އަފްގާނިސްތާނުގެ ޕްރޮވިންޝަލް ސިޓީއެއްގައި ތާލިބާނުން މާބަނޑު ފުލުހެއްގެ ގަޔަށް ބަޑި ޖަހައި މަރާލާފައިވާ ކަމަށް މަންޒަރު ދުށް ފަރާތްތަކާ ހަވާލަދީ ބީބީސީން ރިޕޯޓުކޮށްފި އެވެ.
އަފްގާނިސްތާނުގެ މީޑިއާއިން ބުނާ ގޮތުގައި ބަނޫ ނެގަރް ނަމަކަށް ކިޔާ އަންހެން މީހާ މަރާލީ އޭނާގެ އާއިލާ މެމްބަރުންގެ ކުރިމަތީގައި ގޯރް ޕްރޮވިންސްގެ ވެރިރަށް ފީރޯޒްކޯހްގަ އެވެ.
ތާލިބާނުން ބީބީސީ އަށް ބުނެފައި ވަނީ ނެގަރްގެ މަރުގައި އެ މީހުންގެ އަތެއް ނުވާނެ ކަމަށާއި އެކަން ހިނގައި ދިޔަ ގޮތް ތަހުގީގު ކުރަމުންދާ ކަމަށެވެ.
"އެކަމުގެ މައުލޫމާތު ވަނީ ލިބިފައި. އޭނާ މަރާލީ ތާލިބާނުން ނޫން ކަމުގެ ޔަގީންކަން އެބަ އޮތް. ތަހުގީގު ދަނީ ކުރިއަށް،" ތާލިބާނުންގެ ތަރުޖަމާނު ޒަބީހުﷲ މުޖާހިދު ބުންޏެވެ.
އޭނާ ބުނީ ކުރީގެ ސަރުކާރަށް މަސައްކަތް ކޮށްދިން ފަރާތްތަކުގެ ކިބައިން ބަދަލު ނުހިފާނެ ކަމުގެ ޔަގީންކަން ތާލިބާނުން ދީފައި ވާނެ ކަމަށާއި ނެގަރްގެ މަރު ގުޅިފައި ވަނީ "ޒާތީ" މައްސަލައަކާ ކަމަށެވެ.
އެ ހާދިސާއާ ގުޅޭ މައުލޫމާތު ހާމަކޮށްފި ނަމަ ފުރާނައަށް ގެއްލުންވެދާނެ ކަމުގެ ބިރަށް ފީރޯޒްކޯހް ސިޓީގެ ގިނަ ބަޔަކު އެކަމުގެ ވާހަކަ ދައްކަން ބޭނުމެއް ނުވެ އެވެ.
ނަމަވެސް މަންޒަރު ދުށް ތިން މީހަކު ބީބީސީ އަށް ބުނެފައި ވަނީ ތާލިބާނުން ނެގަރް އަށް އަނިޔާކޮށް ބަޑި ޖަހައި މަރާލީ އޭނާގެ ފިރިމީހާ އާއި ދަރިންގެ ކުރިމަތީގައި ހޮނިހިރު ދުވަހު ކަމަށެވެ.
ފާރަށް ލޭ ބުރާފައި ހުރި މަންޒަރާއި ކޮޓަރީގެ ކަނެއްގައި ކާކުކަން ނޭނގޭ ވަރަށް މޫނު މައްޗަށް އަނިޔާވެފައިވާ މީހެއްގެ ހަށިގަނޑު އޮންނަ މަންޒަރު ފެންނަ ފޮޓޯތައް ނެގަރްގެ އާއިލާއިން ވަނީ ބީބީސީއާ ހިއްސާކޮށްފަ އެވެ.
އެ އާއިލާއިން ބުނީ ޖަލުގައި ވަޒީފާ އަދާ ކުރަމުން ދިޔަ ނެގަރް މަރާލިއިރު އިނީ ބަލިވެ ކަމަށާއި ބަނޑަށް އަށް މަސް ކަމަށެވެ.
ހޮނިހިރު ދުވަހު ހަތިޔާރާއެކު ތިން ފިރިހެނަކު ގެޔަށް އައިސް އާއިލާގެ މެމްބަރުން ބަނުމަށް ފަހު ނެގަރް ހިފެހެއްޓި ކަމަށް އެ އާއިލާއިން ބުންޏެވެ.
މަންޒަރު ދުށް މީހަކު ބުނެފައި ވަނީ އެ އަމަލު ހިންގި މީހުން ވާހަކަ ދެއްކީ އަރަބި ބަހުން ކަމަށެވެ.
އޯގަސްޓު 13 ވަނަ ދުވަހު ވެރިކަމަށް އައި ތާލިބާނުން ބުނެފައި ވަނީ މި ފަހަރު ވެރިކަން ކުރާނީ ތަފާތުކޮށް ކަމަށާއި އަންހެނުންނާއި އަންހެން ކުދިންގެ ހައްގުތަކަށް އިހްތިރާމު ކުރާނެ ކަމަށެވެ.
ނަމަވެސް އަންހެނުންނާއި އަންހެން ކުދިންނާ ދެކޮޅަށް ލާއިންސާނީ ބޮޑެތި ޖަރީމާތައް ހިންގަމުންދާ ކަމުގެ ހަބަރުތައް މިހާރު ވަނީ ފެތުރެން ފަށާފަ އެވެ.
