ކާބުލް، އަފްގާނިސްތާން (ސެޕްޓެމްބަރު 8) - މިދިޔަ މަހު އަފްގާނިސްތާނުގެ ވެރިކަމަށް އައި ތާލިބާނުންގެ އާ ސަރުކާރުގެ ބައެއް އިސް މަގާމުތަކަށް ކަނޑައަޅާފައިވާ މީހުންގެ ނަންތައް ރޭ ވަނީ އިއުލާނުކޮށްފަ އެވެ.
އދ. އިން ބްލެކްލިސްޓުކޮށްފައިވާ މުއްލާ މުހައްމަދު ހަސަން އަހުންދް އަށް ބޮޑު ވަޒީރުކަން ދީފައި ވާއިރު، ނައިބަކަށް ހަމަޖައްސާފައި ވަނީ ތާލިބާނުންގެ ކޯ ފައުންޑަރު އަބްދުލް ގަނީ ބަރާދަރް އެވެ.
ތާލިބާނުންގެ އެތެރޭގެ މަސައްކަތްތައް ދާ ގޮތާއި ލީޑާޝިޕާ ގުޅޭ މައުލޫމާތު އެ މީހުން ގެންގުޅެނީ ސިއްރުކޮށްގެންނެވެ. އެގޮތުން 1996 އިން 2001 އަށް ވެރިކަން ކުރިއިރު ވެސް އަމަލު ކުރީ އެގޮތަށެވެ.
އާ ސަރުކާރަކީ ވަގުތީ ސަރުކާރެއް ކަމަށް ތާލިބާނުން ބުނެފައި ވާއިރު، ކެބިނެޓުގައި ހިމެނޭ ގިނަ މަގާމުތަކަކަށް ކަނޑައެޅި މީހުންގެ ނަންތައް އަދިވެސް ހާމައެއް ނުކުރެ އެވެ.
ތިރީގައި އެ ވަނީ މިހާތަނަށް ހާމަކުރި ފަރާތްތަކާ ގުޅޭ ބައެއް މައުލޫމާތެވެ.
ވަގުތީ ބޮޑު ވަޒީރު ކަމަށް މުހައްމަދު ހަސަން އަހުންދް
މުއްލާ މުހައްމަދު ހަސަން އަހުންދް އަކީ ތާލިބާނުންގެ ޒަމާންވީ މެމްބަރެކެވެ. އޭނާ އަކީ ތާލިބާނުންގެ ފައުންޑަރު އަދި އެންމެ ފުރަތަމަ އިސް ލީޑަރު މުއްލާ އުމަރުގެ ގާތް މީހެކެވެ. އެގޮތުން މުއްލާ އުމަރުގެ ސިޔާސީ އެޑްވައިރަކަށް އުޅުނެވެ.
ތާލިބާނުންގެ އެންމެ މަތީ ކައުންސިލްގެ މެމްބަރެއްގެ ގޮތުގައި ވެސް ހިމެނޭ އަހުންދް އަކީ ތާލިބާނުންގެ ކުރީގެ ސަރުކާރުގެ ޑެޕިއުޓީ ފޮރިން މިނިސްޓަރެވެ. އދ. ގެ ސަލާމަތީ މަޖިލީހުން ދަތިކުރުމުގެ ފިޔަވަޅު އަޅާފައިވާ މީހުންގެ ލިސްޓުގައި އޭނާގެ ނަން ހިމެނެ އެވެ.
ތާލިބާނުންގެ ކުރީގެ ވެރިކަމުގައި އޭނާ ވަނީ ކަންދަހާރްގެ ގަވަރުނަރުކަން ވެސް ކޮށްފަ އެވެ. އދ. އިން ބުނެފައި ވަނީ އަހުންދް އަކީ ތާލިބާނުންގެ ތެރެއިން އެންމެ ކާމިޔާބު އެއް ކޮމާންޑަރުގެ ގޮތުގައި މަޝްހޫރުކަން ހޯދާފައިވާ މީހެއް ކަމަށެވެ.
ބޮޑު ވަޒީރުގެ ނައިބު ކަމަށް މުއްލާ ބަރާދަރް
އަބްދުލް ގަނީ ބަރާދަރް އަކީ ތާލިބާނުން އުފެދުނު ކަންދަހާރުގައި އުޅެ ބޮޑުވި މީހެކެވެ. ނަވާރަ ސަތޭކަ ހަތްދިހައިގެ އަހަރުތަކުގައި އޭރުގެ ސޯވިއެޓް ޔޫނިއަނުން އަފްގާނިސްތާނަށް އެރުމުން ބަރާދަރް މަސައްކަތް ފެށީ ހަނގުރާމަވެރިއެއްގެ ގޮތުގަ އެވެ.
ޕާކިސްތާނުގައި 2010 ވަނަ އަހަރު ހައްޔަރު ކުރުމަށް ފަހު 2018 އާ ހަމައަށް އޭނާ ހުރީ ޖަލުގަ އެވެ. އޭނާ މިނިވަން ކުރީ އެމެރިކާގެ ޕްރެޝަރާ ހެދި އެވެ. މިނިވަން ކުރުމާއެކު ދިރިއުޅެން ފެށީ ގަތަރުގަ އެވެ. ރިޕޯޓުތައް ބުނާ ގޮތުން އޭނާ ވަނީ މުއްލާ އުމަރާއެކު ހަނގުރާމައިގެ މައިދާނުގައި އުޅެފަ އެވެ.
ސޯވިއެޓް ޔޫނިއަންގެ ސިފައިން އަފްގާނިސްތާން ދޫކޮށް ދިޔުމުން 1990 ގެ އަހަރުތަކުގައި އެ ގައުމުގެ އޮތް ދާހިލީ ހަމަނުޖެހުމާއި ކޮރަޕްޝަންގެ ތެރެއިން ތާލިބާނުން އުފެދިގެން އައީ މުއްލާ އުމަރާއި ބަރާދަރް ގުޅިގެން ކުރި މަސައްކަތުންނެވެ.
އެމެރިކާގެ ފައުޖުތައް އަފްގާނިސްތާނަށް އަރާ، 2001 ވަނަ އަހަރު ތާލިބާން ސަރުކާރު ވެއްޓުމުން ދެން އުފެދުނު ހުޅަނގުގެ ތާއީދު އޮތް ސަރުކާރާ މަޝްވަރާ ކުރަން ދިޔަ ތާލިބާނުންގެ މަދު މީހުންގެ ތެރޭގައި އޭނާ ހިމެނެ އެވެ.
އޭރު އެމެރިކާއިން ތާއީދު ކުރި ރައީސް ހާމިދު ކަރްޒާއީ ކައިރިއަށް ބަރާދަރް އާއި އިތުރު ތާލިބާނުންތަކެއް ގޮސް ކުރެވުނު މަޝްވަރާއަށް ފަހު ތާލިބާނުން ވަނީ ހުޅަނގުގެ ތާއީދާއެކު އޮތް އާ ސަރުކާރު ބަލައިގަންނާނެ ކަމަށް ބުނެފަ އެވެ.
ދެހާސް އަށާރަ ވަނަ އަހަރުން ފެށިގެން ގަތަރުގައި ހުރި ބަރާދަރް ވަނީ އޭރުން ފެށިގެން ތާލިބާނުންގެ ސިޔާސީ އޮފީހުގެ އިސްވެރިޔާގެ ގޮތުގައި މަސައްކަތްކޮށްފަ އެވެ. ވިހި އަހަރަށް ފަހު އެމެރިކާ ސިފައިން އަފްގާން ފަސްގަނޑު ދޫކޮށް ދިޔުމާ ގުޅޭ ގޮތުން ތާލިބާނުންނާއި އެމެރިކާއާ ދެމެދު އެކުލަވާލި އެއްބަސްވުމުގައި ތާލިބާނުންގެ ފަރާތުން އެންމެ އިސްކޮށް އުޅުނީ އޭނާ އެވެ.
އިންޓީރިއާ މިނިސްޓަރު ކަމަށް ސިރާޖުއްދީން ހައްގާނީ
ސިރާޖުއްދީން ހައްގާނީ އަކީ ސޯވިއެޓް ޔޫނިއަންގެ ސިފައިންނާ ދެކޮޅަށް އަފްގާނިސްތާނުގައި ހަނގުރާމަ ކުރި މަޝްހޫރު ކޮމާންޑަރެއްގެ ދަރިއެކެވެ. އޭނާ ވަނީ ތާލިބާނުންގެ ޑެޕިއުޓީ ލީޑަރު ކަމާއި ބާރުގަދަ ހައްގާނީ ނެޓްވޯކްގެ ވެރިޔާގެ މަގާމު ވެސް އަދާކޮށްފަ އެވެ.
ހައްގާނީ ނެޓްވޯކަކީ ޓެރަރިސްޓު ޖަމާއަތެއް ކަމަށް އެމެރިކާ އިން ކަނޑައަޅާފައިވާ ބަޔެކެވެ. އެ ގްރޫޕުން މަޝްހޫރުވެފައި ވަނީ އަމިއްލަ އަށް މަރުވެގެން ގިނަ ހަމަލާތަކެއް ދޭ ބަޔެއްގެ ގޮތުގަ އެވެ. ފަހަކަށް އައިސް ކާބުލްގައި ހިންގި އެންމެ ބޮޑެތި ބައެއް ހަމަލާތަކުގެ ފަހަތުގައި ވަނީ އެ މީހުން ކަމަށްވެ އެވެ.
އޭގެ އިތުރުން އަފްގާން ސަރުކާރުގެ އިސް އޮފިޝަލުންގެ މަރާއި ހުޅަނގުގެ ރައްޔިތުން ރަހީނުކޮށް ފައިސާ ހޯދުން ފަދަ އެތައް އަމަލެއް ވެސް ހައްގާނީ ނެޓްވޯކުން ހިންގާ ކަމަށް ތުހުމަތު ކުރެވެ އެވެ. އެގޮތުން 2014 ވަނަ އަހަރު އެމެރިކާ ސިފައިންގެ ބޯވް ބާގްޑާލް ރަހީނުކުރީ އެ މީހުންނެވެ.
ޑިފެންސް މިނިސްޓަރު ކަމަށް މުއްލާ ޔައުގޫބް
މުއްލާ ޔައުގޫބަކީ ތާލިބާނުންގެ ކޯ ފައުންޑަރު މުއްލާ އުމަރުގެ ދަރިއެކެވެ. އޭނާއަކީ މި ވަގުތު ތާލިބާނުންގެ ބާރުގަދަ އަސްކަރީ ކޮމިޝަނުގެ ވެރިޔާ އެވެ. ތާލިބާނުންގެ އެންމެ އިސް ލީޑާރުގެ ގޮތުގައި މުއްލާ އުމަރަށް ބޮޑު ތާއީދެއް އެ ގްރޫޕުގެ ތެރެއިން އޮތެވެ. އެހެންކަމުން ޔައުގޫބް ވެފައި ވަނީ ތާލިބާނުންގެ ތެރޭގައި އެއްބައިވަންތަކަން ދަމަހައްޓައިދޭ ރަމްޒަކަށެވެ.
