މާލެއަށް ކަރަންޓު ދޭ ޖަނަރޭޓަރުތައް ކައިރި ދިރިއުޅޭ ރައްޔިތުންނަށް ބަދަލުގައި ހުޅުމާލެއިން ގޯތި ދިނުމަށް މާލޭ ސިޓީ ކައުންސިލްގެ ފަރާތުން ރައީސުލްޖުމްހޫރިއްޔާގެ އޮފީހުގައި އެދެފި އެވެ.
ސްޓެލްކޯ ސަރަހައްދުގައި ދިރިއުޅޭ ރައްޔިތުންނަށް، ހާއްސަކޮށް ގ. ފެހިހިރި އާއި ގ. ރަސްރޯނުގެ ރައްޔިތުނަށް އިންޖީނުގެތަކުން އިވޭ އަޑާއި ދުވާ ވަހާއި އަރާ ދުމާއި ވައިބްރޭޝަންގެ ސަބަބުން އިންސާނީ ހައްގުތައް ގެއްލިފައިވާ ކަމަށް އެޗްއާރްސީއެމުން ވަނީ މީގެ ކުރިން ބުނެފަ އެވެ.
ޖަނަރޭޓަރުތުގެ މައްސަލަ ރައްޔިތުންގެ މަޖިލީހާއި ރައީސް އޮފީހާއި ސަރުކާރުގެ ވަރަށް ގިނަ އިދާރާތަކަށް ހުށަހަޅައިގެން އެ ދެ ގޭގެ ރައްޔިތުން އެކަމަށް ހައްލެއް ހޯދުމަށް މަސައްކަތް ކުރަނިކޮށް މާލޭ ސިޓީ ކައުންސިލުން ނިންމީ ބަދަލުގައި އެމީހުންނަށް އެހެން ސަރަހައްދަކުން ގޯތި ދިނުމަށެވެ.
"އަދަދު" އާ ވާހަކަ ދައްކަވަމުން މާލޭގެ މޭޔަރު ޑރ. މުހައްމަދު މުއިއްޒު ވިދާޅުވީ ކައުންސިލްގެ ނިންމުމާ ގުޅިގެން ފެހިހިރި އާއި ރަސްރޯނު ހިމެނޭ ގޮތަށް ސްޓެލްކޯ ކައިރި ހުރި ގެތަކަށް ހުޅުމާލެއިން ބަދަލު ދިނުމަށް ރައީސް އޮފީހުގައި އިއްޔެ ސިޓީއަކުން އެދިފައިވާނެ ކަމަށެވެ.
ސްޓެލްކޯ ސަރަހައްދުގައި ދިރިއުޅޭ ރައްޔިތުންނަށް ހުޅުމާލެއިން ގޯތި ދިނުމަށް ކައުންސިލުން އެދުނުއިރު ރައީސް އޮފީހުގެ ވިސްނުން އެކަމުގައި ތަފާތެވެ. މި ނޫހާ ވާހަކަ ދައްކަވަމުން ރައީސް އިބްރާހިމް މުހައްމަދު ސޯލިހުގެ ތަރުޖަމާނު ވިދާޅުވެފައި ވަނީ ސްޓެލްކޯއިން އެ ސަރަހައްދުގައި ބަހައްޓާފައިވާ ކުދި ޖަނަރޭޓަރުތައް ހުޅުމާލެއަށް ބަދަލު ކުރުމުގެ މަސައްކަތް މިހާރު ކުރަމުންދާ ކަމަށާއި އެކަން ނިމުމުން މައްސަލަ ހައްލުވީ ކަމަށް ސަރުކާރުން ގަބޫލު ކުރާ ކަމަށެވެ.
އެކަމުގައި ސްޓެލްކޯއިން އަބަދުވެސް ބުނަމުންދިޔައީ، އުނދަގޫވަނީ މާލެއަށް ބޭނުންވާ ކަރަންޓު ދިނުމަށް އެމަޖެންސީކޮށް ބަހައްޓާފައިވާ ޖަނަރޭޓަރުތަކުގެ ސަބަބުން ކަމަށެވެ. އަދި ހުޅުމާލޭގައި ގާއިމްކޮށްފައި ހުރި 50 މެގަވޮޓްގެ ބިޔަ ޖަނަރޭޓަރު މާލެއާ މިހާރު ގުޅާލާފައި އޮތުމުން ކުދި ޖަނަރޭޓަރުތައް ބަންދުކޮށްފައިވާ ކަމަށް ވެސް އެ ކުންފުނިން ބުނެފައިވެ އެވެ.
އެ މައްސަލައިގައި ރައްޔިތުންގެ މަޖިލީހުގެ ސްޓޭޓް އޯންޑް އެންޓާޕްރައިސާސް ކޮމެޓީގައި ވާހަކަ ދައްކަވަމުން މާލޭގެ މުއިއްޒު ކުރިން ވިދާޅުވެފައި ވަނީ އެ ސަރަހައްދުގައި ދިރިއުޅޭ ރައްޔިތުންނަށް ދާއިމީ ހައްލެއް ލިބޭނީ ސްޓެލްކޯ އެހެންތަނަކަށް ބަދަލުކޮށްގެން ކަމަށެވެ.
"ތޮއްޖެހިފައި އޮތް މާލޭ ތެރޭގައި މިހާ ބޮޑު ބިމެއްގައި އެހާ މީހުންނަށް ސިއްހީ ގޮތުންނާއި ނަފްސާނީ ގޮތުން އުނދަގޫވާ ތަނެއް ހުރުމަށްވުރެ، މާލެއިން ބޭރަށް ތިލަފުއްޓަށް ނޫނީ އެހެން ތަނަކަށް ނަމަވެސް ބަދަލުވުމަކީ ލޯންގް ޓާމްގައި ހަގީގަތުގައި ޓެކްނިކަލީ އެންމެ ރަނގަޅު ގޮތް ކަމަށްވާނީ ސްޓެލްކޯ ރިލޮކޭޓްވުން،" މޭޔަރު ވިދާޅުވި އެވެ.
އެ ކޮމެޓީގައި ވާހަކަ ދައްކަމުން ސްޓެލްކޯ ސަރަހައްދުގައި ދިރިއުޅޭ މީހުން ބުނެފައި ވަނީ މައްސަލައިގެ ހައްލަކަށްވާނީ އެމީހުން އެހެން ސަރަހައްދަކަށް ބަދަލު ކުރުން ކަމަށެވެ.
"އެމީހުން ނުވިސްނާނެ ދޯ އަޅުގަނޑުމެން އެ ސަރަހައްދުގައި އުޅޭ ވިއްސަކަށް މީހުންނަކަށް؟ އެމީހުން ވިސްނަވާނީ މުޅި މާލެއަށް ކަަރަންޓު ދެވޭތޯ. އެއީ ޖަނަރޭޓަރުތައް އެބަ ހިންގަންޖެހޭ އެ ސަރަހައްދުގައި. ކަރަންޓު ވެސް ދޭންޖެހޭ އެބަ. އެހެންވީމަ އެތަން އިންޑަސްޓްރިއަލް ޒޯނެއްގެ ގޮތުގައި ބާއްވާފައި އަޅުގަނޑުމެން މޫވްކޮށްލަދޭށޭ (މި ދަންނަވަނީ)،" އެ ސަރަހައްދުގައި ދިރިއުޅޭ މީހަކު ބުންޏެވެ.
