މާލެއަށް ކަރަންޓުދޭ ސްޓެލްކޯގެ ބިޔަ ޖަނަރޭޓަރުތައް ކައިރީ ދިރިއުޅޭ ރައްޔިތުންނަށް އެހެން ސަރަހައްދަކުން ގޯތި ދިނުމަށް ސިޓީ ކައުންސިލުން ނިންމި ނަމަވެސް އެކަން ކޮށްފައި ވަނީ ސަރުކާރާ މަޝްވަރާ ކުރުމެއް ނެތި އަދި މައްސަލަ ހައްލު ކުރުމަށް ރައީސް އޮފީހުން ގެންގުޅޭ ވިސްނުމާ ހިލާފަށްކަން ހާމަވެއްޖެ އެވެ.
ސްޓެލްކޯ ސަރަހައްދުގައި ދިރިއުޅޭ ރައްޔިތުންނަށް، ހާއްސަކޮށް ގ. ފެހިހިރި އާއި ގ. ރަސްރޯނުގެ ރައްޔިތުނަށް އިންޖީނުގެތަކުން އިވޭ އަޑާއި ދުވާ ވަހާއި އަރާ ދުމާއި ވައިބްރޭޝަންގެ ސަބަބުން އިންސާނީ ހައްގުތައް ގެއްލިފައިވާ ކަމަށް އެޗްއާރްސީއެމުން ވަނީ ބުނެފަ އެވެ.
އެ ސަރަހައްދުގެ ގެތަކުގައި ދިރިއުޅޭ މީހުންނަށް އެހެން ސަރަހައްދަކުން ގޯތި ދިނުމަށް ސިޓީ ކައުންސިލުން ނިންމީ، އެ މައްސަލަ ރައްޔިތުންގެ މަޖިލީހާއި ރައީސް އޮފީހާއި ސަރުކާރުގެ ވަރަށް ގިނަ އިދާރާތަކަށް ހުށަހަޅައިގެން އެ ދެ ގޭގެ ރައްޔިތުން އެ ސަރަހައްދުން ބަދަލުވާން މަސައްކަތް ކުރަނިކޮށެވެ.
އެ މައްސަލައިގައި ސްޓެލްކޯއިން އަބަދުވެސް ބުނަމުންދިޔައީ އުނދަގޫވަނީ އަދި ގަވާއިދާ ހިލާފަށް ގެތަކާ 200 ފޫޓު ކައިރިން ބަހައްޓާފައި ހުރި ޖަނަރޭޓަރުތަކަކީ މާލެއަށް ބޭނުންވާ ކަރަންޓު ދިނުމަށް އެމަޖެންސީކޮށް ބަހައްޓާފައިވާ ޖަނަރޭޓަރުތަކެއް ކަމަށެވެ. އަދި ހުޅުމާލޭގައި ގާއިމްކޮށްފައި ހުރި 50 މެގަވޮޓްގެ ބިޔަ ޖަނަރޭޓަރު މާލެއާ މިހާރު ގުޅާލާފައި އޮތުމުން ކުދި ޖަނަރޭޓަރުތައް ބަންދުކޮށްފައިވާ ކަމަށް ވެސް އެ ކުންފުނިން ބުނެ އެވެ.
އެ މައްސަލައިގައި "އަދަދު" އާ ވާހަކަ ދައްކަވަމުން ސަރުކާރުގެ ތަރުޖަމާނު މަބްރޫކް އަޒީޒް ވިދާޅުވީ ސްޓެލްކޯ ސަރަހައްދުގައި ދިރިއުޅޭ ރައްޔިތުންގެ މައްސަލައާމެދު ކައުންސިލުން ނިންމި ގޮތް ރައީސް އޮފީހަށް އަންގާފައިނުވާ ކަމަށެވެ.
މަބްރޫކް ވިދާޅުވީ އެ ކުދި ޖަނަރޭޓަރުތައް ހުޅުމާލެއަށް ބަދަލު ކުރުމުގެ މަސައްކަތް ކުރަމުންދާ ކަމަށާއި އެކަން ނިމުމުން، ސްޓެލްކޯ ސަރަހައްދުގެ ރައްޔިތުންނަށް ދިމާވެފައިވާ މައްސަލައަށް ހައްލެއް ލިބޭނެ ކަމަށް ރައީސް އޮފީހުން ގަބޫލު ކުރާ ކަމަށެވެ.
އެ މައްސަލައިގައި ރައްޔިތުންގެ މަޖިލީހުގެ ސްޓޭޓް އޯންޑް އެންޓާޕްރައިސާސް ކޮމެޓީގައި ވާހަކަ ދައްކަވަމުން މާލޭގެ މޭޔަރު ޑރ. މުހައްމަދު މުއިއްޒު ވިދާޅުވީ އެ ސަރަހައްދުގައި ދިރިއުޅޭ ރައްޔިތުންނަށް ދާއިމީ ހައްލެއް ލިބޭނީ ސްޓެލްކޯ އެހެންތަނަކަށް ބަދަލުކޮށްގެން ކަމަށެވެ.
"ތޮއްޖެހިފައި އޮތް މާލޭ ތެރޭގައި މިހާ ބޮޑު ބިމެއްގައި އެހާ މީހުންނަށް ސިއްހީ ގޮތުންނާއި ނަފްސާނީ ގޮތުން އުނދަގޫވާ ތަނެއް ހުރުމަށްވުރެ، މާލެއިން ބޭރަށް ތިލަފުއްޓަށް ނޫނީ އެހެން ތަނަކަށް ނަމަވެސް ބަދަލުވުމަކީ ލޯންގް ޓާމްގައި ހަގީގަތުގައި ޓެކްނިކަލީ އެންމެ ރަނގަޅު ގޮތް ކަމަށްވާނީ ސްޓެލްކޯ ރިލޮކޭޓްވުން،" މޭޔަރު ވިދާޅުވި އެވެ.
އެ ކޮމެޓީގައި ވާހަކަ ދައްކަމުން ސްޓެލްކޯ ސަރަހައްދުގައި ދިރިއުޅޭ މީހުން ބުނެފައި ވަނީ މައްސަލައިގެ ހައްލަކަށްވާނީ އެމީހުން އެހެން ސަރަހައްދަކަށް ބަދަލު ކުރުން ކަމަށެވެ.
"އެމީހުން ނުވިސްނާނެ ދޯ އަޅުގަނޑުމެން އެ ސަރަހައްދުގައި އުޅޭ ވިއްސަކަށް މީހުންނަކަށް؟ އެމީހުން ވިސްނަވާނީ މުޅި މާލެއަށް ކަަރަންޓު ދެވޭތޯ. އެއީ ޖަނަރޭޓަރުތައް އެބަ ހިންގަންޖެހޭ އެ ސަރަހައްދުގައި. ކަރަންޓު ވެސް ދޭންޖެހޭ އެބަ. އެހެންވީމަ އެތަން އިންޑަސްޓްރިއަލް ޒޯނެއްގެ ގޮތުގައި ބާއްވާފައި އަޅުގަނޑުމެން މޫވްކޮށްލަދޭށޭ (މި ދަންނަވަނީ)،" އެ ސަރަހައްދުގައި ދިރިއުޅޭ މީހަކު ބުންޏެވެ.
