ބެއިރޫތު، ލުބްނާން (ސެޕްޓެމްބަރު 11) - އިގްތިސާދީ އަދި މާލީ ބޮޑު ކާރިސާއަކާ ކުރިމަތިވެފައިވާ ލުބްނާނުގެ އާ ސަރުކާރު 13 މަހުގެ ދިގު އިންތިޒާރަކަށް ފަހު ހުކުރު ދުވަހު އިއުލާނުކޮށްފި އެވެ.
ލުބްނާނަށް ދިމާވެފައިވާ ކާރިސާއިން އަރައިގަތުމަށް ބޭނުންވާ ބޭރުގެ މާލީ އެހީ ލިބޭނީ އާ ސަރުކާރެއް އިއުލާނު ކުރުމުން ކަމަށް އޮތީ ޝަރުތުކޮށްފަ އެވެ. ނަމަވެސް ލުބްނާނަށް ބޭނުންވާ އިސްލާހީ ބަދަލުތައް އާ ސަރުކާރަށް ގެނެވޭނެ ކަމާ މެދު މާ ބޮޑު ޔަގީންކަމެއް ނެތެވެ.
ތިން ވަނަ ފަހަރަށް ލުބްނާނުގެ ބޮޑު ވަޒީރުކަން ކުރައްވަމުންދާ ބިލިއަނަރު ނަޖީބު މިކާތީ ވަނީ އާ ސަރުކާރު އިއުލާނު ކުރެއްވުމުގެ ގޮތުން ދެއްވި ބަޔާނުގައި ދަރަނިވެރިކަމުން ގައުމު ސަލާމަތް ކުރުމަށް ކުރެވެން ހުރި ހުރިހާ ކަމެއް ކުރަން ވައުދުވެވަޑައިގެންފަ އެވެ.
"ރައްޔިތުންގެ ޒަރޫރީ ބޭނުންތައް ފުއްދޭނެކަން ކަށަވަރު ކުރުމަށް ބޭރުގެ އެހީ ހޯދުމަށް ކޮންމެ ސިކުންތަކު ވެސް އަޅުގަނޑުމެން މަސައްކަތް ކުރަމުން ދާނަން،" އަރަބި ގައުމުތަކުގެ އެހީ ހޯދާނެކަން ފާހަގަކުރައްވަމުން މިކާތީ ވިދާޅުވި އެވެ.
މިކާތީ ބޮޑު ވަޒީރު ކަމަށް ވަޑައިގެންނެވީ މިދިޔަ ޖުލައި މަހު އެވެ. އޭގެ ކުރިން ބޮޑު ވަޒީރު ކަމުގައި ތިއްބެވި ދެ ބޭފުޅުންނަށް ވެސް ވަނީ އާ ސަރުކާރެއް އުފެއްދުމަށް ސިޔާސީ ޕާޓީތައް އެއްބަސްވުމަކަށް ގެނެވޭ ގޮތް ނުވެފައެއް ނުވެ އެވެ.
ލުބްނާނުގެ ކުރީ ސަރުކާރުން އިސްތިއުފާ ދިނީ މިދިޔަ އަހަރުގެ ބެއިރޫޓު ބަނދަރުގައި ގޮވި ބޮޑު ގޮވުމަށް ފަހު އެވެ. އެ ގޮވުމުގައި 200 އަށް ވުރެ ގިނަ މީހުން މަރުވިއިރު، އެކަން މެދުވެރިވީ ސަރުކާރުގެ ނާގާބިލުކަމާއި ކޮރަޕްޝަނާ ހެދި ކަމަށް ރައްޔިތުން ގަބޫލުކުރެ އެވެ.
ލުބްނާނަށް ކުރިމަތިވެފައިވާ މާލީ ކާރިސާއަކީ، ވޯލްޑް ބޭންކުން ބުނެފައިވާ ގޮތުގައި، 1850 ގެ އަހަރުތަކަށް ފަހު ދުނިޔެއަށް ކުރިމަތިވި އެންމެ ބޮޑު މާލީ ކާރިސާ އެވެ. ފައިސާ އަގު އިންތިހާއަށް ވެއްޓި، ރައްޔިތުން ފަގީރުކަމުގައި އުޅެމުން ދާއިރު، ތެލުގެ ދަތިކަން ވެސް ވަނީ ކުރިމަތިވެފަ އެވެ.
