ކުރީގެ އިސްލާމިކް މިނިސްޓަރު ޑރ. އަހުމަދު ޒިޔާދުގެ މައްޗަށް އުފުލާފައިވާ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާގެ ޝަރީއަތުގައި ހިމެނޭ މީހަކު ހެކިބަސް ދޭން ދެކޮޅު ހަދައި, ކޯޓަށް ހާޒިރު ނުވާން ނިންމައިފި އެވެ.
ޒިޔާދުގެ މައްޗަށް ދައުވާ ކުރަނީ އިސްލާމިކް މިނިސްޓަރުގެ މަގާމުގައި ޒިޔާދު ހުންނެވި އިރު ޒިކުރާ މިސްކިތް ހުރި ބިމުގައި 10 ބުރީގެ އިމާރާތެއް އެޅުމަށް އެސްޖޭ ކޮންސްޓްރަކްޝަން އިން ހުށަހެޅި ޕްރޮޕޯސަލްއާ ހިލާފަށް ދައުލަތަށް ގެއްލުން ވާގޮތަށް އެއްބަސްވުން ގާއިމުކޮށްފައިވާ ކަމަށް ބުނެ އެވެ. އެގޮތުން ޕްރޮޕޯސަލްގައި ސަރުކާރަށް ހަތަރު ފްލޯ ނަގާ ގޮތަށް އޮތް ނަމަވެސް, އެއްބަސްވުމުގައި އޮތީ ސަރުކާރަށް އެންމެ ތިން ފަންގިފިލާ ލިބޭ ގޮތަށެވެ.
އެ އެއްބަސްވުމުގައި ސޮއިކުރުމާއެކު އެސްޖޭ ކޮންސްޓްރަކްޝަންއަށް އީކުއިޓީގެ ގޮތުގައި 30 މިލިއަން ރުފިޔާ ސަރުކާރުން ދައްކާފައިވެ އެވެ. އެހެން ނަމަވެސް، އެކަމުން އެއްވެސް ފައިދާއެއް ދައުލަތަށް ލިބިފައި ނުވާ ކަމަށާއި އެސްޖޭ ކޮންސްޓްރަކްޝަންއަށް ނާޖާއިޒު ފައިދާއެއް ހޯދާދީފައިވާ ކަމަށް ދައުލަތުން ޒިޔާދުގެ މައްޗަށް ތުހުމަތު ކުރެ އެވެ.
މި މައްސަލާގައި މިއަދު ވަނީ ޝަރީއަތުގެ މަރުހަލާ ފެށުމަށް ދެ ފަރާތުން ވެސް އިބްތިދާއީ ބަޔާން އިއްވާފަ އެވެ. އެއަށްފަހު ހެކިންގެ ހެކި ބަސް ނެގުމުގެ އަޑުއެހުން ކުރިއަށް ގެންދިޔަ އެވެ. މިއަދު މެންދުރުފަހު ފެށި އަޑުއެހުމުގައި ދައުލަތުން ހުށަހެޅި ތިން ހެއްކެއްގެ ހެކިބަސް ނެގި އެވެ.
އެއީ, ޒިޔާދުގެ ސޮއި ތަހުލީލުކޮށް ރިޕޯޓް ތައްޔާރުކުރި ފުލުސް އޮފިސަރާއި އޭރު އިސްލާމިކް މިނިސްޓްރީގެ ވަޒީފާގައި އުޅުނު ދެ މުވައްޒަފެކެވެ. މި ތިން މީހުންނާ ވެސް މިއަދުގެ މަޖިލީހުގައި ދެ ފަރާތުން ސުވާލުކޮށްފައިވެ އެވެ.
ދައުލަތުން މައްސަލާގައި ޖުމްލަ ޝަފަވީ ހަތަރު ހެއްކެއް ހުށަހެޅި އެވެ. އޭގެ ތެރެއިން ތިން މީހުންގެ ހެކިބަސް ނެގުނުއިރު ހަތަރު ވަނަ ހެކިވެރިޔާ ވަނީ ކޯޓަށް އައުމަށް ދެކޮޅު ހަދާފަ އެވެ. އެއީ, އިސްލާމިކް މިނިސްޓްރީގެ މުވައްޒަފެކެވެ.
ކުރިމިނަލް ކޯޓުން މިއަދު އޭނާ ހާޒިރުވުމަށް އަންގައި ޗިޓް ވެސް ފޮނުވި އެވެ. ނަމަވެސް, މައްސަލާގައި ހެކިބަސް ދޭން ބޭނުން ނުވާ ކަމަށް ބުނެ އޭނާ ކޯޓަށް ސިޓީއެއް ފޮނުވި އެވެ. އެކަމާ ގުޅިގެން ދައުލަތުގެ ވަކީލް ވަނީ އެ ހެކިވެރިޔާ ކޯޓުން އަމުރުކޮށްގެން ނަމަވެސް, ހާޒިރުކޮށްދޭން އެދިފަ އެވެ. މައްސަލާގައި ދިފާއީ ހެކިންގެ ހެކިބަސް ނެގޭނީ އެ ހެކިވެރިޔާގެ ހެކިބަހަށްފަހު ކަމަށް ވަކީލް ފާހަގަ ކުރެއްވި އެވެ.
ވަކީލް ވިދާޅުވި ގޮތުގައި, އެ ހެކިވެރިޔާއަކީ ތަހުގީގަށް އޭސީސީއަށް ބަޔާން ވެސް ދީފައިވާ މީހެކެވެ. އެހެންވެ, މައްސަލާގައި ދައުލަތުން އެދުމުން ހެކިބަސް ދިނުމަކީ އޭނާގެ މައްޗަށް އައިނިއްޔަ ފަރުޟެއް ކަމަށް ގަބޫލު ކުރައްވާ ކަމަށް ވެސް ވަކީލް ވިދާޅުވި އެވެ. ވަކީލް ވިދާޅުވި ގޮތުގައި, ހެކިން ހެކިބަސް ދިނުމުގެ އިހްތިޔާރާ ގުޅޭ ގޮތުން އެއްވެސް ގާނޫނެއްގައި ކަމެއް ބަޔާންކޮށްފައިނުވާ ހާލަތުގައި ބަލަން ޖެހޭނީ އިސްލާމީ ޝަރީއަތަށް ކަމަށް ވެސް ވިދާޅުވި އެވެ.
އަދި ހެކިވެރިޔާގެ ހެކި ބަހަކީ އޭނާ އަމިއްލަ ގޮތުން ދޭ ހެކިބަހެއް ނޫން ކަމާއި އެއީ އޭނާގެ ވަޒީފާގެ ގޮތުން ރަސްމީ ހައިސިއްޔަތެއް އޮވެގެން ދޭން ޖެހޭ ހެކިބަހެއްކަން ވެސް ވަކީލް ފާހަގަ ކުރެއްވި އެވެ.
އެކަމާ ގުޅިގެން ޒިޔާދުގެ ވަކީލް ނޫރުއްސަލާމް އަބޫބަކުރު ވިދާޅުވީ ހެކިވެރިޔާ ގަދަކަމުން ހާޒިރުކޮށްގެން ހެކިބަސް ނަގާ ނަމަ, އެއީ އޭނާ އަމިއްލަ އިހްތިޔާރުގައި ދޭ ހެކިބަހެއް ކަމާމެދު ސުވާލު އުފެދިދާނެ ކަމަށެވެ. އަދި, ހެކިވެރިޔާ ބަންދުކޮށްގެން ހާޒިރު ކުރެވިދާނެ ކަމަށް ގާނޫނުގައި ނެތް ކަމާއި އޭނާއަށް އަމިއްލައަށް ހާޒިރުވާން ފުރުސަތު ދިނުމަކީ އެދޭ ގޮތް ކަމަށް ވަކީލު ވިދާޅުވި އެވެ.
ނަމަވެސް, ނޫރުއްސަލާމް ބޮޑަށް އިއުތިރާޒު ކުރައްވަމުން ގެންދެވީ, އެ ހެކިވެރިޔާގެ ހެކިބަސް ނުނެގިގެން ދިފާއީ ހެކިންގެ ހެކިބަސް ނެގުން ފަސްކުރުމާމެދު އެވެ. އޭނާ ވިދާޅުވި ގޮތުގައި, އެއީ އެންމެ އިންސާފުވެރި ގޮތް ނޫން ކަމާއި ދިފާއީ ހެކިންގެ ހެކިބަސް މިއަދު ވެސް ނުނެގެންވީ ސަބަބެއް ނެތް ކަމަށެވެ.
ދިފާއީ ހެކިން ވެސް މިއަދު ކޯޓަށް ހާޒިރުވެ ތިއްބެވެ. އަދި, ހެކިބަސް ދޭން ދެކޮޅު ހަދާފައިވާ އިސްލާމިކް މިނިސްޓްރީގެ މުވައްޒަފަކީ ޒިޔާދުގެ ފަރާތުން ވެސް ދިފާއީ ހެއްކެއްގެ ގޮތުގައި ހުށަހަޅާފައިވާ މީހެކެވެ.
ދެ ފަރާތުގެ ވާހަކަތައް އަޑުއެއްސެވުމަށްފަހު, މައްސަލަ ބައްލަވާ ގާޒީ މުހައްމަދު މިސްބާހު ދައުލަތާ ސުވާލުތައް އަމާޒު ކުރެއްވި އެވެ. އެގޮތުން, ދައުލަތުން ބޭނުން ވަނީ ހެކިވެރިޔާ ބަންދުކޮށްގެން ގެނެސް ހެކިބަސް ނަގަންތޯ, އެހެންވެއްޖެނަމަ އެއީ އޭނާއަށް މަޖުބޫރުކޮށްގެން ނަގާ ހެކިބަހަށް ނުވާނެތޯ ގާޒީ އެއްސެވި އެވެ.
ޖަވާބުގައި ދައުލަތުން ވިދާޅުވި ގޮތުގައި, ކޯޓުން ޗިޓް ފޮނުވުމުން އެއަށް ތަބާވުމަކީ މަޖުބޫރުކަމެކެވެ. ވަކީލް ފާހަގަ ކުރެއްވީ ކުރީގެ ޓޫރިޒަމް މިނިސްޓަރު އަލީ ވަހީދަށް ސުޕްރީމް ކޯޓުން ޗިޓް ފޮނުވުން ހާޒިރުނުވުމުން އޭނާއާމެދު ވެސް މަތީ ކޯޓުން ފިޔަވަޅު އެޅި ކަމެވެ. އަދި, އެ މައްސަލާގައި އަލީ ވަހީދަށް އިއްވި ހުކުމްގައި, ކޯޓުތަކުން ކުޑަކަކޫ ޖަހާތަން ފެނިގެން ނުވާނެ ކަމަށް ބަޔާންކޮށްފައިވާކަން ވެސް ވަކީލް ފާހަގަ ކުރެއްވި އެވެ.
އެއަށްފަހު ގާޒީ ވަނީ އެކަމާ މެދު ގޮތެއް ނިންމުމަށް އަޑުއެހުން މެދުކަނޑާލައްވާފަ އެވެ.
އަޑުއެހުން އަލުން ފެށުމަށްފަހު, ގާޒީ މިސްބާހު ވިދާޅުވީ ހެކިވެރިޔާއަށް ކޯޓަށް ހާޒިރުވާން އަންގައި އަނެއްކާވެސް ޗިޓް ފޮނުވައި އޭނާއަށް އަމިއްލަ އިހްތިޔާރުގައި ކޯޓަށް ހާޒިރުވާން ފުރުސަތު ދެއްވާނެ ކަމަށެވެ. އެއަށްފަހު ބަންދުކޮށްގެން ހާޒިރުކުރަން ޖެހިއްޖެނަމަ އެކަން ވެސް ކުރައްވާނެ ކަމަށް ގާޒީ ވިދާޅުވި އެވެ.
އަދި, ދިފާއީ ހެކިންގެ ހެކިބަސް އެ ހެކިވެރިޔާގެ ހެކިބަހަށްފަހު ނެގުމަށް ނިންމައި, މިއަދުގެ އަޑުއެހުން ނިންމާލެއްވި އެވެ.
