްފައި އޮތް ޑިޕްލޮމެޓިކް ޕާސްޕޯޓް ހިފަހައްޓަން ކުރިމިނަލް ކޯޓުން ނެރެފައި އޮތް އަމުރު, އެ ކޯޓުން ބާތިލްކުރުމުގެ ވެސް ކުރީގަ އެވެ.
އެހެންވެ, ފަނޑިޔާރު ވިދާޅުވި ގޮތުގައި, ދައުލަތުގެ ފަރާތުން ޒިންމާތައް އަދާކުރުމަށް ގާނޫނީ ގޮތުން މަތިކޮށްފައިވާ ފަރާތްތަކުން އެކަމުގައި ފަރުވާ ކުޑަކޮށް ނަތީޖާއެއް ހާސިލުނުވާނެ މަގުން ކޯޓަށް އައިސް ވަސީލަތްތަކާއި ވަގުތުތައް ބޭކާރު ކުރުމަކީ ކޯޓުގެ މަސައްކަތަށް އެޅޭ ހުރަހެކެވެ.
ފަނޑިޔާރު ހަމީދަށް ތާއިދު ކުރައްވާ ފަނޑިޔާރު މުހައްމަދު ނިޔާޒު ވިދާޅުވި ގޮތުގައި, އަލީ ވަހީދުގެ ޕާސްޕޯޓް ހިފަހައްޓަން އެދޭއިރު އޭނާ ބޭނުން ކުރަނީ ކޮން ޕާސްޕޯޓެއްތޯ ބަލައި, އެދެންވާނީ އޭނާ ބޭނުން ކުރާ ޕާސްޕޯޓެއް ހިފަހެއްޓުމަށެވެ.
"...ކޮންމެ ކޮންމެ ޕާސްޕޯޓެއް ނޫނެވެ. ނަމަވެސް, އެކަން ބަލާފައެއް ނުވެ އެވެ. އެހެނީ އެކަން ބަލާފައި އޮތްނަމަ މާކުރިން ކެންސަލްކޮށްފައިވާ ޕާސްޕޯޓެއް ހިފެހެއްޓުމަށް އެދުމުގެ ބޭނުމެއް ނެތެވެ." ފަނޑިޔާރު ނިޔާޒު ލިޔުއްވާފައި ވެ އެވެ.
އެހެންވެ, ފަނޑިޔާރު ނިޔާޒު ވެސް ވިދާޅުވީ އަލީ ވަހީދުގެ ޕާސްޕޯޓް ހިފަހައްޓަން ކަމަށް ބުނެ ކޯޓުތަކަށް ދައުލަތުން މައްސަލަތައް ހުށަހަޅަމުން ދަނީ ސީރިއަސް ނަތީޖާއެއް ނެރުމުގެ މަގުސަދެއްގަ ނޫނެވެ.
ފަނޑިޔާރު ސަމީރު ދެއްކެވީ ދައުލަތުގެ މަގުސަދު
ދެ ފަނޑިޔާރުންގެ ރައުޔަށް ބެންޗުގައި ދެން އިންނެވި ފަނޑިޔާރު އަލީ ސަމީރު ތާއިދެއް ނުކުރައްވަ އެވެ.
އެގޮތުން ލިޔުއްވާފައިވާ ގޮތުގައި ޕާސްޕޯޓް ހިފަހައްޓަން އެދުނު ފޯމްގައި ޑިޕްލޮމެޓިކް ޕާސްޕޯޓް ނަންބަރު އޮތް އޮތުން, އެއީ ހަމައެކަނި އެ ސަބަބަށްޓަކައި އަލީ ވަހީދުގެ ޕާސްޕޯޓެއް ނުވަތަ ޓްރެވެލް ޑޮކިއުމެންޓެއް ހިފަހައްޓަން އަމުރު ނެރެވެން ނެތް ކަމެއް ނޫނެވެ.
ޑިޕްލޮމެޓިކް ޕާސްޕޯޓް ނަންބަރާއެކު, ފޯމްގައި ޓްރެވެލް ޑޮކިއުމެންޓްސް ހިފެހެއްޓުމަށް ވެސް އެދޭ ކަމަށް ބުނެފައިވާ ކަމާއި އެހެންވެ, ހާސިލުކުރަން ބޭނުންވާ ނަތީޖާއަކީ އަލީ ވަހީދު ދަތުރުފަތުރު ކުރުން ހުއްޓުވައި, ރާއްޖެ އަނބުރާ ގެނައުންކަން އެނގޭ ކަމަށް ފަނޑިޔާރު ސަމީރު ވިދާޅުވި އެވެ.
އެހެންވެ, އެ މަގުސަދު ހާސިލުކުރުމަށްޓަކައި އަލީ ވަހީދަށް ދޫކޮށްފައިވާ ޕާސްޕޯޓްތަކާއި ޓްރެވެލް ޑޮކިއުމެންޓްތައް ހިހެފެއްޓުމުގެ އަމުރެއް ކޯޓަށް ނެރެދިނުމުގެ ޖާގަ އެބަ އޮތް ކަމަށް ފަނޑިޔާރު ސަމީރު ރައުޔު ނެރުއްވި އެވެ.
ނަމަވެސް, އެކަމަށް އަގުލަބިއްޔަތު ނުލިބުނީ އެވެ.
ޓޫރިޒަމް މިނިސްޓްރީގެ 13 މުވައްޒަފަކަށް ޖިންސީ ފުރައްސާރަކުރި ކަމުގެ ތުހުމަތުގައި ގިނަ ދައުވާތަކެއް އުފުލާފައިވާ އަލީ ވަހީދުގެ ޝަރީއަތް ކުރިމިނަލް ކޯޓުގައި މިހާރު ކުރިއަށް ގެންދަނީ އޮންލައިންކޮށް އިނގިރޭސިވިލާތުގައި ހުރެގެން އަލީ ވަހީދަށް ބައިވެރިވެވޭ ގޮތަށެވެ.
އެ ކޯޓުގެ ގާޒީ ހަސަން ސައީދު، އިސް ގާޒީ އަހުމަދު ޝަކީލްގެ ލަފާގެ މަތިން ނިންމެވި ނިންމެވުމާ ޕްރޮސިކިއުޓާ ޖެނަރަލްގެ ފަރާތުން އިއުތިރާޒުކުރި އެވެ. ދައުލަތުން ގަބޫލުކުރާ ގޮތުގައި ރާއްޖޭގެ ގާނޫނީ އިހުތިސޯސް ނުހިނގާ ތަނެއްގައި ހުރެގެން ޝަރީއަތުގައި ބައިވެރިވެވިގެން ނުވާނެ އެވެ. އެގޮތަށް ކުރިއަށް ގެންދާ ޝަރީއަތްތައް ގާނޫނާ ހިލާފުވާނެ ކަމަށެވެ.
އެހެންވެ، އެ މައްސަލަ ޕްރޮސިކިއުޓާ ޖެނަރަލްގެ އޮފީހުން ހައިކޯޓުގައި އިސްތިއުނާފުކުރި އެވެ. ނަމަވެސް، އެ ކޯޓުން ނިންމީ އެ މައްސަލަ އިސްތިއުނާފީ ދައުވާއެއްގެ ގޮތުގައި ކުރިޔަށް ގެންދާނެ ޝަރުއީ އަދި ގާނޫނީ ހަމައެއް މިހިނދުގައި ނެތް ކަމަށެވެ. ހައިކޯޓުގެ އެ ނިންމުން ޕްރޮސިކިއުޓާ ޖެނަރަލްގެ ފަރާތުން ސުޕްރީމް ކޯޓުގައި އިސްތިއުނާފުކުރި އެވެ.
އެ މަައްސަލާގެ ސުޕްރީމް ކޯޓުގެ އަޑުއެހުމަށް އަލީ ވަހީދު ހާޒިރުނުވުމުން ހުރުމަތް ކެނޑީ ކަމަށް ނިންމައި ސުޕްރީމް ކޯޓުން ދެ މަހުގެ ޖަލު ހުކުމެއް ވެސް އަލީ ވަހީދަށް އިއްވި އެވެ. ސުޕްރީމް ކޯޓުން ބުނެފައިވަނީ އަލީ ވަހީދުގެ ކުރިމަތީގައި ކޯޓުތަކުން ކުޑަކަކޫ ޖަހާތަން ރައްޔިތުންނަށް ފެނިގެން ނުވާނެ ކަމަށެވެ.
އޭގެފަހުން އިނގިރޭސިވިލާތުގައި ފިލައިގެން އުޅެނިކޮށް ވިސާގެ މައްސަލައެއްގައި އެ ގައުމުގެ ފުލުހުން ވަނީ އޭނާ ހައްޔަރުކޮށްފަ އެވެ. ނަމަވެސް, މިހާރު ގެންދަނީ ޓްވީޓް ކުރަމުންނެވެ. އެހެންވެ, އޭނާ ހުރީ ބަންދެއްގައި ކަމެއް ޔަގީނެއް ނޫނެވެ.
