ކާބުލް، އަފްގާނިސްތާން (ސެޕްޓެމްބަރު 7) - މިދިޔަ މަހު އަފްގާނިސްތާނުގެ ވެރިކަމަށް އައި ތާލިބާނުންނަށް ނުހިފި އޮތް ހަމައެކަނި ސަރަހައްދުގެ ކޮންޓްރޯލް ވެސް މިހާރު ލިބިފައިވާ ކަމަށް އެ ޖަމާއަތުން ބުނެފި އެވެ.
ވިހި އަހަރަށް ފަހު އެމެރިކާގެ ފައުޖުތައް އަފްގާނިސްތާނުން ފައިބަން ފެށުމާއެކު ތާލިބާނުން ވަނީ ހައިރާން ކުރުވަނިވި ގޮތަކަށް އަލުން ވެރިކަމަށް އައިސްފަ އެވެ. އެ މީހުންނަށް ނުހިފި އޮތް ހަމައެކަނި ތަނަކީ ޕަންޖްޝީރް ވާދީ އެވެ.
ތާލިބާނުންގެ ތަރުޖަމާނު ބުނީ އެ ތަނުގައި ވަރުގަދަ ހަމަލާތައް ބަދަލު ކުރުމަށް ފަހު ކުރި ލިބިފައިވާ ކަމަށާއި ތާލިބާނުންނާ ދެކޮޅަށް އިތުރަށް މަސައްކަތް ކުރަން އުޅުމުގެ ނަތީޖާ ގޯސްވާނެ ކަމަށެވެ.
"މި ކާމިޔާބާއެކު އަޅުގަނޑުމެންގެ ގައުމު މި ވަނީ ހަނގުރާމައިގެ ތެރެއިން ސަލާމަތް ކުރެވިފައި،" ޒަބީހުﷲ މުޖާހިދު ބުންޏެވެ.
"ހަނގުރާމައެއް ފަށަން އުޅޭ ކޮންމެ ބަޔަކާ ދެކޮޅަށް ވެސް ވަރުގަދަ ހަމަލާތައް ދޭނަން. އެފަދަ ހަނގުރާމައަކަށް ދެން ފުރުސަތެއް ނެތް."
ތާލިބާނުން ވަނީ ޕަންޖްޝީރުގައި ހުންނަ ގަވަރުނަރުގެ ގޭގެ ބޭރުގައި ތާލިބާނުންގެ ހުދު ދިދަ ނަގާ މަންޒަރު ފެންނަ ވީޑިއޯއެއް އާއްމުކޮށްފަ އެވެ. ޕަންޖްޝީރް ވާދީއަކީ އަބަދުވެސް ތާލިބާނުންނާ ދެކޮޅު ހަނގުރާމަވެރިންގެ ބާރު ހިނގަމުން ދިޔަ ތަނެކެވެ. އެހެންކަމުން މިއީ 40 އަހަރަށް ފަހު ތާލިބާނުންނަށް އެތަން ހިފުނު ފުރަތަމަ ފަހަރެވެ.
އަފްގާނިސްތާނުގެ ކުރީގެ ސިފައިންނާއި ތާލިބާނާ ދެކޮޅު ހަނގުރާމަވެރިން އެއްބައިވެ އުފައްދާފައިވާ ނޭޝަނަލް ރިޒިޒްޓަންސް ފްރަންޓް (އެންއާރްއެފް) އިން އާދީއްތަ ދުވަހު ބުނީ ޕަންޖްޝީރުގައި އެ މީހުންނަށް ބޮޑެތި ގެއްލުންތަކެއް ވެފައިވާ ކަމަށާއި ހަމަލާ ބަދަލު ކުރުން މެދުކަނޑާލަން ގޮވާލާ ކަމަށެވެ.
ނަމަވެސް ހޯމަ ދުވަހު ކުރި ޓްވީޓެއްގައި އެންއާރްއެފުން ބުނީ އެ މީހުންގެ ހަނގުރާމަވެރިން އަދިވެސް ތިބީ ޕަންޖްޝީރް ވާދީގެ "ސްޓްރެޓެޖިކް" ހިސާބުތަކުގައި ކަމަށެވެ.
