އިންޑިއާގެ ކެރަލާ ސްޓޭޓުގެ 11 މީހަކަށް ނިޕާހް ވައިރަސް ޖެހި، ކުއްޖަކު މަރުވެފައިވާ ކަމަށް ރިޕޯޓުތައް ބުނެފި އެވެ.
ކެރަލާ ހެލްތު މިނިސްޓަރު ވީނާ ޖޯޖް ވިދާޅުވީ ބަލީގެ އަލާމާތްތައް 11 މީހެއްގެ ހަށިގަނޑުން ފެނިފައިވާ ކަމަށާއި، އޭގެ ތެރޭގައި މިދިޔަ އާދީއްތަ ދުވަހު މަރުވި 12 އަހަރުގެ ފިރިހެން ކުއްޖެއްގެ މައިންބަފައިން ވެސް ހިމެނޭ ކަމަށެވެ.
"އެ މީހުންގެ ހާލު ރަނގަޅު. އެ ކުއްޖާގެ މަންމަ އާދީއްތަ ދުވަހުގެ ރޭ ހުން އައި، އެކަމަކު މިހާރު ރަނގަޅު،" އޭނާ ވިދާޅުވި އެވެ.
އޭގެ އިތުރުން ކޮންޓެކްޓް ޓްރޭސް ކުރަން ފަށާފައިވާ ކަމަށާއި މިހާތަނަށް ފާހަގަވި 251 މީހުންގެ ތެރެއިން 54 މީހުންނަކީ "ހައި ރިސްކު" ކަމަށް ވެސް އޭނާ ވިދާޅުވި އެވެ. އެ އެންމެން ވެސް ވަނީ އައިސޮލޭޝަންގަ އެވެ.
"އެ ލިސްޓުގައި ހިމެނޭ 129 އަށް ވުރެ ގިނަ މީހުންނަކީ މެޑިކަލް ސްޓާފުން، އޭގެން ހައި ރިސްކުގައި ހިމެނެނީ 30 މީހުން،" އޭނާ ވިދާޅުވި އެވެ.
މިނިސްޓަރު ފާހަގަކުރެއްވި ގޮތުގައި އެހާ ގިނަ އަދަދެއްގެ މެޑިކަލް ސްޓާފުންނަކީ ކޮންޓެކްޓުވެފައި ވަނީ މަރުވި ކުއްޖާއަށް ފަރުވާ ކުރުމަށް ތަފާތު ހަތަރު ކްލިނިކަކަށް ގޮސްފައި ވާތީ ކަމަށެވެ.
ޕޫނޭގައި ހުންނަ ނޭޝަނަލް އިންސްޓިޓިއުޓް އޮފް ވައިރޮލޮޖީގެ ބެލުމުގެ ދަށުން ކޮޒިކޮޑޭ ހޮސްޕިޓަލުގައި ނިޕާހް ވައިރަހަށް ޓެސްޓު ކުރަން ހާއްސަ ލެބޯޓަރީއެއް މިހާރު ވަނީ ހުޅުވާފަ އެވެ.
އޭގެ އިތުރުން ނޭޝަނަލް ސެންޓާ ފޯ ޑިޒީޒް ކޮންޓްރޯލްގެ ޓީމަކުން ވެސް ކެރަލާގައި ދަނީ ހަރަކާތްތެރިވަމުންނެވެ. ވާލުގެ ޒަރިއްޔާ އިން ފެތުރޭ ނިޕާހް ވައިރަހުން ޖެހޭ ބައްޔަކީ މިހާތަނަށް ވެކްސިނެއް ހޯދިފައި ނުވާ އިންފެކްޝަނެކެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފައިވާ ގޮތުގައި ނިޕާހް ވައިރަސް ޖެހުމުން މަރުވާ ރޭޓު އުޅެނީ 40 ޕަސެންޓާއި 75 ޕަސެންޓާ ދެމެދުގަ އެވެ.
މިއީ ކޮރޯނާ ވައިރަހަށް ވުރެ ނުރައްކާތެރި ބައްޔެއް ނަމަވެސް، މި ވައިރަހަށް ވުރެ މާ ހަލުވިކޮށް ކޮރޯނާވައިރަސް ފެތުރެ އެވެ.
ރިޕޯޓުތައް ބުނާ ގޮތުން ބަލިވެގެން މަރުވި ކުއްޖާ ކޭ ކަމަށް ބެލެވޭ ރަމްބުސްތާންތަކެއް ވަނީ ޓެސްޓު ކުރަން ގެންގޮސްފަ އެވެ. ސިއްހީ އޮފިޝަލުން ބުނެފައި ވަނީ އެ ކުއްޖާ ދިރިއުޅެމުން ދިޔެއީ ވާލުގެ ބާވަތެއް ކަމަށްވާ ފްރުޓް ބެޓް ގެންގުޅުނު ހިސާބެއްގައި ކަމަށެވެ.
އެ ސަރަހައްދުގައި އުޅޭ ބަކަރި އާއި އެހެން ޖަނަވާރުގެ ސާމްޕަލްތައް ވެސް ވަނީ ޓެސްޓު ކުރަން ގެންގޮސްފަ އެވެ. މިއީ ވާލުގެ ޒަރިއްޔާ އިން އިންސާނުންގެ ގަޔަށް އަދި އެހެން ޖަނަވާރުންގެ ގަޔަށް އެރުމުގެ ފުރުސަތު އޮންނަ ވައިރަހެކެވެ.
މިނިސްޓަރު ޖޯޖް ވިދާޅުވީ ނިޕާހް ވައިރަހާ ދެކޮޅަށް ވެކްސިނެއް ނެތް ނަމަވެސް މި ބައްޔަށް ފަރުވާ ކުރަން ބޭނުން ކުރާ އެންޓިބޮޑީ އަންނަ ހަފުތާގައި އޮސްޓްރޭލިއާ އިން އިންޑިއަން ކައުންސިލް އޮފް މެޑިކަލް ރިސާޗް އަށް ލިބޭނެ ކަމަށެވެ.
މީގެ ކުރިން 2018 ވަނަ އަހަރު ވެސް ކޮޒިކޮޑޭގައި ނިޕާހް ވައިރަސް ފެތުރުމުން، ބަލި ކޮންޓްރޯލް ކުރުމަށް ބޭނުން ކުރީ އެފަދަ އެންޓިބޮޑީ ފަރުވާއެކެވެ. އެ ފަހަރު ބަލި ޖެހިގެން 17 މީހުން މަރުވި އެވެ.
