ކާބުލް، އަފްގާނިސްތާން (ސެޕްޓެމްބަރު 8) - ތާލިބާނުން އިއުލާނު ކުރި އާ ސަރުކާރުގައި އަފްގާނިސްތާނުގެ "އެންމެ ބިރުވެރި" ހަނގުރާމަވެރި ގްރޫޕު، ހައްގާނީ ނެޓްވޯކްގެ ދެ މެމްބަރުން ހިމެނެ އެވެ.
ކުރިން ވެސް އަންދާޒާ ކުރެވުނު ގޮތަށް، ވިހި އަހަރަށް ފަހު އެމެރިކާ ފައުޖުތައް އަފްގާން ފަސްގަނޑު ދޫކޮށް ދިޔުމުން އޯގަސްޓު 15 ވަނަ ދުވަހު ވެރިކަމަށް އައި ތާލިބާނުންގެ ސަރުކާރުގައި ހައްގާނީ ނެޓްވޯކް ވާނީ މުހިއްމު ބައިވެރިއަކަށްކަން އެކަމުން ރަމްޒުކޮށްދެ އެވެ.
ހައްގާނީންނަކީ ކޮން ބައެއް؟
ހައްގާނީ ނެޓްވޯކް ނުވަތަ ހައްގާނީންގެ ފައުންޑަރަކީ 1980 ގެ އަހަރުތަކުގައި ސޯވިއެޓް ޔޫނިއަންގެ ސިފައިންނާ ދެކޮޅަށް ކާމިޔާބު ހޯދި ބަތަލެއްގެ ގޮތުގައި މަޝްހޫރުވި ޖަލާލުއްދީން ހައްގާނީ އެވެ.
އޭރު ޖަލާލުއްދީނަކީ އެމެރިކާގެ ޖާސޫސީ އިދާރާ، ސެންޓްރަލް އިންޓެލިޖެންސް އެޖެންސީ (ސީއައިއޭ) އަށް މުހިއްމު މީހެކެވެ. އެމެރިކާ އާއި ޕާކިސްތާން ފަދަ ގައުމުތަކުން އޭރު ދިޔެއީ ސޯވިއެޓް ޔޫނިއަނާ ދެކޮޅަށް އުޅޭ ގްރޫޕުތަކަށް ހަތިޔާރު ފޯރުކޮށްދެމުންނެވެ.
ސޯވިއެޓް ޔޫނިއަންގެ ސިފައިންނާއި ހަނގުރާމަ ކުރަމުން ދިޔައިރު، އަދި އޭގެ ފަހުން ވެސް ޖަލާލުއްދީން ހައްގާނީ ގެންދިޔެއީ ބޭރުގެ ހަނގުރާމަވެރިންނާއެކު ގާތް ގުޅުމެއް އުފައްދަމުންނެވެ. އޭގެ ތެރެއިން އެކަކަކީ އުސާމާ ބިން ލާދިން އެވެ.
ޖަލާލުއްދީން ހައްގާނީ ފަހުން ވަނީ 1996 ގައި ވެރިކަމަށް އާއި ތާލިބާނުންނަށް ބައިއަތު ހިފާފަ އެވެ. ދެހާސް އެއް ވަނަ އަހަރު އެމެރިކާ ސިފައިން އަފްގާނިސްތާނަށް އަރައި، އެ ވެރިކަން ވައްޓާލުމާ ހަމައަށް އޭނާ ހުރީ މިނިސްޓަރެއްގެ މަގާމުގަ އެވެ.
ދިގު މުއްދަތަކަށް ބަލިވެ އުޅުމަށް ފަހު ޖަލާލުއްދީން ހައްގާނީ މަރުވުމާއެކު އެ ގްރޫޕުގެ ލީޑަރަކަށް 2018 ވަނަ އަހަރު އައީ އޭނާގެ ދަރި ސިރާޖުއްދީން ހައްގާނީ އެވެ.
ހައްގާނީ ނެޓްވޯކްގެ މާލީ އަދި އަސްކަރީ ބާރާއި އަނިޔާވެރި ސިފަތަކާ ހެދި، ތާލިބާނުންގެ ތެރޭގައި ހިމެނުނަސް، އެ މީހުން ބެލެވިފައި އޮންނަނީ ވަކި ގްރޫޕެއްގެ ގޮތުގަ އެވެ.
އިރުމަތީ އަފްގާނިސްތާނުގައި ބޮޑަށް ހަރަކާތްތެރިވާ ހައްގާނީ ނެޓްވޯކުގެ އަސްކަރީ މަރުކަޒުތައް ޕާކިސްތާނުގެ ހުޅަނގު އުތުރުގައި ހުންނަ ކަމަށް ވެ އެވެ. ތާލިބާނުންގެ ލީޑާޝިޕްގެ ތެރެއިން ހައްގާނީ ނެޓްވޯކްގެ މެމްބަރުން ފެންނަން ފެށީ ވަރަށް ފަހުންނެވެ. އެގޮތުން 2015 ވަނަ އަހަރު ސިރާޖުއްދީން ހައްގާނީއަށް ވަނީ ތާލިބާނުންގެ ޑެޕިއުޓީ ލީޑަރުކަން ދީފަ އެވެ.
އެ މީހުން ދެކެ ބިރުގަންނަނީ ކީއްވެ؟
ފާއިތުވި ވިހި އަހަރުގެ ތެރޭގައި އަފްގާނިސްތާނުގައި ދިން އެންމެ ނުރައްކާތެރި އަދި އެންމެ ހައިރާން ކުރުވަނިވި ބައެއް ހަމަލާތަކުގެ ފަހަތުގައި ވަނީ ހައްގާނީ ނެޓްވޯކެވެ.
އެމެރިކާ އިން ކަނޑައަޅާފައިވާ ބައިނަލްއަގްވާމީ ޓެރަރިސްޓު ގްރޫޕުތަކުގެ ތެރޭގައި އެ މީހުން ހިމެނެ އެވެ. އަދި އދ. އިން ދަތިކުރުމުގެ ފިޔަވަޅު އަޅާފައިވާ ލިސްޓުގައި ވެސް އެ މީހުން ހިމެނެ އެވެ.
ހައްގާނީން މަޝްހޫރުވެފައި ވަނީ އަމިއްލަ އަށް މަރުވެގެން ގިނަ ހަމަލާތަކެއް ދޭ ބަޔެއްގެ ގޮތުގަ އެވެ. އެގޮތުން ކާރާއި ޓްރަކުތަކުގައި ގޮވާ ތަކެތި ހަރުކޮށްގެން ގޮސް ބޮޑެތި އަސްކަރީ މަރުކަޒުތަކާއި އެމްބަސީތަކަށް ވެސް ހަމަލާދީފައި ވެ އެވެ.
ހައްގާނީ ނެޓްވޯކާއި އަފްގާނިސްތާނުގެ ސިފައިންނާ ދެމެދު ގާތް ގުޅުމެއް އޮންނަ ކަމަށް ތުހުމަތު ކުރެވެ އެވެ. އެމެރިކާގެ އެޑްމިރަލް މައިކް މުލެން 2011 ވަނަ އަހަރު ސިފަކުރި ގޮތުގައި ހައްގާނީ ނެޓްވޯކަކީ ޕާކިސްތާނުގެ ޖާސޫސީ އިދާރާގެ އެއް އަތެވެ. ނަމަވެސް ޕާކިސްތާނުން އެކަން ދޮގުކުރެ އެވެ.
ތާލިބާނުން ހަނގުރާމައިގެ މައިދާނުގައި ކުރާ ހުރިހާ ކަމެއްގައި ހައްގާނީންގެ ބޮޑު އެހީތެރިކަމެއް ލިބެ އެވެ. މިދިޔަ ޖޫން މަހު އދ. އިން ނެރުނު ރިޕޯޓެއްގައި ބުނީ ތާލިބާނުންގެ ތެރެއިން ހަނގުރާމައަށް އަބަދުވެސް އެންމެ ތައްޔާރަށް ތިބެނީ ހައްގާނީން ކަމަށެވެ.
އޭގެ އިތުރުން ތާލިބާނުންނާއި އަލް ގައިދާއާ ދެމެދުގައި އޮންނަ މައިގަނޑު މުވާސަލާތީ ގުޅުމަކީ ވެސް ހައްގާނީ ނެޓްވޯކު ކަމަށް އދ. އިން ބުނެ އެވެ.
ތާލިބާނުންގެ އާ ސަރުކާރުގައި އެ މީހުންނަށް ލިބުނީ ކޮން އެއްޗެއް؟
ސަރުކާރުގެ އެންމެ މުހިއްމު އެއް ވުޒާރާ ލިބުނީ ސިރާޖުއްދީން ހައްގާނީ އަށެވެ. އިންޓީރިއާ މިނިސްޓަރު ކަމުގައި ހުރެގެން އަފްގާނިސްތާނުގެ ދާހިލީ ސަލާމަތާ ގުޅޭ ހުރިހާ ކަމެއް އޭނާ ކޮންޓްރޯލް ކުރާނެ އެވެ.
މިއީ އަހަރުތަކެއް ވަންދެން ނުރައްކާތެރި ހަމަލާތަކެއް ދެމުން އައި ގްރޫޕުގެ ލީޑަރުގެ ޒިންމާއަށް އައި ބޮޑު ބަދަލެކެވެ.
އިންޓީރިއާ މިނިސްޓަރުގެ ގޮތުގައި ސިރާޖުއްދީނަށް ޖެހޭނެ އެންމެ ބޮޑު މަސައްކަތަކީ އިސްލާމިކް ސްޓޭޓުގެ ނުރައްކަލާ ކުރިމަތިލުމެވެ. އޭގެ އިތުރުން އަފްގާން ރައްޔިތުންގެ ތެރޭގައި އޮންނަ ނަސްލީ ތަފާތު ކުރުމާ ހެދި ދިމާވާ ގޮންޖެހުންތަކާއި ކުށް މަދު ކުރުމުގެ މަސައްކަތް ވެސް އޭނާ ކުރަން ޖެހޭނެ އެވެ.
ސިރާޖުއްދީން ހައްގާނީގެ ބޮޑުބޭބެ، ހަލީލް ހައްގާނީ ހަމަޖައްސާފައި ވަނީ ރެފިއުޖީންނާ ބެހޭ މިނިސްޓަރު ކަމަށެވެ.
ސިރާޖުއްދީން އާއި ހަލީލްއާ ދެ މީހުންނަކީ ވެސް އެމެރިކާ އިން އެތައް މިލިއަން ޑޮލަރެއް ހުށަހަޅައިގެން ހޯދަމުންދާ ދެ ޓެރަރިސްޓުންނެވެ.
