ނޭޕްލްސް (ސެޕްޓެމްބަރު 12) - އިޓާލިއަން ލީގުގައި ރޭ ނަޕޯލީ އަތުން 2-1 އިން ބަލިވެ، ޔުވެންޓަސް އިން ސީޒަނުގައި މޮޅެއް ލިބި އިތުރު ހަފްތާއެއް ނިންމާލަން ޖެހި ޕްރެޝަރާ ކުރިމަތިލާން ޖެހިއްޖެ އެވެ.
މެސިމޯ އަލްގެރީގެ ކޯޗުކަމުގައި މިހާރު ވާދަކުރަމުން އަންނަ ޔުވެންޓަސް އިން މި ފަހަރު ލީގުގައި ކުޅުނު ތިން މެޗުން ވަނީ އެއް ޕޮއިންޓް ލިބިފަ އެވެ. ޔުވެންޓަސް މި ފަހަރު ސީޒަނުގެ ފުރަތަމަ މެޗުން އުދިނޭޒީއާ ވަނީ 2-2 އިން އެއްވަރުވެފަ އެވެ. އެ މެޗަށް ފަހު ކްރިސްޓިއާނޯ ރޮނާލްޑޯ ވަނީ ޔުވެންޓަސް ދޫކޮށްލައިފަ އެވެ. އޭގެ ފަހުން ޔުވެންޓަސް ކުޅުުނު ފުރަތަމަ މެޗުން ވަނީ އެމްޕޮލީ އަތުން 1-0 އިން ބަލިވެފަ އެވެ. އަދި ރޭ ނަޕޯލީ އަތުން ވެސް ބަލިވީ އެވެ.
"މައްސަލަ އަކީ މި މެޗުތަކުގައި ހެދޭ ގޯސްތައް. އެ ރަނގަޅު ކޮށްގެން ކުރިއަށް ދެވޭނީ. ސީޒަނުގެ އެހާ ކުރީކޮޅުގައި ވީމަ ޕްރެޝަރުގެ ވާހަކަ އަހަރެން އެހާ ބޮޑަށް ދައްކަން ބޭނުމެއް ނޫން. އެކަމަކު، މޮޅުނުވަންޏާ ފުޓްބޯޅައިގައި ޕްރެޝަރު އޮންނާނެ،" އަލެގްރީ ބުންޏެވެ.
ނަޕޯލީ ދަނޑުގައި ރޭ ކުޅުނު މެޗުގައި ފުރަތަމަ ގޯލު ޖެހީ ޔުވެންޓަސް އިންނެވެ. މެޗުގެ 10 ވަނަ މިނިޓްގައި ނަޕޯލީގެ ފަހަތުން ގްރީސްގެ ޑިފެންޑަރު ކޮސްޓަސް މަނޮލަސް ހެދި ގޯހެއްގެ ފައިދާނަގައި ޔުވެންޓަސް އަށް އެއްވަރުކޮށްދިނީ އަލްވާރޯ މޮރާޓޯ އެވެ. ޔުވެންޓަސް އަށް ލީޑުފުޅާކޮށްދޭން ޑޭޭޖާން ކުސުލެވްސްކީ ޖެހި ބޯޅަ ނަޕޯލީގެ ކީޕަރު ޑޭވިޑް އޮސްޕީނާ ވަނީ މަތަކޮށްފަ އެވެ.
ދެ ވަނަ ހާފްގައި ކުޅެން އަރައި ނަޕޯލީން ކުޅުން ރަނގަޅުކޮށް، މެޗުގެ 57 ވަނަ މިނިޓްގައި ނަތީޖާ ހަމަހަމަކުރި އެވެ. މި ގޯލަކީ ނަޕޯލީގެ ކެޕްޓަން ލޮރެންޒޯ އިންސީނިއޭ ޖެހި ޝޮޓެއް ޔުވެންޓަސްގެ ކީޕަރު ވޮޒްޝިއޭ ޝެޒްނީ އަތުގައި ޖެހިފައި ނުކުތް ވަގުތު މަޓެއޯ ޕޮލިޓާނޯ ޖެހި ގޯލެކެވެ.
މެޗު ނިމެން ފަސް މިނިޓަށް ވެފައި ހުއްޓައި ނަޕޯލީ މޮޅުކޮށްދިން ގޯލު ޖެހީ ޑިފެންޑަރު ކަލީދޫ ކުލިބާލީ އެވެ. ކޯނަރެއް ދިފާއުކުރަން އުޅުމުގެ ތެރޭގައި ޔުވެންޓަސްގެ ފޯވާޑް މޮއިސޭ ކީން ބޮލުން ޖެހި ބޯޅަ ބައިކޮޅަށް ވަންނަން ދަނިކޮށް ކީޕަރު ޝެޒްނީ އެ ބޯޅަ ސަލާމަތްކުރި ނަމަވެސް ގޯލު ކުރިމަތީގައި ހުސްކޮށް ހުރި ކުލިބާލީ ވަނީ ގޯލުގެ ތެރެއަށް ބޯޅަ ފޮނުވާލައިފަ އެވެ.
ޔުވެންޓަސް މި ވަގުތު ލީގުގެ 14 ވަނައިގައި އޮތީ ތިން މެޗުން ޕޮއިންޓަކާ އެކު އެވެ. މި ހަފްތާގެ މެޗުތައް ނިމޭއިރު ޔުވެންޓަސް އަދި ފަހަތަށް ވެއްޓުމުގެ ފުރުސަތު އެބައޮތެެވެ.
