ކޮލަމްބޯ، ސްރީލަންކާ (ސެޕްޓެމްބަރު 8) - ސްރީ ލަންކާގައި ކޮވިޑު ވައިރަހުގެ ޑެލްޓާ ވޭރިއެންޓު ފެތުރެމުން ދާތީ ދަރިން ހޯދަން ބޭނުންވާ އަންހެނުން އެއް އަހަރު ވަންދެން މަޑުކުރަން ސިއްހީ ފަރާތްތަކުން ލަފާދީފި އެވެ.
ބުދަ ދުވަހު އޮތް ލަންކާގެ ހެލްތު ޕްރޮމޯޝަން ބިޔުރޯގެ ޕްރެސް ބްރީފިންގައި ގައިނިކޮލޮޖިސްޓް ޑރ. ހަރްޝާ އަޓަޕައްޓު ވިދާޅުވީ ޑެލްޓާ ވޭރިއެންޓުގެ ސަބަބުން މަންމަ އާއި ބަނޑުގައި އޮންނަ ދަރިފުޅު ވެސް ނުރައްކަލަށް ހުށަހެޅޭނެ ކަމަށެވެ.
"[ދަރިން ހޯދަން ބޭނުންވާ މީހުންނަށް] މަޑުކުރެވެން އޮތް ނަމަ، އަޅުގަނޑުގެ ލަފައަކީ އެއް އަހަރު ވަންދެން ދަރިއަކު ނުހޯދާ މަޑުކޮށްލުން،" ޑރ. ހަރްޝާ ވިދާޅުވި އެވެ.
ރިޕޯޓުތައް ބުނާ ގޮތުން މީގެ ކުރިން ލަންކާގައި ކޮވިޑް ޖެހޭ މާބަނޑު އަންހެނުންގެ ތެރެއިން ސީރިއަސްވެފައި ވަނީ ހަމައެކަނި ވިހަން ކައިރިވެފައިވާ މީހުންނެވެ. އެއާ ހިލާފަށް، ޑެލްޓާ ވޭރިއެންޓު ފެތުރެން ފެށި ފަހުން ފުރަތަމަ އަދި ދެވަނަ ތިން މަހުގައި ވެސް ސީރިއަސް ހާލަތަށް ދާ މާބަނޑު އަންހެނުން ވަނީ އިތުރުވެފަ އެވެ.
ދަރިން ހޯދުން އެއް އަހަރަށް ފަސްކުރަން އެދިފައި ވާއިރު، ލަންކާގެ ކޮވިޑުގެ ހާލަތު މި ވަގުތު ވަރަށް ގޯހެވެ. ދުވާލަކު ދުއިސްތައެއްހާ މީހުން ދަނީ މި ބަލީގައި މަރުވަމުންނެވެ.
އެ ގައުމުން މިހާތަނަށް ޖުމްލަ 472،000 އަށް ވުރެ ގިނަ ކޭސް ފެނިފައި ވާއިރު، 10،504 މީހުން ވަނީ މަރުވެފަ އެވެ. ލަންކާ ގައި ގިނަ އަދަދެއްގެ ދިވެހިން ވެސް ދިރިއުޅެމުންދެ އެވެ.
