ކޮލަމްބޯ، ސްރީ ލަންކާ (ސެޕްޓެމްބަރު 7) - ސްރީ ލަންކާ އަށް ދިމާވެފައިވާ ބޭރު ފައިސާގެ ދަތިކަމަކީ "ނުރައްކާތެރި ފޮރިން އެކްސްޗޭންޖް ކާރިސާއެއް" ކަމަށް ފިނޭންސް މިނިސްޓަރު ބެސިލް ރާޖަޕަކްސަ ވިދާޅުވެއްޖެ އެވެ.
ރައީސް ގޮތަބަޔަ ރާޖަޕަކްސަގެ އެންމެ ހަގު ކޮއްކޯފުޅު، އުމުރުން 70 އަހަރުގެ ބެސިލް ވިދާޅުވީ ކޮވިޑު ބަލިމަޑުކަމާ ހެދި ދައުލަތުގެ އާމްދަނީ ވެސް ވަރަށް ބޮޑަށް ކުޑަވެފައިވާ ކަމަށެވެ.
ލަންކާ އަށް ބޭނުންވާ ކާބޯތަކެތި އިމްޕޯޓު ކުރަން ބޭރު ފައިސާ ނުލިބޭތީ މިދިޔަ ހަފުތާގައި ވަނީ ކުއްލި ނުރައްކަލުގެ ހާލަތު އިއުލާނުކޮށް، ތަކެތީ އަގު ކޮންޓްރޯލް ކުރަން ފައްޓައިފަ އެވެ.
ލަގްޒަރީ މުދަލުގެ ގޮތުގައި ހިމެނޭ ކާރާއި އެހެން ބައެއް ސާމާނު އެތެރެ ކުރުން މިދިޔަ އަހަރުން ފެށިގެން އޮތީ މަނާކޮށްފަ އެވެ. އެއީ ކާތަކެތީގެ އިމްޕޯޓަށް ބޭރު ފައިސާ ލިބޭނެ ގޮތް ހެދުމަށެވެ.
"އަޅުގަނޑުމެންނަށް ދިމާވެފައި މި އޮތީ ނުރައްކާތެރި ފޮރިން އެކްސްޗޭންޖް ކާރިސާއެއް،" ފިނޭންސް މިނިސްޓަރު ޕާލިމެންޓުގައި ވިދާޅުވި އެވެ.
"ލޮކްޑައުންގެ ސަބަބުން ލަންކާ ރުޕީޒްގެ ގޮތުގައި ލިބޭ އާމްދަނީ ވެސް ވަނީ ދަށްވެފައި."
ކޮވިޑު ބަލިމަޑުކަމާ ހެދި ލަންކާގެ ފަތުރުވެރިކަމުގެ ސިނާއަތް ހުއްޓުމަކަށް އައިސްފައި ވާއިރު، މިދިޔަ އަހަރު އެ ގައުމުގެ އިގްތިސާދު ވަނީ 3.6 ޕަސެންޓު ދަށްވެފައެވެ.
ބޭރު ފައިސާ ނުލިބޭތީ ކާބޯތަކެތީގެ އިތުރުން ބޭސް އިމްޕޯޓް ކުރަން ވެސް ދަތިވެފައި ވާއިރު، ޑޮލަރު އިތުރަށް ހޯދާނެ ގޮތްތަކުގެ ވާހަކަ ބެސިލް ވިދާޅުވެފައެއް ނުވެ އެވެ.
މައި އިދިކޮޅު އެސްޖޭބީ ޕާޓީން ބުނީ އަންނަ އަހަރާ ހަމައަށް ދާއިރު، ސޮވެރިން ދަރަނި ޑީފޯލްޓުވިޔަ ނުދިނުމަށް އިންޓަނޭޝަނަލް މަނިޓަރީ ފަންޑު (އައިއެމްއެފް) ބެއިލް އައުޓަކަށް އެދެން ޖެހޭ ކަމަށެވެ.
ނަމަވެސް ޖޫނިއާ ފިނޭންސް މިނިސްޓަރު އަޖިތު ކަބްރާލް ވިދާޅުވީ ލަންކާގެ ދަރަނި ޑީފޯލްޓު ނުވާނެ ކަމަށެވެ.
"ލަންކާގެ ދަރަނި ނުދެއްކޭނެ ކަމަށް މި ފެތުރޭ ރިޕޯޓުތަކާ މެދު ކަންބޮޑުވާ ހުރިހާ ފަރާތްތަކަށް އަޅުގަނޑު ބުނަން ބޭނުން ވަނީ ދަރަނި ދެއްކުމުގެ ގާބިލްކަން އަޅުގަނޑުމެންގެ އަތުގައި އެބަ އޮތޭ،" އަންގާރަ ދުވަހު ޕާލިމެންޓުގައި ކަބްރާލް ވިދާޅުވި އެވެ.
ރަސްމީ ތަފާސްހިސާބުން ދައްކާ ގޮތުގައި ޖުލައި މަސް ނިމުނުއިރު ލަންކާގެ ބޭރު ފައިސާގެ ރިޒާވްގެ ގޮތުގައި ހުރީ 2.8 ބިލިއަން ޑޮލަރެވެ. މި އަހަރުގެ ބާކީ އޮތް ބައިގައި ބޭރުގެ ދަރަނީގެ ގޮތުގައި ލަންކާއިން 2.0 ބިލިއަން ޑޮލަރު ދައްކަން ޖެހެ އެވެ.
މަރުކަޒީ ބޭންކުގެ ކުރީގެ ގަވަރުނަރު ޑަބްލިއު އޭ ވިޖެވަރްދެނަ އޭއެފްޕީ އަށް ވިދާޅުވީ އެކުވެރި ގައުމެއްގެ އެހީތެރިކަން ނުލިބިއްޖެ ނަމަ އައިއެމްއެފްގެ ބެއިލްއައުޓަށް އެދެން ސަރުކާރަށް މަޖުބޫރުވާނެ ކަމަށެވެ.
"ސްރީ ލަންކާ އިން އައިއެމްއެފް އަށް ދާން މަޖުބޫރު ވާނެ،" ވިޖެވަރްދެނަ ވިދާޅުވި އެވެ.
"މި ވަގުތު ޗައިނާ ނުވަތަ އިންޑިއާގެ އެހީތެރިކަން ނެތި އިމްޕޯޓުތައް ދެމެހެއްޓޭނެ ވަރަށް ވެސް ބޭރު ފައިސާ ނެތް."
ބައިނަލްއަގްވާމީ ރޭޓިން އޭޖެންސީތަކުން ވަނީ ލަންކާގެ ކްރެޑިޓް ސްޓެޓަސް ދަށްކޮށްފައެވެ.
