ކާބުލް، އަފްގާނިސްތާން (ސެޕްޓެމްބަރު 7) - މިިދިޔަ މަހު އަފްގާނިސްތާނުގެ ވެރިކަމަށް އައި ތާލިބާނުން އުފެއްދި ސަރުކާރުގައި ހިމެނޭ އިސް ފަރާތްތަކުގެ ނަންތައް އިއުލާނުކޮށްފި އެވެ.
ތާލިބާނުން ބުނެފައި ވަނީ މި ފަހަރު ވެރިކަން ކުރާނީ ތަފާތުކޮށް ގިނަ މީހުންގެ ބައިވެރިވުމާއެކު ކަމަށެވެ. އަދި އަންހެނުންގެ ހައްގުތަކަށް އިހްތިރާމް ކުރާނެ ކަމަށް ވެސް ބުނެފައި ވެ އެވެ.
އަންގާރަ ދުވަހުގެ ރޭ އޮތް ނޫސްވެރިންގެ ބައްދަލުވުމެއްގައި ތާލިބާނުންގެ ތަރުޖަމާނު ޒަބީހުﷲ މުޖާހިދު ބުނީ އަލަށް އިއުލާނު ކުރި ސަރުކާރަކީ ވަގުތީ ސަރުކާރެއް ކަމަށެވެ.
ވަގުތީ ސަރުކާރުގެ ބޮޑު ވަޒީރުގެ ގޮތުގައި ހުންނާނީ ތާލިބާނުންގެ ތެރޭގައި އެތައް އަހަރެއް ހޭދަކޮށްފައިވާ މުއްލާ މުހައްމަދު ހަސަން އަހުންދް އެވެ.
އޭނާ އަކީ މީގެ ކުރިން 1996 އިން 2001 އަށް ތާލިބާނުން ވެރިކަން ކުރިއިރު ޑެޕިއުޓީ ބޮޑު ވަޒީރުކަން ކުރި މީހެކެވެ. އޭނާ އަކީ އދ. އިން ބްލެކްލިސްޓުކޮށްފައިވާ މީހެކެވެ.
ވަގުތީ ސަރުކާރުގެ ޑެޕިއުޓީ ލީޑަރެއްގެ ގޮތުގައި ހުންނާނީ ތާލިބާނުންގެ ކޯ ފައުންޑަރު އަބްދުލް ގަނީ ބަރާދަރް އެވެ. އޭނާ އަކީ މީގެ ކުރިން ތާލިބާނުންގެ ސިޔާސީ އޮފީހުގެ ވެރިޔާ އެވެ.
ތާލިބާނުންގެ ފައުންޑަރު އަދި މަރުވެފައިވާ ކުރީގެ އިސް ލީޑަރު މުއްލާ އުމަރުގެ ދަރިފުޅު، މުއްލާ ޔައުގޫބް ހަމަޖައްސާފައި ވަނީ ޑިފެންސް މިނިސްޓަރުގެ މަގާމަށެވެ.
އިންޓީރިއާ މިނިސްޓަރު ކަމަށް ސިރާޖުއްދީން ހައްގާނީ ހަމަޖައްސާފައި ވާއިރު، އޭނާ އަށް ވަނީ ޑެޕިއުޓީ ލީޑަރެއްގެ ލަގަބު ވެސް ދީފަ އެވެ.
"ކެބިނެޓު އަދި ފުރިހަމައެއް ނުވޭ. މިއީ ވަގުތީ ސަރުކާރެއް،" މެމްބަރުން އިއުލާނު ކުރުމަށް ފަހު މުޖާހިދު ބުންޏެވެ.
"ގައުމުގެ އެހެން ހިސާބުތަކުން ވެސް މީހުން ގެނެސްގެން ސަރުކާރުގައި ހިމެނުމަށް މަސައްކަތް ކުރާނަން."
