ރާއްޖޭގެ ޖަލުތަކުގައި ކޮވިޑް-19ގެ ނުރައްކާ އިތުރުވުމާ ގުޅިގެން، ހައި ރިސްކު ގައިދީން ގޭ ބަންދަށް ބަދަލުކުރި އުސޫލުގެ ތެރެއިން މިވަގުތު ގޭ ބަންދުގައި ހުންނެވި ކުރީގެ ރައީސް އަބްދުﷲ ޔާމީން މިއަދު އިދިކޮޅު ޕްރޮގްރެސިވް ކޯލިޝަނުން ބޭއްވި ހިނގާލުމުގައި، ގެކޮޅުގައި ހުންނަވައިގެން "ނުސީދާ" ކޮށް އެ ހަރަކާތުގައި ބައިވެރިވި ބައިވެރިވުމަކީ މަނާކަމެއް ކަމަށް، އަދި އެ މައްސަލަ ބަލަމުންދާކަމަށް މޯލްޑިވްސް ކަރެކްޝަންސް ސާވިސް އިން ބުނެފި އެވެ.
ކަރެކްޝަންސްގެ މީޑިއާ އޮފިޝަލަކު "އަދަދު" އަށް ވިދާޅުވީ މިއަދު އިދިކޮޅުން ބޭއްވި "އިންސާފު ކޮބާ" ހިނގާލުމުގައި މަނީ ލޯންޑަރިންގެ ދައުވާތަކެއް ސާބިތުވެ ޖަލު ހުކުމެއް ތަންފީޒުކުރައްވަމުން ގެންދަވާ ޔާމީން ނުސީދާކޮށް ބައިވެރިވިކަމުގެ މައުލޫމާތު ލިބިފައިވާކަމަށެވެ.
އަދި އެއީ ހަގީގަތެއްނަމަ އެ މައްސަލަ ބަލައި، ފިޔަވަޅު އަޅާނެ ކަމަށެވެ.
"އެ ކުރެއްވި ކަމަކީ، އެއީ މަނާ ކަމެއް ކޮންމެ ގޮތަކަށްވިޔަސް. އެއީ ސިއްހީ ހާލުކޮޅަށްޓަކައި ޖަލުން ގޭ ބަންދަށް ބަދަލުކުރެވިފަ ހުރި ފަރާތެއް އެއީ. ދެން އަޅުގަނޑުމެންވެސް އެއީ ހަގީގަތެއްތޯ ބަލަން އެންމެ ފުރަތަމަ ޖެހޭނީ،" ކަރެކްޝަންސްގެ އޮފިޝަލް މި ނޫހަށް ވިދާޅުވި އެވެ.
ނަމަވެސް މައްސަލަ ބެލުމަށްފަހު ޔާމީނާ ދެކޮޅަށް އަޅާނީ ކޮން ފިޔަވަޅެއްކަމެއް އޮފިޝަލް ވިދާޅެއްނުވެ އެވެ.
އޭގެ ފަހުން ކޮމިޝަނާ އޮފް ޕްރިޒަންސް އަހުމަދު މުހައްމަދު ކުރެއްވި ޓްވީޓެއްގައި ވިދާޅުވީ ޔާމީން މިއަދު އަމަލުކުރެއްވީ ގޭ ބަންދުކޮށްފައިވާ އިގުރާރާ ހިލާފަށް ކަމަށެވެ.
"އެހެންކަމުން މި މައްސަލަ ބަލާ، ފިޔަވަޅު އަޅާނަން،" އޭނާ ވިދާޅުވި އެވެ.
އިދިކޮޅުން މިއަދު ބޭއްވި އިންސާފު ކޮބާ ހިނގާލުން ނިންމާލުމުގެ ތެރެއިން ސަޕޯޓަރުން ޕީޕީއެމް އޮފީސް ކައިރިޔަށް އެއްވި ވަގުތުކޮޅުގައި ރައީސް ޔާމީން ވަނީ އެމަނިކުފާނު މިހާރު ދިރިއުޅުއްވާ ގެކޮޅު ހ. ދޫވެހި ގެ ކުޑަދޮރަކުން އާންމުންނަށް ހަނާއަޅުއްވައި، ޕީޕީއެމްއަށް ނިސްބަތްވާ ދިދައެއް ނަންގައިވައިގެން ހޫރުވައިފަ އެވެ. ރައީސް ޔާމީންގެ ގެކޮޅުކަމުގައިވާ ހ. ދޫވެހި ހުންނަނީ ޕީޕީއެމް އޮފީސް ހުންނަ ބްލޮކްއާއި ޖެހިގެން ހުންނަ ބްލޮކްގެ ކަންމައްޗަށެވެ.
ރައީސް ޔާމީން މިވަގުތު ތަންފީޒުކުރަމުން ގެންދަވަނީީ ގއ. ވޮޑަމުލާގެ އެކުއިޒިޝަން ކޮސްޓްގެ ގޮތުގައި ލިބުނު އެއް މިލިއަން ޑޮލަރު އެމަނިކުފާނުގެ އަމިއްލަ އެކައުންޓަށް ޖަމާކުރައްވައި، މަނީ ލޯންޑާކުރިކަމުގެ މައްސަލައިގައި އެމަނިކުފާނަށް އިއްވި ފަސް އަހަރު ދުވަހުގެ ޖަލު ހުކުމެވެ. އިސްތިއުނާފުގައި އޮތް އެ ހުކުމުގައި ހިމެނޭ ފަސް މިލިއަން ޑޮލަރުގެ ޖޫރިމަނާ އެމަނިކުފާނު ނުދައްކަވާތީ އެ މައްސަލަވެސް ދައުލަތުން ވަނީ ސިވިލް ކޯޓަށް ހުށަހަޅާފަ އެވެ.
ވޮޑަމުލާގެ މައްސަލައިގެ އިތުރުން ރ. ފުއްގިރި މައްސަލައިގައިވެސް އެމަނިކުފާނާއި ދެކޮޅަށް ވަނީ ދައުވާ އުފުލާފަ އެވެ. އަދި ވ. އާރަށުގެ މައްސަލައިގައިވެސް އެމަނިކުފާނާ ދެކޮޅަށް ދައުވާ ކުރަން މިހާރު ވަނީ ފޮނުވާފަ އެވެ.
