ލަންޑަން، އިނގިރޭސި ވިލާތް (ސެޕްޓެމްބަރު 8) - ތިމާވެއްޓާ ގުޅޭ 1،500 އަށް ވުރެ ގިނަ ޖަމިއްޔާ ހިމެނޭ ބައިނަލްއަގްވާމީ ނެޓްވޯކަކުން ކޮޕް-26 ސަމިޓު ފަސްކުރަން އިނގިރޭސި ވިލާތަށް ގޮވާލައިފި އެވެ.
ކްލައިމެޓް އެކްޝަން ނެޓްވޯކް (ކޭން) އިން ނެރުނު ބަޔާނެއްގައި ބުނީ ކޮވިޑު ކޭސްތައް އިތުރުވުމާއި، ވެކްސިންގެ ހަމަހަމަކަން ނެތުމާއި، އިނގިރޭސި ވިލާތުގެ ރަތް ލިސްޓުގައި ހިމެނޭ 60 އަށް ވުރެ ގިނަ ގައުމުން އަންނަ މީހުން ކަރަންޓީނު ވާން ޖެހުން ފަދަ ކަންކަމާ ހެދި ރައްކާތެރިކަމާއެކު ބައްދަލުވުން ނުބޭއްވޭނެ ކަމަށެވެ.
މޫސުމީ ބަދަލާ ގުޅޭ ގޮތުން ބާއްވާ އދ. ގެ އެ ބައްދަލުވުން އޮންނާނީ ނޮވެމްބަރު މަހު އިނގިރޭސި ވިލާތުގަ އެވެ. ބާރަ ދުވަހަށް ދެމިގެންދާ ސަމިޓަކީ "ރައްކާތެރި، އެންމެންގެ ބައިވެރިވުން ހިމެނޭ އަދި އިންސާފުވެރި ސަމިޓަކަށް" ހަދަން މި ހާލަތު ތަން ނުދޭ ކަމަށް ބަޔާނުގައި ވެ އެވެ.
"އަޅުގަނޑުމެންގެ ކަންބޮޑުވުމަކީ މޫސުމީ ބަދަލުގެ އަސަރު އެންމެ ބޮޑަށް ކުރަމުންދާ ގައުމުތަކަށް މުއްސަނދި ގައުމުތަކުން އެހީނުވެ، ވެކްސިން ނުލިބި އުފެދިފައިވާ ހާލަތާ ހެދި އެ ގައުމުތަކަށް ސަމިޓުގައި ބައިވެރިވުމުގެ ފުރުސަތު ގެއްލުން،" ކޭންގެ އެގްޒެކްޓިވް ޑިރެކްޓަރު ތަސްނީމް އެސޮޕް ވިދާޅުވި އެވެ.
ނަމަވެސް އިނގިރޭސި ވިލާތުން ބުނީ ދުނިޔެއަށް ދިމާވެފައިވާ މޫސުމީ ބަދަލާ ގުޅޭ ކާރިސާއަކީ ބައްދަލުވުން ފަސްކުރެވޭ ވަރަށް ވުރެ ސީރިއަސް ކާރިސާއެއް ކަމަށެވެ.
މި އަހަރުގެ ކޮޕް ސަމިޓުގެ ރައީސް އަދި އިނގިރޭސި ތިމާވެށީގެ މިނިސްޓަރު އަލޮކް ޝަރުމާ އޭއެފްޕީ އަށް ވިދާޅުވީ ސަމިޓު ބާއްވަން ޖެހޭ ސަބަބުތައް އދ. އިން ނެރުނު ރިޕޯޓުން ސާފުވާ ކަމަށާއި މިހާރު ވެސް ބައްދަލުވުން މާ ބޮޑަށް ލަސްވެއްޖެ ކަމަށެވެ.
ކޮޕް26 ސަމިޓު ބާއްވަން ކުރިން ރާވާފައި އޮރީ މިދިޔަ އަހަރުގެ ނޮވެމްބަރު މަހު އެވެ. ނަމަވެސް ބައްދަލުވުން ނުބާއްވާ މި އަހަރުގެ ނޮވެމްބަރަށް ފަސްކުރީ ކޮވިޑު ބަލިމަޑުކަމާ ހެދި އެވެ.
ސަމިޓަށް އިނގިރޭސިވިލާތަށް ދަތުރުކުރާ ވަފުދުތަކުން ކަރަންޓީނު ވާން ޖެހޭ ނަމަ އެ ފަރާތްތަކުގެ ހަރަދު ދޭނެ ކަމަށް އެ ގައުމުން ވަނީ ބުނެފަ އެވެ. އޭގެ އިތުރުން ވަފުދުތަކުގެ މެމްބަރުންނަށް އަވަހަށް ވެކްސިން ދެވޭނެ ގޮތެއް ހެދުމަށް އެ ގައުމުން ވަނީ ހުށަހަޅާފަ އެވެ.
އިނގިރޭސި ސަރުކާރުން ބުނީ ވެކްސިން ޖެހުމުގެ ކަންކަން މި ހަފުތާގައި ފަށާނެ ކަމަށާއި ސަމިޓު ފެށުމުގެ ކުރިން ވެކްސިން ފުރިހަމަ ކުރެވޭނެ ކަމަށެވެ. ޔޫރަޕުގެ 55 ޕަސެންޓު މީހުން މިހާތަނަށް ވެކްސިން ފުރިހަމަކޮށްފައި ވާއިރު، އެފްރިކާ އިން ވެކްސިން ފުރިހަމަ ކުރީ އެންމެ ތިން ޕަސެންޓު މީހުންނެވެ.
