ހަށިގަނޑުން ނުކުންނަ ދަލުން ކޮވިޑަށް ޓެސްޓު ކުރެވޭނެ ހާއްސަ ޑިވައިސެއް ތައިލޭންޑުގައި އުފެއްދައި ޓެސްޓުކޮށްފި އެވެ.
މި ޑިވައިސްއިން ބޭނުންކޮށްގެން ބެންކޮކްގެ މާރުކޭޓެއްގައި ތިބި ބަޔަކު ވަނީ ޓެސްޓްކޮށްފަ އެވެ.
"ސާމްޕަލްތަކުން އެނގުނު ގޮތުގައި ކޮވިޑް ޖެހިފައިވާ މީހުންގެ ދަލުގައި ވަކިން ފާހަގަކުރެވޭ ކެމިކަލްތަކެއް އެކުލެވޭ،" ބެންކޮކްގެ ޗުލަލޮންގްކޯން ޔުނިވާސިޓީގެ ޗަދިން ކުލްސިންގް ވިދާޅުވި އެވެ.
"މި ޑިވައިސް އަކީ ކޮވިޑް ބަލި މީހުންގެ ދަލުގައި ހިމެނޭ ވަކި ބެކްޓީރިއާ އަކުން އުފެދޭ ހާއްސަ ވަހެއް ދެނެގަނެވޭނެ ޑިވައިސް އެއް."
ޗަދިން ވިދާޅުވީ މިއީ 95 ޕަސެންޓު ޔަގީންކަން ލިބޭ ޓެސްޓެއް ކަމަށާއި ކުރިމަގުގައި މިއީ އަގުބޮޑު ޕީސީއާރް ޓެސްޓުގެ ބަދަލުގައި އަގުހެޔޮކޮށް ކޮވިޑަށް ޓެސްޓު ކުރެވޭނެ ގޮތަކަށް ވާނެ ކަމަށެވެ.
ނަމަވެސް އެ ޑިވައިސް އަދިވެސް އޮތީ އުފެއްދުމުގެ މަރުހަލާގަ އެވެ. ޑިވައިސް އުފެއްދުމަށް އެއްކުރި ދިރާސާ އާއި އޭގެ ހޯދުންތައް ޔަގީން ކުރުމަށް ފަހު ކަމާ ބެހޭ އިދާރާތަކުން ހުއްދަ ހޯދަން ޖެހޭނެ އެވެ.
ތައިލޭންޑުގެ ސައިންޓިސްޓުން އުފެއްދި ޑިވައިސް އަކީ މާހައުލުގައި ހުންނަ ވިހަ ކެމިކަލްތައް ދެނެގަންނަން ބޭނުން ކުރާ ޑިވައިސް އަކަށް ބައެއް ބަދަލުތައް ގެނެސްގެން އުފެއްދި ޑިވައިސް އެކެވެ.
އޭތި ބޭނުން ކުރުމަށް ހަށިގަނޑުން ދަލުގެ ސާމްޕަލް ނެގުމަށް ކަފަ ބުރެއް ކިހިލިފަތް ދަށުގައި 15 މިނެޓު ބެހެއްޓުމަށް ފަހު ބިއްލޫރި ފުޅިއަކަށް އޭތި ލައި، ޔޫވީ ރޭއިން ސްޓެރިލައިޒް ކުރަން ޖެހެ އެވެ.
"އޭގެ ފަހުން ސަކްޝަން ބާރު ބޭނުންކުރާ ހޮޅިއަކުން ކަފަބުރުން ސާމްޕަލް ދަމައިގަންނާނެ. ދެން އެނެލައިޒާގެ ތެރެއަށް އެ ސާމްޕަލް ފޮނުވާލާނެ،" ޗަދިން ވިދާޅުވި އެވެ.
ސާމްޕަލް ނެގުމަށް ހޭދަވަނީ 15 މިނެޓެވެ. އަދި ނަތީޖާ ލިބުމަށް ހޭދަވަނީ 30 ސިކުންތެވެ.
