ޕްރޮސިކިއުޓާ ޖެނަރަލްގެ ފަރާތުން ހިފަހައްޓަން އެދިފައިވަނީ ޓޫރިޒަމް މިނިސްޓަރުގެ ހައިސިއްޔަތުން އަލީ ވަހީދުގެ އަތުގައި އޮތް ޑިޕްލޮމެޓިކް ޕާސްޕޯޓް ކަމަށާއި އެއީ މިހާރު ކެންސަލްކޮށްފައިވާ ޕާސްޕޯޓަކަށްވާތީ އެ ހިފަހައްޓަން އަމުރު ނެރެގެން ނުކުންނާނެ ނަތީޖާއެއް ނޯންނާނެ ކަމަށް ހައިކޯޓުން ބުނެފި އެވެ.
އެހެންވެ, ހައިކޯޓުން ވަނީ އަލީ ވަހީދުގެ ޕާސްޕޯޓް ހިފަހައްޓަން ޕްރޮސިކިއުޓާ ޖެނަރަލްގެ ފަރާތުން ނެރެދޭން އެދުނު އަމުރު ނެރޭނެ ތަނެއް ނެތް ކަމަށް ނިންމާފާ އެވެ. ނަމަވެސް, އެ އަމުރު ނެރެނުދޭން ކުރިމިނަލް ކޯޓުން ދެއްކި ސަބަބުތައް ގޯސްކޮށް ކަމަށް ކަނޑައެޅި އެވެ.
ހައިކޯޓުން މި ހުކުމް ކޮށްފައިވަނީ ބެންޗުގެ ތިން ފަނޑިޔާރުންގެ ތެރެއިން ދެ ފަނޑިޔާރެއްގެ އަގުލަބިއްޔަތުންނެވެ. ތާއިދު ނުލިބުނު, ފަނޑިޔާރު އަލީ ސަމީރުގެ ރައުޔުގައިވާ ގޮތުން އަލީ ވަހީދުގެ ޕާސްޕޯޓްތައް ހިފަހައްޓަން އަމުރު ނެރުމުގެ ޖާގަ އެބަ އޮތެވެ.
އަލީ ވަހީދުގެ ޕާސްޕޯޓްގެ ފަސްފަހަތް
އަލީ ވަހީދުގެ މައްސަލާގައި އެންމެ ފުރަތަމަ ވެސް ކްރިމިނަލް ކޯޓުގެ އަމުރެއްގެ ދަށުން އަލީ ވަހީދުގެ ޕާސްޕޯޓް ހިފެހެއްޓި އެވެ. ނަމަވެސް، އަލީ ވަހީދު ބޭސްފަރުވާއަށް ރާއްޖޭން ބޭރަށް ދިޔުމުގެ ހުއްދަދީ، ކުރިމިނަލް ކޯޓުން އެ އަމުރު ފަހުން ބާތިލުކުރި އެވެ.
އޭގެފަހުން ވެސް އަލީ ވަހީދު ރާއްޖެ ވަޑައިގެންފައިނުވާތީ ފުލުހުން މެދުވެރިކޮށް އަލީ ވަހީދުގެ ޕާސްޕޯޓް އަލުން ހިފެހެއްޓުމަށް ޕްރޮސިކިއުޓާ ޖެނަރަލްގެ އޮފީހުން އެދުނެވެ. ނަމަވެސް، އެ އަމުރު ނެރެދޭނެ ތަނެއް ނެތް ކަމަށް ކުރިމިނަލް ކޯޓުން ނިންމުމުން މައްސަލަ ހައިކޯޓުގައި އިސްތިއުނާފުކުރި އެވެ.
ޕްރޮސިކިއުޓާ ޖެނަރަލްގެ އޮފީހުން ހުށަހެޅި އެ މައްސަލަ ބަލައިނުގަތުމަށް ހައިކޯޓު އޭރު ނިންމި އެވެ.
އެގޮތަށް އެ ކޯޓުން ނިންމި ސަބަބެއް ކަމަށް ބުނެފައިވަނީ ޖިނާއީ މައްސަލައެއްގައި މީހެއްގެ މައްޗަށް ދައުވާ ކުރުމަށްފަހު، އެ މައްސަލައެއްގެ ތެރެއިން ނިންމާ އެއްވެސް ނިންމުމެއްގެ އިސްތިއުނާފު، ދައުވާ ލިބޭ ފަރާތުގެ ޣައިރު ހާޒިރުގައި ކުރިއަށް ނުގެންދެވޭނެތީ އެވެ.
ހައިކޯޓުގެ އެ ނިންމުން ސުޕްރީމް ކޯޓުގައި ދައުލަތުން އިސްތިއުނާފުކުރުމުން, އެ ކޯޓުން ވަނީ އެ މައްސަލައަކީ ހައިކޯޓުން ބަލަން ޖެހޭ މައްސަލައެއް ކަމަށް ކަނޑައަޅައި, އެކަމަށް އަމުރުކޮށްފަ އެވެ.
އެގޮތުގެ މަތިން ހައިކޯޓުން ބެލި މައްސަލައަށްފަހު ނެރެފައިވަނީ ރައުޔު ތަފާތު ހުކުމެކެވެ.
"ކުރީ ކަމަކަށް ކަމެއް"
ރިޔާސަތުގައި އިންނެވި ފަނޑިޔާރު އަބްދުالله ހަމީދުގެ ރައުޔުގައި ލިޔުއްވާފައިވާ ގޮތުގައި, ދައުލަތުން ހިފަހައްޓަން އެދޭ ކަމަށް ބުނެ ދީފައިވާ ނަންބަރަކީ އަލީ ވަހީދުގެ ޑިޕްލޮމެޓިކް ޕާސްޕޯޓުގެ ނަންބަރެވެ. އެ ޕާސްޕޯޓް ވަނީ އޭނާ މިނިސްޓަރު ކަމުން ވަކިކުރުމާއެކު ކެންސަލްކޮށްފަ އެވެ.
"އަލީ ވަހީދު ރާއްޖޭން ފުރުމުގެ އެތައް ދުވަހެއް ކުރިން ކެންސަލްކޮށްފައިވާ ޕާސްޕޯޓެއް ހިފަހައްޓަން ޖެހޭ ސަބަބެއް ނެތް, އަދި ކެންސަލްކޮށްފައިވާ ޕާސްޕޯޓް ހިފެހެއްޓުމުން ނިކުންނާނެ ގާނޫނީ ނަތީޖާއެއް ވެސް ނެތް," ފަނޑިޔާރު ހަމީދު ލިޔުއްވި އެވެ.
ފަނޑިޔާރު ފާހަގަ ކުރެއްވި ގޮތުގައި, އެންމެ ފުރަތަމަ ކުރިމިނަލް ކޯޓުން ހިފަހައްޓައި, އަދި ބާތިލްކޮށްފައިވަނީ ޑިޕްލޮމެޓިކް ޕާސްޕޯޓެވެ. އޭރު ވެސް އެ އޮތީ ކެންސަލްކޮށްފަ އެވެ.
އަލީ ވަހީދު ރާއްޖޭން ފުރައިގެން ދިޔައީ އޯޑިނަރީ ޕާސްޕޯޓްގަ އެވެ. އަދި ފުރައިގެން ދިޔައީ ކެންސަލްކޮށްފައި އޮތް ޑިޕްލޮމެޓިކް ޕާސްޕޯޓް ހިފަހައްޓަން ކުރިމިނަލް ކޯޓުން ނެރެފައި އޮތް އަމުރު, އެ ކޯޓުން ބާތިލްކުރުމުގެ ވެސް ކުރީގަ އެވެ.
"އަލީ ވަހީދުގެ ޕާސްޕޯޓް ހިފެހެއްޓުމުގައި ދައުލަތާއި ތަންފީޒީ އިދާރާތަކުން އަމަލުކޮށްފައިވާ ގޮތުން ކަމަކަށް ކަމެއް ކުރީ ކަމަށް ބެލުމުގެ ފުރުސަތު އެބަ އޮތެވެ. އަދި ގާނޫނީ ގޮތުން އެ ފަރާތްތަކުގެ ކޮނޑުގައި އެޅިފައިވާ ޒިންމާތައް އެދެވޭ ގޮތެއްގައި އަދާކޮށްފައިވާ ބެލެވޭނެ ހަމައެއް ނެތެވެ." ފަނޑިޔާރު ލިޔުއްވި އެވެ.
ފަނޑިޔާރު ވިދާޅުވި ގޮތުގައި, ދައުލަތުގެ ފަރާތުން ޒިންމާތައް އަދާކުރުމަށް ގާނޫނީ ގޮތުން މަތިކޮށްފައިވާ ފަރާތްތަކުން އެކަމުގައި ފަރުވާ ކުޑަކޮށް ނަތީޖާއެއް ހާސިލުނުވާނެ މަގުން ކޯޓަށް އައިސް ވަސީލަތްތަކާއި ވަގުތުތައް ބޭކާރު ކުރުމަކީ ކޯޓުގެ މަސައްކަތަށް އެޅޭ ހުރަހެކެވެ.
ފަނޑިޔާރު ހަމީދަށް ތާއިދު ކުރައްވާ ފަނޑިޔާރު މުހައްމަދު ނިޔާޒު ވިދާޅުވި ގޮތުގައި, އަލީ ވަހީދުގެ ޕާސްޕޯޓް ހިފަހައްޓަން އެދޭއިރު އޭނާ ބޭނުން ކުރަނީ ކޮން ޕާސްޕޯޓެއްތޯ ބަލައި, އެދެންވާނީ އޭނާ ބޭނުން ކުރާ ޕާސްޕޯޓެއް ހިފަހައްޓަންށެވެ.
"...ކޮންމެ ކޮންމެ ޕާސްޕޯޓެއް ނޫނެވެ. ނަމަވެސް, އެކަން ބަލާފައެއް ނުވެ އެވެ. އެހެނީ އެކަން ބަލާފައި އޮތްނަމަ މާކުރިން ކެންސަލްކޮށްފައިވާ ޕާސްޕޯޓެއް ހިފެހެއްޓުމަށް އެދުމުގެ ބޭނުމެއް ނެތެވެ." ފަނޑިޔާރު ނިޔާޒު ލިޔުއްވާފައިވެ އެވެ.
އެހެންވެ, ފަނޑިޔާރު ނިޔާޒު ވެސް ވިދާޅުވީ އަލީ ވަހީދުގެ ޕާސްޕޯޓް ހިފަހައްޓަން ކަމަށް ބުނެ ކޯޓުތަކަށް ދައުލަތުން މައްސަލަތައް ހުށަހަޅަމުން ދަނީ ސީރިއަސް ނަތީޖާއެއް ނެރުމުގެ މަގުސަދެއްގަ ނޫނެވެ.
އަމުރު ނެރެނޭ ތަން އެބަ އޮތް: ފަނޑިޔާރު ސަމީރު
ދެ ފަނޑިޔާރުންގެ ރައުޔަށް ފަނޑިޔާރު އަލީ ސަމީރު ތާއިދެއް ނުކުރައްވަ އެވެ.
އެގޮތުން ލިޔުއްވާފައިވާ ގޮތުގައި ޕާސްޕޯޓް ހިފަހައްޓަން އެދުނު ފޯމްގައި ޑިޕްލޮމެޓިކް ޕާސްޕޯޓް ނަންބަރު އޮތް އޮތުން, އެއީ ހަމައެަނި އެ ސަބަބަށްޓަކައި އަލީ ވަހީދުގެ ޕާސްޕޯޓެއް ނުވަތަ ޓްރެވެލް ޑޮކިއުމެންޓެއް ހިފަހައްޓަން އަމުރު ނެރެވެން ނެތް ކަމެއް ނޫނެވެ.
ޑިޕްލޮމެޓިކް ޕާސްޕޯޓް ނަންބަރާއެކު, ފޯމްގައި ޓްރެވެލް ޑޮކިއުމެންޓްސް ހިފެހެއްޓުމަށް ވެސް އެދޭ ކަމަށް ބުނެފައިވާ ކަމާއި އެހެންވެ, ހާސިލުކުރަން ބޭނުންވާ ނަތީޖާއަކީ އަލީ ވަހީދު ދަތުރުފަތުރު ކުރުން ހުއްޓުވައި, ރާއްޖެ އަނބުރާ ގެނައުންކަން އެނގޭ ކަމަށް ފަނޑިޔާރު ސަމީރު ވިދާޅުވި އެވެ.
އެހެންވެ, އެ މަގުސަދު ހާސިލކުރުމަށްޓަކައި އަލީ ވަހީދަށް ދޫކޮށްފައިވާ ޕާސްޕޯޓްތަކާއި ޓްރެވެލް ޑޮކިއުމެންޓްތައް ހިހެފެއްޓުމުގެ އަމުރެއް ކޯޓަށް ނެރެދިނުމުގެ ޖާގަ އެބަ އޮތް ކަމަށް ފަނޑިޔާރު ސަމީރު ރައުޔު ނެރުއްވި އެވެ.
ނަމަވެސް, އެކަމަށް އަގުލަބިއްޔަތު ނުލިބުނީ އެވެ.
ޓޫރިޒަމް މިނިސްޓްރީގެ 13 މުވައްޒަފަކަށް ޖިންސީ ފުރައްސާރަކުރި ކަމުގެ ތުހުމަތުގައި ގިނަ ދައުވާތަކެއް އުފުލާފައިވާ އަލީ ވަހީދުގެ ޝަރީއަތް ކުރިމިނަލް ކޯޓުގައި މިހާރު ކުރިއަށް ގެންދަނީ އޮންލައިންކޮށް އިނގިރޭސިވިލާތުގައި ހުރެގެން އަލީ ވަހީދަށް ބައިވެރިވެވޭ ގޮތަށެވެ.
އެ ކޯޓުގެ ގާޒީ ހަސަން ސައީދު، އިސް ގާޒީ އަހުމަދު ޝަކީލްގެ ލަފާގެ މަތިން ނިންމެވި ނިންމެވުމާ ޕްރޮސިކިއުޓާ ޖެނަރަލްގެ ފަރާތުން އިއުތިރާޒުކުރި އެވެ. ދައުލަތުން ގަބޫލުކުރާ ގޮތުގައި ރާއްޖޭގެ ގާނޫނީ އިހުތިސޯސް ނުހިނގާ ތަނެއްގައި ހުރެގެން ޝަރީއަތުގައި ބައިވެރިވެވިގެން ނުވާނެ އެވެ. އެގޮތަށް ކުރިއަށް ގެންދާ ޝަރީއަތްތައް ގާނޫނާ ހިލާފުވާނެ ކަމަށެވެ.
އެހެންވެ، އެ މައްސަލަ ޕްރޮސިކިއުޓާ ޖެނަރަލްގެ އޮފީހުން ހައިކޯޓުގައި އިސްތިއުނާފުކުރި އެވެ. ނަމަވެސް، އެ ކޯޓުން ނިންމީ އެ މައްސަލަ އިސްތިއުނާފީ ދައުވާއެއްގެ ގޮތުގައި ކުރިޔަށް ގެންދާނެ ޝަރުއީ އަދި ގާނޫނީ ހަމައެއް މިހިނދުގައި ނެތް ކަމަށެވެ. ހައިކޯޓުގެ އެ ނިންމުން ޕްރޮސިކިއުޓާ ޖެނަރަލްގެ ފަރާތުން ސުޕްރީމް ކޯޓުގައި އިސްތިއުނާފުކުރި އެވެ.
އެ މަައްސަލާގެ ސުޕްރީމް ކޯޓުގެ އަޑުއެހުމަށް އަލީ ވަހީދު ހާޒިރުނުވުމުން ހުރުމަތް ކެނޑީ ކަމަށް ނިންމައި ސުޕްރީމް ކޯޓުން ދެ މަހުގެ ޖަލު ހުކުމެއް ވެސް އަލީ ވަހީދަށް އިއްވި އެވެ. ސުޕްރީމް ކޯޓުން ބުނެފައިވަނީ އަލީ ވަހީދުގެ ކުރިމަތީގައި ކޯޓުތަކުން ކުޑަކަކޫ ޖަހާތަން ރައްޔިތުންނަށް ފެނިގެން ނުވާނެ ކަމަށެވެ.
އޭގެފަހުން އިނގިރޭސިވިލާތުގައި ފިލައިގެން އުޅެނިކޮށް ވިސާގެ މައްސަލައެއްގައި އެ ގައުމުގެ ފުލުހުން ވަނީ އޭނާ ހައްޔަރުކޮށްފަ އެވެ. ނަމަވެސް, މިހާރު ގެންދަނީ ޓްވީޓް ކުރަމުންނެވެ. އެހެންވެ, އޭނާ ހުރީ ބަންދެއްގައި ކަމެއް ޔަގީނެއް ނޫނެވެ.
